ନୂଆଦିଲ୍ଲୀ : ବିହାର ନିର୍ବାଚନର ଭୋଟ୍ ଗଣତି ଆଗକୁ ବଢ଼ିବା ସହିତ, ଆଲିନଗର ନିର୍ବାଚନମଣ୍ଡଳୀକୁ ନେଇ ଉତ୍ସାହ ଶୀର୍ଷରେ ପହଞ୍ଚିଛି। ପ୍ରତ୍ୟେକ ପର୍ଯ୍ୟାୟ ସହିତ ଚିତ୍ର ବଦଳୁଛି। ଏହାରି ଭିତରେ ବେଶ୍ ଚର୍ଚ୍ଚାରେ ଅଛନ୍ତି ଲୋକ ଗାୟିକାରୁ ରାଜନେତ୍ରୀ ହୋଇଥିବା ମୈଥିଳୀ ଠାକୁର। କିନ୍ତୁ ପ୍ରଶ୍ନ ହେଉଛି ମଞ୍ଚର ଚମକ ତାଙ୍କୁ ବିଧାନସଭା ପର୍ଯ୍ୟନ୍ତ ନେଇଯିବ କି। ଯଦି ସେମିତି ହୁଏ, ତେବେ କ'ଣ ତାଙ୍କର ରୋଜଗାର ହେବ। ଏହି ରୋଜଗାର କଣ ତାଙ୍କର ଷ୍ଟେଜ ଶୋ'ରୁ ଅଧିକ ହେବ କି?

୨୦୨୫ ବିହାର ବିଧାନସଭା ନିର୍ବାଚନ ପାଇଁ ଭୋଟ ଗଣନା ଚାଲିଛି। ଗଣତି ଭିତରେ ଆଲିନଗର ନିର୍ବାଚନମଣ୍ଡଳୀ ସାରା ଦେଶରେ ଆକର୍ଷଣର କେନ୍ଦ୍ର ପାଲଟିଛି। ଦରଭଙ୍ଗା ଜିଲ୍ଲାରେ ଅବସ୍ଥିତ ଏହି ଆସନ କେବଳ ରାଜନୈତିକ ପ୍ରତିଯୋଗିତା ଯୋଗୁଁ ନୁହେଁ ବରଂ ଜଣେ ଷ୍ଟାର ପ୍ରାର୍ଥୀ ଲୋକପ୍ରିୟ ଗାୟିକା ମୈଥିଳୀ ଠାକୁରଙ୍କ ଯୋଗୁଁ ମଧ୍ୟ ଖବରରେ ଅଛି। ଏଥର ବିଜେପି ତାଙ୍କ ଉପରେ ବାଜି ଲଗାଇଛି, ଯେତେବେଳେ କି RJD ତାର ଅଭିଜ୍ଞ ନେତା ବିନୋଦ ମିଶ୍ରଙ୍କୁ ପ୍ରାର୍ଥୀ କରି ପ୍ରତିଯୋଗିତାକୁ ଆକର୍ଷଣୀୟ କରିଛି। କିନ୍ତୁ ପ୍ରଶ୍ନ ହେଉଛି ମୈଥିଳୀ ଠାକୁର କ’ଣ ଆଲିନଗରରେ ମଧ୍ୟ ତାଙ୍କର ଲୋକପ୍ରିୟତାକୁ ଭୋଟରେ ପରିଣତ କରିପାରିବେ? ସେ କ’ଣ ଗୀତ ଗାଇ ଯେତିକି ରୋଜଗାର କରନ୍ତି ତା’ଠାରୁ ବିଧାୟକ ହୋଇ ଅଧିକ ରୋଜଗାର କରିବେ?

`ମୈଥିଳୀ ଠାକୁର ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ଏକ ସ୍ୱୀକୃତିପ୍ରାପ୍ତ ନାଁ ପାଲଟିଛନ୍ତି। ରିପୋର୍ଟ ଅନୁଯାୟୀ, ସେ ପ୍ରତି ମାସରେ ୧୨ରୁ ୧୫ଟି ଲାଇଭ୍ ଶୋ କରନ୍ତି। ଗୋଟିଏ ଶୋ’ ପାଇଁ ତାଙ୍କର ଫିସ୍ ୫,୦୦,୦୦୦ ରୁ ୭,୦୦,୦୦୦ ଟଙ୍କା ପର୍ଯ୍ୟନ୍ତ। ସେ ପ୍ରତି ମାସରେ ସହଜରେ ୬୦ ରୁ ୮୦ଲକ୍ଷ ଟଙ୍କା ରୋଜଗାର କରନ୍ତି। ଯାହା ବର୍ଷରେ ୭ ରୁ ୯ କୋଟି ଟଙ୍କା ହୋଇଥାଏ। ସ୍ପଷ୍ଟ ଭାବରେ କହିବାକୁ ଗଲେ, ମନୋରଞ୍ଜନ ଶିଳ୍ପ ତାଙ୍କ ପାଇଁ କେବଳ ସ୍ୱୀକୃତିର ଉତ୍ସ ନୁହେଁ, ବରଂ ଏକ ଗୁରୁତ୍ୱପୂର୍ଣ୍ଣ ଆର୍ଥିକ ପ୍ରୋତ୍ସାହନ ମଧ୍ୟ ରହିଛି।

