ତୈଳ ରପ୍ତାନି ଉପରେ ରୋକ୍ ଲଗାଇଲା ରୁଷ; ୟୁକ୍ରେନ ସହିତ ଯୁଦ୍ଧ ମଧ୍ୟରେ କାହିଁକି ଏଭଳି ନିଷ୍ପତ୍ତି ନେଲେ ପୁଟିନ

ନୂଆଦିଲ୍ଲୀ: ରୁଷର ପମ୍ପିଂ ଷ୍ଟେସନ ଏବଂ ଇନ୍ଧନ ଟ୍ରେନକୁ ଟାର୍ଗେଟ କରିଛି ୟୁକ୍ରେନୀୟ ସେନା। ଏହାକୁ ନେଇ ବଡ଼ ନିଷ୍ପତ୍ତି ନେଇଛି କ୍ରେମଲିନ୍‌। ରୁଷ ଏହି ବର୍ଷ ଶେଷ ପର୍ଯ୍ୟନ୍ତ ଇନ୍ଧନ ରପ୍ତାନି ଉପରେ ପ୍ରତିବନ୍ଧକ ଲଗାଇଛି। ୟୁକ୍ରେନୀୟ ଡ୍ରୋନ ଆକ୍ରମଣ ଯୋଗୁଁ ଦେଶବ୍ୟାପୀ ପମ୍ପଗୁଡ଼ିକରେ ଗ୍ୟାସ ଯୋଗାଣ କ୍ରମାଗତ ଭାବରେ ହ୍ରାସ ପାଉଛି।

ୟୁକ୍ରେନୀୟ ବାୟୁସେନା ଇନ୍ଧନ ଯୋଗାଣକୁ ବାଧା ଦେବା ପାଇଁ ରୁଷୀୟ ରିଫାଇନାରୀ, ପମ୍ପିଂ ଷ୍ଟେସନ ଏବଂ ଇନ୍ଧନ ଟ୍ରେନ ଉପରେ ଡ୍ରୋନ ଆକ୍ରମଣକୁ ତୀବ୍ର କରିଛି। ସମର୍‌ ସିଜିନରେ ଇନ୍ଧନ ଚାହିଦା ବୃଦ୍ଧି ପାଏ। ଯଦିଓ ରୁଷୀୟ ଅଧିକାରୀମାନେ ପ୍ରାରମ୍ଭରେ ଏହି ଅଭାବକୁ ଲଜିଷ୍ଟିକ୍ କାରଣ ବୋଲି କହିଥିଲେ। ପେଟ୍ରୋଲ ଏବଂ ଡିଜେଲର ଯୋଗାଣ ପୁଣି ଆରମ୍ଭ ହେବା ନେଇ ପ୍ରତିଶ୍ରୁତି ଦେଇଥିଲେ। କିନ୍ତୁ ଗତ କିଛି ସପ୍ତାହରେ ଏହି ଅଭାବ ଆହୁରି ଖରାପ ହୋଇଛି।

ଏହି ସପ୍ତାହରେ ଗ୍ୟାଜପ୍ରମ୍ ଦ୍ୱାରା ପରିଚାଳିତ ଦକ୍ଷିଣ ରୁଷର ବାଶକୋର୍ଟୋସ୍ତାନରେ ଏକ ପ୍ରମୁଖ ତୈଳ ବିଶୋଧନାଗାର ସମେତ ଅନେକ ରୁଷୀୟ ରିଫାଇନାରୀ ଏବଂ ପମ୍ପିଂ ଷ୍ଟେସନ ଉପରେ ୟୁକ୍ରେନୀୟ ବାୟୁସେନା ଆକ୍ରମଣ କରିଥିବା ରିପୋର୍ଟ କରିଛି। ପେଟ୍ରୋଲ ଅଭାବ ମୁକାବିଲା କରିବା ପାଇଁ କ୍ରେମଲିନର ଏହି ପ୍ରୟାସ। ମସ୍କୋ ପ୍ରଥମେ ମାର୍ଚ୍ଚ ମାସରେ କିଛି ପେଟ୍ରୋଲ ରପ୍ତାନି ନିଷେଧ କରିଥିଲା, ତାପରେ ଜୁଲାଇରେ ଏହାକୁ ଆହୁରି ବୃଦ୍ଧି କରିଥିଲା।

ରୁଷିଆନ୍ ସରକାରୀ ସମାଚାର ଏଜେନ୍ସି TASS ଅନୁଯାୟୀ, ନୋଭାକ ପେଟ୍ରୋଲିୟମ୍ ଉତ୍ପାଦର ସାମାନ୍ୟ ଅଭାବକୁ ସ୍ୱୀକାର କରିଛନ୍ତି, କିନ୍ତୁ କହିଛନ୍ତି ଯେ ଏହା ରିଜର୍ଭରୁ ପୂରଣ କରାଯାଉଛି। ରୁଷିଆ ବିଶ୍ୱର ସବୁଠାରୁ ବଡ଼ ଡିଜେଲ ଉତ୍ପାଦକମାନଙ୍କ ମଧ୍ୟରୁ ଗୋଟିଏ, ଏବଂ ଏହାର ରପ୍ତାନି ସରକାରୀ ରାଜସ୍ୱର ଏକ ପ୍ରମୁଖ ଉତ୍ସ। ଏହି ରିଫାଇନାରୀଗୁଡ଼ିକ ଉପରେ ଆକ୍ରମଣ ରୁଷକୁ ଆର୍ଥିକ ଦୃଷ୍ଟିରୁ ଦୁର୍ବଳ କରିପାରେ।