ନମାଜ ପାଠ ବେଳେ ଭୁଶୁଡିଲା ଇସଲାମିକ୍ ସ୍କୁଲ କୋଠା, ମାଟି ତଳେ ଦବିଗଲେ ଛାତ୍ର

ନୂଆଦିଲ୍ଲୀ ୩୦/୦୯: ଇଣ୍ଡୋନେସିଆ ବଡ ଅଘଟଣ । ନମାଜ ପାଠ ବେଳେ ଭୁଶୁଡିଲା ଇସଲାମିକ୍ ସ୍କୁଲ କୋଠା । ଫଳରେ ମାଟି ତଳେ ଦବି ରହିଛନ୍ତି ୬୦ ରୁ ଅଧିକ ଛାତ୍ର । ଏପି ରିପୋର୍ଟ ଅନୁଯାୟୀ ଭଗ୍ନାବଶେଷ ତଳେ ଅତି କମରେ ୬୫ ଜଣ ଛାତ୍ର ଫସି ରହିଥିବା ଆଶଙ୍କା କରାଯାଉଛି । ଅଧିକାରୀମାନେ କହିଛନ୍ତି ଯେ ନିର୍ମାଣାଧୀନ କୋଠାଟି ସୋମବାର ଦିନ ପ୍ରାର୍ଥନା କରୁଥିବା ଡଜନ ଡଜନ ଛାତ୍ରଙ୍କ ଉପରେ ଭୁଶୁଡ଼ି ପଡ଼ିଥିଲା । ଯେଉଁଥିରେ ଜଣେ ଛାତ୍ରଙ୍କର ମୃତ୍ୟୁ ହୋଇଥିଲା । ଡଜନ ଡଜନ ଆହତ ହୋଇଥିଲେ ।  ଅନେକ ମାଟି ତଳେ ପୋତି ହୋଇଥିଲେ । ଅଧିକାଂଶ ଛାତ୍ରଙ୍କ ବୟସ ୧୨ରୁ ୧୭ ବର୍ଷ ମଧ୍ୟରେ ହେବ ।
କୋଠା ଭୁଶୁଡ଼ିବା ଫଳରେ ଅଞ୍ଚଳରେ ଆତଙ୍କ ଖେଳିଗଲା । ଅଭିଭାବକ ଏବଂ ସମ୍ପର୍କୀୟମାନେ ସ୍କୁଲ କ୍ୟାମ୍ପସ ଓ ହସ୍ପିଟାଲରେ ଏକାଠି ହୋଇ ସେମାନଙ୍କ ପିଲାମାନଙ୍କ ସୁରକ୍ଷିତ ଫେରିବା ପାଇଁ ପ୍ରାର୍ଥନା କରିଥିଲେ। କମାଣ୍ଡ ପୋଷ୍ଟରେ ଥିବା ଏକ ନୋଟିସ ବୋର୍ଡ ଅନୁଯାୟୀ, ୬୫ ଜଣ ଛାତ୍ର ଏବେ ବି ନିଖୋଜ ଅଛନ୍ତି । ନିଖୋଜ ତାଲିକାରେ ସେମାନଙ୍କ ପିଲାର ନାମ ଦେଖି ଅନେକ ଅଭିଭାବକ ଦୁଃଖରେ ଭାଙ୍ଗି ପଡିଛନ୍ତି । 

ପୋଲିସ ଓ ଉଦ୍ଧାରକାରୀ ଦଳ ରାତିସାରା କାର୍ଯ୍ୟ କରୁଛନ୍ତି । ଏପର୍ଯ୍ୟନ୍ତ ଆଠ ଜଣ ଆହତ ଛାତ୍ରଙ୍କୁ ବାହାର କରାଯାଇଛି । ଭଗ୍ନାବଶେଷ ତଳେ ଅନେକ ଫସି ରହିଥିବା ଛାତ୍ରମାନଙ୍କୁ ଅକ୍ସିଜେନ ସିଲିଣ୍ଡର ଏବଂ ପାଣି ବୋତଲ ପହଞ୍ଚାଇବା ପାଇଁ କାମ କରୁଛନ୍ତି । ଯାହାଦ୍ୱାରା ସେମାନେ ବଞ୍ଚିବାର ଆଶା ବଢିଛି । ତଥାପି, ଉଦ୍ଧାର କାର୍ଯ୍ୟ ଅତ୍ୟନ୍ତ ଚ୍ୟାଲେଞ୍ଜିଂ କାରଣ ଭୁଶୁଡ଼ି ପଡ଼ିଥିବା କୋଠାର ଭାରୀ କଂକ୍ରିଟ୍ ସ୍ଲାବ୍ ଯେକୌଣସି ସମୟରେ ଭୁଶୁଡ଼ି ପଡ଼ିପାରେ ।

ଏହି କାରଣରୁ ଭାରୀ ଯନ୍ତ୍ରପାତି ବ୍ୟବହାର ସୀମିତ କରାଯାଇଛି । ଆମେ ଯନ୍ତ୍ରପାତି ବ୍ୟବହାର କରିବାକୁ ସଂକୋଚ କରୁଛୁ । କାରଣ ଏହା ଆହୁରି ଭୁଶୁଡ଼ି ପଡ଼ିପାରେ । ଛାତ୍ରମାନଙ୍କ ଜୀବନକୁ ବିପଦରେ ପକାଇପାରେ," ସନ୍ଧାନ ଏବଂ ଉଦ୍ଧାର ଅଧିକାରୀ ନାନାଙ୍ଗ ସିଗିତ କହିଛନ୍ତି।