ବିହାରରେ, ଜଣେ ବିଧାୟକଙ୍କ ମୂଳ ଦରମା ₹୫୦,୦୦୦। ଏଥିରେ ବିଭିନ୍ନ ପ୍ରକାରର ଭତ୍ତା ଅନ୍ତର୍ଭୁକ୍ତ, ଯେଉଁଥିରେ ₹୫୫,୦୦୦ ର ଆଞ୍ଚଳିକ ଭତ୍ତା, ₹୩,୦୦୦ ର ଦୈନିକ ବୈଠକ ଭତ୍ତା, ₹୪୦,୦୦୦ର ବ୍ୟକ୍ତିଗତ ସହାୟକ ଭତ୍ତା ଏବଂ ₹୧୫,୦୦୦ ର ଷ୍ଟେସନାରୀ ଭତ୍ତା ଅନ୍ତର୍ଭୁକ୍ତ। ଏଗୁଡ଼ିକୁ ମିଶାଇଲେ, ଜଣେ ବିଧାୟକଙ୍କ ମାସିକ ଆୟ ₹୧୪୩,୦୦୦ଅତିକ୍ରମ କରେ। ତଥାପି, ପ୍ରକୃତ ଆୟ କେବଳ ଏଥିରୁ ନୁହେଁ, ବରଂ ବିଧାୟକ ପଦବୀ ସହିତ ଆସୁଥିବା ସୁବିଧାରୁ ଆସିଥାଏ। ବିହାର ବିଧାୟକମାନେ ଅନେକ ସୁବିଧା ପାଆନ୍ତି ଯାହା ଆର୍ଥିକ ସହାୟତା ଅପେକ୍ଷା ବହୁତ ପ୍ରଭାବଶାଳୀ। ଏଥିରେ ₹୪ ଲକ୍ଷ ପର୍ଯ୍ୟନ୍ତ ବାର୍ଷିକ ରେଳ/ବିମାନ ଯାତ୍ରା କୁପନ। ₹୨୫ ଲକ୍ଷ ପର୍ଯ୍ୟନ୍ତ ଯାନବାହାନ ଋଣ। କର୍ଯ୍ୟକାଳ ପରେ ପେନସନ୍ ସ୍ୱରୂପ ବିଧାୟକଙ୍କ ପାଇଁ ମାସିକ ₹୪୫,୦୦ ପେନସନ, ₹୨୯,୦୦୦ର ଆତିଥ୍ୟ ଭତ୍ତା, ସୁରକ୍ଷା, ସରକାରୀ ବାସସ୍ଥାନ, ସବସିଡିଯୁକ୍ତ ବିଦ୍ୟୁତ୍, ପାଣି ଏବଂ ଫୋନ୍ ବିଲ୍ ଏବଂ ସରକାରୀ ଡାକ୍ତରଖାନାରେ ସ୍ୱତନ୍ତ୍ର ଚିକିତ୍ସା ସୁବିଧା ଅନ୍ତର୍ଭୁକ୍ତ। ଏହାର ଅର୍ଥ ହେଉଛି ଯେ ଜଣେ ବିଧାୟକଙ୍କ ରୋଜଗାର ମନୋରଞ୍ଜନ ଶିଳ୍ପର ରୋଜଗାର ତୁଳନାରେ ଅଧିକ ନ ହୋଇପାରେ, କିନ୍ତୁ ସେମାନଙ୍କର ଶକ୍ତି, ସୁବିଧା ଏବଂ ସାମାଜିକ ସ୍ଥିତି ଏହି ପଦବୀକୁ ଅତ୍ୟନ୍ତ ଶକ୍ତିଶାଳୀ କରିଥାଏ।