ଜାପାନୀ ଜ୍ଞାନକୌଶଳରେ ହେବ ପୁରୀ ସହରର ବିକାଶ, ପୌରପାଳିକା ଏବଂ ଜିଲ୍ଲା ପ୍ରଶାସନ ସହ ଆଲୋଚନା କଲେ ଜାପାନର ଏକ ପ୍ରତିନିଧି ମଣ୍ଡଳୀ

ପୁରୀ ୩୦।୧୧: ପୁରୀ ସହରର ସ୍ବଚ୍ଛତା କାର୍ଯ୍ୟକ୍ରମକୁ ଆହୁରି ବ୍ୟାପକ କରାଯିବ। ମଧ୍ୟପ୍ରଦେଶର ଭୋପାଳ ଓ ଇନ୍ଦୋର ମହାନଗର ନିଗମ ଢ଼ାଞ୍ଚାରେ ପୁରୀ ପୌରପାଳିକାରେ ସଫେଇ ଅଭିଯାନ କରାଯିବ। ତେବେ ଏନେଇ ଖୁବଶୀଘ୍ର କାର୍ଯ୍ୟକ୍ରମ ଆରମ୍ଭ ହେବାକୁ ଯାଉଥିବା ବେଳେ ପୁରୀ ପୌରାଞ୍ଚଳ ବାସୀଙ୍କୁ ପ୍ରଥମେ ସଚେତନ କରାଯିବ। ଏଣିକି ପୁରୀ ବାସିନ୍ଦା ଅଳିଆ ଗାଡ଼ିରେ କଠିନ ବର୍ଜ୍ୟବସ୍ତୁ ଏବଂ ତରଳ ବର୍ଜ୍ୟବସ୍ତୁ ଅଲଗା ଅଲଗା ଦେବେ। ଏହାକୁ ସଂଗ୍ରହ କରାଯିବା ପରେ ବର୍ଜ୍ୟବସ୍ତୁର ବିଭିନ୍ନ ପ୍ରକ୍ରିୟାକରଣ କରାଯିବ।

ସେହିପରି ରାସ୍ତାଘାଟରେ ଅଳିଆ ଆବର୍ଜ୍ଜନା ପକାଇଲେ ଜରିମାନା ବ୍ୟବସ୍ଥା ମଧ୍ୟ କରାଯିବ। ପୁରୀ ପୌର କାର୍ଯ୍ୟନିର୍ବାହୀ ଅଧିକାରୀ ଅଭିମନ୍ୟୁ ବେହେରା ଇନ୍ଦୋର ଏବଂ ଭୋପାଳ ଗସ୍ତରେ ଯାଇ ସେଠାକାର ପରିମଳ ବ୍ୟବସ୍ଥା ପରିଚାଳନା କିଭଳି ହେଉଛି ତାହାର ଅନୁଧ୍ୟାନ କରି ଆସିଛନ୍ତି। ଯାହାକି ଏହାକୁ ପୁରୀ ପୌରପାଳିକାରେ ଲାଗୁ କରାଯିବ। ସେପଟେ ପୂର୍ବତନ ଅତିରିକ୍ତ ଶାସନ ସଚିବ କହିଛନ୍ତି ପୁରୀରେ ସ୍ବଚ୍ଛତା ନିହାତି ଜରୁରୀ ରହିଛି। ପ୍ରତ୍ୟେକ ଦିନ ଏଠାକୁ ଦେଶ ବିଦେଶରୁ ପର୍ଯ୍ୟଟକ ଆସୁଥିବା ବେଳେ ସହରର ସ୍ବଚ୍ଛତାକୁ ନେଇ ଠିକ୍ ଭାବରେ ଧ୍ୟାନ ଦିଆଯାଉନାହିଁ। ଏଣୁ ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ହେଲେ ପ୍ରଥମେ ସ୍ବଚ୍ଛତାର ନିହାତି ଆବଶ୍ୟକ ରହିଛି।

