ପ୍ରତିଷ୍ଠା ଦିବସରେ ନବୀନଙ୍କ ବାର୍ତ୍ତା : ବିଜୁ ବାବୁଙ୍କ ଆଦର୍ଶ ଏବଂ ଲକ୍ଷ ଲକ୍ଷ କର୍ମୀଙ୍କ ସମର୍ପଣରେ ବିଜେଡି ଦେଶର ଶ୍ରେଷ୍ଠ ଆଞ୍ଚଳିକ ଦଳ

ଭୁବନେଶ୍ବର ୨୬।୧୨: ବିଜୁ ଜନତା ଦଳ ପାଳୁଛି ୨୯ତମ ପ୍ରତିଷ୍ଠା ଦିବସ । ବିଜେଡି ପ୍ରତିଷ୍ଠା ଦିବସ ଆୟୋଜନ ଭିତରେ ବେଶ୍ ଉତ୍ସାହିତ ଦଳର ଅନେକ ନେତା ଓ ତୃଣମୂଳ ସ୍ତରର କର୍ମୀ । ପ୍ରତିଷ୍ଠା ଦିବସ ପାଇଁ ସଜେଇ ହୋଇଛି ଶଙ୍ଖ ଭବନ । ପ୍ରତିଷ୍ଠା ଦିବସ ଉତ୍ସବରେ ସାମିଲ ହେବେ ସୁପ୍ରିମୋ ନବୀନ ପଟ୍ଟନାୟକ ।

ଏହି ଅବସରରେ ନେତା ଓ କର୍ମୀଙ୍କୁ ବାର୍ତ୍ତା ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ‘ଏକ୍ସ’ ପୋଷ୍ଟରେ ନବୀନ ଲେଖିଛନ୍ତି, ଲୋକଙ୍କ ସ୍ୱର ହୋଇ ବିଜୁ ଜନତା ଦଳ ସାଜିଛି ଓଡ଼ିଶାର ବଳ । ଓଡ଼ିଶାର ବିକାଶରେ ବିଜୁ ଜନତା ଦଳ ସର୍ବଦା ଅଟଳ। ବିଜୁ ବାବୁଙ୍କ ଆଦର୍ଶ ଏବଂ ଲକ୍ଷ ଲକ୍ଷ କର୍ମୀଙ୍କ ସମର୍ପଣରେ ବିଜୁ ଜନତା ଦଳ ଦେଶର ଶ୍ରେଷ୍ଠ ଆଞ୍ଚଳିକ ଦଳ ହୋଇଛି । ଦଳର ଗୌରବମୟ ୨୯ତମ ପ୍ରତିଷ୍ଠା ଦିବସ ଅବସରରେ ଆସନ୍ତୁ ସମସ୍ତେ ସେବା, ସ୍ୱାଭିମାନ ଓ ସଂଗ୍ରାମର ମନ୍ତ୍ରରେ ସଂକଳ୍ପବଦ୍ଧ ହୋଇ ଆଗକୁ ବଢ଼ିବା ।

ଲୋକଙ୍କ ସ୍ୱର ହୋଇ ବିଜୁ ଜନତା ଦଳ ସାଜିଛି ଓଡ଼ିଶାର ବଳ। ଓଡ଼ିଶାର ବିକାଶରେ ବିଜୁ ଜନତା ଦଳ ସର୍ବଦା ଅଟଳ। ବିଜୁ ବାବୁଙ୍କ ଆଦର୍ଶ ଏବଂ ଲକ୍ଷ ଲକ୍ଷ କର୍ମୀଙ୍କ ସମର୍ପଣରେ ବିଜୁ ଜନତା ଦଳ ଦେଶର ଶ୍ରେଷ୍ଠ ଆଞ୍ଚଳିକ ଦଳ ହୋଇଛି। ଦଳର ଗୌରବମୟ ୨୯ତମ ପ୍ରତିଷ୍ଠା ଦିବସ ଅବସରରେ ଆସନ୍ତୁ ସମସ୍ତେ ସେବା, ସ୍ୱାଭିମାନ ଓ ସଂଗ୍ରାମର ମନ୍ତ୍ରରେ… pic.twitter.com/6SUUoeOhkx

— Naveen Patnaik (@Naveen_Odisha) December 26, 2025

୨୮ ବର୍ଷର ଲମ୍ବା ଯାତ୍ରା ଭିତରେ ବିଜେଡି ବର୍ତ୍ତମାନ ସବୁଠାରୁ କଠିନ ସ୍ଥିତି ଦେଇ ଗତି କରୁଛି । ୨୪ ବର୍ଷ କାଳ ନିରନ୍ତର ମୁଖ୍ୟମନ୍ତ୍ରୀ ପଦରେ ଥିବା ବିଜେଡି ସଭାପତି ନବୀନ ପଟ୍ଟନାୟକ ମଧ୍ୟ ନିଜ ରାଜନୈତିକ ଜୀବନ ଯାତ୍ରା ଭିତରେ ସବୁଠୁ ସଂଘର୍ଷପୂର୍ଣ୍ଣ ଓ ଆହ୍ୱାନପୂର୍ଣ୍ଣ ସ୍ଥିତିର ମୁକାବିଲା କରୁଛନ୍ତି । ଏମିତି ସ୍ଥିତିରେ ନବୀନ କେମିତି କର୍ମୀଙ୍କୁ ଉତ୍ସାହିତ କରିବେ ? କି ମନ୍ତ୍ର ଦେବେ ନବୀନ ? ନବୀନଙ୍କ ଉତ୍ତରାଧିକାରୀକୁ ନେଇ ଦଳ ଭିତରେ ଓ ବାହାରେ ଅନେକ ଚର୍ଚ୍ଚା ଚାଲିଛି । ଏ ସମସ୍ତ ଚର୍ଚ୍ଚାକୁ ଡେଇଁ ନବୀନ କିଭଳି ଦଳକୁ ନୂଆ ଦିଗଦର୍ଶନ ଦେବେ, ତାହା ଆଜିର ଭାଷଣରୁ ଜଣାପଡ଼ିବ । ବିଭିନ୍ନ ଚର୍ଚ୍ଚାରେ କେତେ ସତ ଓ କେତେ ଗୁଜବ, ଆଜି ତାହା ନବୀନ ସ୍ପଷ୍ଟ କରିବେ । ନିରାଶା ଭିତରୁ ବାହାରି ନବୀନ ସରକାର ବିରୋଧରେ କେଉଁ ସବୁ ପ୍ରସଙ୍ଗକୁ ଅସ୍ତ୍ର କରିବେ ? ନବୀନଙ୍କ ଭାଷଣକୁ ଲକ୍ଷ ଲକ୍ଷ ବିଜେଡି କର୍ମୀ ଅନେଇ ରହିଛନ୍ତି ।