ଗାଜା ପାଇଁ ଟ୍ରମ୍ପଙ୍କ ‘ବୋର୍ଡ ଅଫ ପିସ୍’କୁ ଚୀନ୍ ର ଝଟକା, ନିମନ୍ତ୍ରଣ ପ୍ରତ୍ୟାଖ୍ୟାନ କଲେ ଜିନପିଙ୍ଗ

ନୂଆଦିଲ୍ଲୀ ୨୧।୧: ଗାଜାରେ ଶାନ୍ତି ସ୍ଥାପନା କରିବା ଉଦ୍ୟମ ମଧ୍ୟରେ ଆମେରିକାକୁ ଚୀନ୍ ବଡ଼ କୂଟନୈତିକ ଝଟକା ଦେଇଛି। ୨୧ ଜାନୁୟାରୀ ବୁଧବାର ଚୀନ୍ ସ୍ପଷ୍ଟ କରିଦେଇଛି ଯେ ସେ ଡୋନାଲ୍ଡ ଟ୍ରମ୍ପଙ୍କ ମହତ୍ୱାକାଙକ୍ଷୀ ‘ବୋର୍ଡ ଅଫ ପିସ୍’ରେ ସାମିଲ ହେବ ନାହିଁ। ବେଜିଂର ଏହି ନିଷ୍ପତ୍ତି ଏକ ଏପରି ସମୟରେ ଆସିଛି ଯେତେବେଳେ ଟ୍ରମ୍ପ ସ୍ୱିଜରଲ୍ୟାଣ୍ଡର ଦାଭୋସରେ ଅନୁଷ୍ଠିତ ହେଉଥିବା ବୈଶ୍ୱିକ ଆର୍ଥିକ ମଞ୍ଚ (ଡବ୍ଲୁଇଏଫ)ରେ ଏହି ବୋର୍ଡକୁ ଔପଚାରିକ ରୂପ ଦେବା ପାଇଁ ପ୍ରସ୍ତୁତି କରୁଛନ୍ତି।

ଚୀନ୍ ବୈଦେଶିକ ମନ୍ତ୍ରାଳୟ ମୁଖପାତ୍ର ଗୁଓ ଜିୟାକୁନଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି କହିଛନ୍ତି ଯେ ଚୀନ୍ ସର୍ବଦା ସତ୍ୟ ବହୁପକ୍ଷବାଦର ସମର୍ଥକ ରହି ଆସିଛି ଓ ମିଳିତ ଜାତିସଂଘ (ୟୁଏନ)କୁ କେନ୍ଦ୍ରରେ ରଖୁଥିବା ଅନ୍ତର୍ଜାତୀୟ ବ୍ୟବସ୍ଥାର ସଂରକ୍ଷକ ଥିବ। ତେବେ ବୋର୍ଡ ଅଫ ପିସ୍ କୁ ନେଇ ଚୀନ୍ ଅସନ୍ତୋଷର କାରଣ ଟ୍ରମ୍ପଙ୍କ ସେହି ବୟାନ ଯେଉଁଥିରେ ସେ ସଂକେତ ଦେଇଥିଲେ ଯେ ବୋର୍ଡ ଅଫ ପିସ୍ ଭବିଷ୍ୟତରେ ୟୁଏନର ସ୍ଥାନ ନେଇପାରେ।

ଏଣୁ ବେଜିଂ ନିଜର କଡ଼ା ଆଭିମୁଖ୍ୟ ପୋଷଣ କରି କହିଛି ଯଦି ଏହି ବୋର୍ଡ ୟୁଏନର ସଂରକ୍ଷଣ ଓ ଏହାର ଚାର୍ଟର ସିଦ୍ଧାନ୍ତ ଅନୁରୂପ ନୁହେଁ ତେବେ ଏହା ଆମ ଲାଗି କୌଣସି କାମର ନୁହେଁ। ତେବେ ଗାଜାରେ ଇସ୍ରାଏଲ-ହମାସ ଯୁଦ୍ଧ ଉପରେ ନଜର ରଖିବାକୁ ସାରା ବିଶ୍ୱରୁ ଏବେ ମିଶ୍ରିତ ପ୍ରତିକ୍ରିୟା ଆସିବାରେ ଲାଗିଛି। ରିପୋର୍ଟ ଅନୁସାରେ ଏ ପର୍ଯ୍ୟନ୍ତ ୧୦ରୁ କମ୍ ବୈଶ୍ୱିକ ନେତା ଏଥିରେ ସାମିଲ ହେବାକୁ ନିମନ୍ତ୍ରଣ ସ୍ୱୀକାର କରିଛନ୍ତି। ଅନେକ ପ୍ରମୁଖ ୟୁରୋପୀୟ ଦେଶ ହୁଏତ ଏଥିରେ ସାମିଲ ହେବାକୁ ମନା କରିଛନ୍ତି ନଚେତ ଏ ପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇ ନାହାନ୍ତି।

ଟ୍ରମ୍ପ ପ୍ରଶାସନ ଦ୍ୱାରା ପ୍ରସ୍ତାବିତ ଏହି ନୂଆ ବ୍ୟବସ୍ଥାକୁ ବୈଶ୍ୱିକ ରାଜନୀତିରେ ଅରାଜକତା ଭାବେ ଦେଖା ଯାଉଛି। ଚୀନ୍ ର କହିବା କଥା ହେଉଛି ଅନ୍ତର୍ଜାତୀୟ ସ୍ଥିତି ଯେତେବି ବଦଳୁ ନା କାହିଁକି ୟୁଏନ ଚାର୍ଟର ଓ ଅନ୍ତର୍ଜାତୀୟ ଆଇନ ସମ୍ପର୍କର ମୂଳ ମାନଦଣ୍ଡ ହେବା ଦରକାର। ତେବେ ଚୀନ୍ ର ଏପରି ଅସ୍ୱୀକାର ଟ୍ରମ୍ପଙ୍କ ସେହି ‘ସାଇନିଂ ସେରିମନି’ ଉପରେ ପ୍ରଶ୍ନ ଚିହ୍ନ ଲଗାଇଛି ଯାହାକୁ ସେ ଦାଭୋସରେ ଭବ୍ୟ ରୂପେ ଆୟୋଜନ କରିବାକୁ ଚାହୁଁଥିଲେ।