ସେହିପରି ପର୍ଯ୍ୟଟନ ସହର ପୁରୀର ବିଭିନ୍ନ ବିକାଶମୂଳକ କାର୍ଯ୍ୟ ମଧ୍ୟ ଜାପାନୀ ଜ୍ଞାନକୌଶଳରେ କରାଯିବ। ଜାପାନର ତୋତରି ପ୍ରଦେଶର ଏକ ସରକାରୀ ପ୍ରତିନିଧି ଦଳ ପୁରୀ ଗସ୍ତରେ ଆସି ଜିଲ୍ଲା ପ୍ରଶାସନ ସହିତ ଆଲୋଚନା କରିଛନ୍ତି। ପୁରୀ ବେଳାଭୂମିର ଉନ୍ନତିକରଣ ଓ ବିକାଶ ସହିତ ଅତ୍ୟାଧୁନିକ ଶୌଚାଳୟ, ଡ୍ରେନ୍ ନିର୍ମାଣ, ପାନୀୟ ଜଳ ଯୋଗାଣ ଏବଂ ବିଭିନ୍ନ ବିକାଶମୂଳକ କାର୍ଯ୍ୟ ଜାପାନୀ ଜ୍ଞାନକୌଶଳରେ କରାଯିବା ନେଇ ଆଲୋଚନା ହୋଇଛି। ତେବେ ଏହି ଆଲୋଚନା ପ୍ରାଥମିକ ସ୍ତରରେ ଥିବାବେଳେ ଜାପାନ ପ୍ରତିନିଧି ମଣ୍ଡଳୀଙ୍କ ଠାରୁ ଚୂଡ଼ାନ୍ତ ନିଷ୍ପତ୍ତି ଆସିବା ପରେ ପୁରୀ ସହରରେ ତାହା କାର୍ଯ୍ୟକାରୀ କରାଯିବ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାପାନ ଗସ୍ତରେ ଯାଇଥିବା ବେଳେ ଭାରତର ପ୍ରସିଦ୍ଧ ପର୍ଯ୍ୟଟନସ୍ଥଳୀ ଗୁଡ଼ିକର ବିକାଶ ପାଇଁ ଜାପାନ ସରକାରଙ୍କ ସହ ଆଲୋଚନା କରିଥିଲେ। ଏଣୁ ଜାପାନ ତୋତରୀରୁ ଏକ ପ୍ରତିନିଧି ମଣ୍ଡଳୀ ଆସି ପୁରୀ ଜିଲ୍ଲା ପ୍ରଶାସନ ସହିତ ଆଲୋଚନା କରି ଏକ ଚୂଡ଼ାନ୍ତ ରିପୋର୍ଟ ପ୍ରସ୍ତୁତ କରି ଦେବେ ବୋଲି ଇଣ୍ଡିଆ ଜାପାନ ଫ୍ରେଣ୍ଡସିପ୍ ସେଣ୍ଟରର ସଭାପତି ଶ୍ରୀମନ୍ତ ଦାଶ ମତ ରଖିଛନ୍ତି। ସେହିପରି ପୁରୀ ଜିଲ୍ଲାପାଳ କହିଛନ୍ତି ପୁରୀ ସହରର ବିକାଶ ସହିତ ନୂଆ ଜ୍ଞାନକୌଶଳ ଦ୍ବାରା ଅତ୍ୟାଧୁନିକ ବ୍ୟବସ୍ଥା କରିବା ପାଇଁ ଜାପାନୀ ପ୍ରତିନିଧି ଦଳ ସହିତ ଆଲୋଚନା ହୋଇଛି।

ପୁରୀ ସହରକୁ ଏକ ବିଶ୍ବସ୍ତରୀୟ ପର୍ଯ୍ୟଟନ ସ୍ଥଳୀ ଭାବରେ ପରିଗଣିତ କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କର ଲକ୍ଷ୍ୟ ରହିଛି। ଏଣୁ ପୁରୀ ସହରର ସର୍ବାଙ୍ଗିନ ବିକାଶ ପାଇଁ ସମସ୍ତ ପ୍ରକାର ପଦକ୍ଷେପ ଗ୍ରହଣ କରାଯାଉଛି। ଯାହାକୁ ପୁରୀ ସହରବାସୀ ଏବଂ ବୁଦ୍ଧିଜୀବୀ ସ୍ବାଗତ କରିଛନ୍ତି।