ନୂଆଦିଲ୍ଲୀ : ଭାରତ ଖୁବଶୀଘ୍ର 113 GE-404 ଇଞ୍ଜିନ୍ ଯୋଗାଣ ପାଇଁ ଆମେରିକୀୟ କମ୍ପାନୀ ଜେନେରାଲ ଇଲେକ୍ଟ୍ରିକ୍ (GE) ସହିତ ପ୍ରାୟ ୮୩୦୦ କୋଟି ଟଙ୍କାର ଏକ ଚୁକ୍ତି ସ୍ୱାକ୍ଷର କରିବାକୁ ଯାଉଛି। ଏଥିପାଇଁ ଆଲୋଚନା ଚାଲିଛି ଏବଂ ଏହା ସେପ୍ଟେମ୍ବର ସୁଦ୍ଧା ଚୂଡ଼ାନ୍ତ ହେବାର ଆଶା କରାଯାଉଛି। ଏହି ଚୁକ୍ତି ଏପରି ସମୟରେ ହେବାକୁ ଯାଉଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ 50 ପ୍ରତିଶତ ଶୁଳ୍କ ଲାଗୁ କରିଛନ୍ତି।
ଏହି ଚୁକ୍ତି ଅନୁଯାୟୀ, ଭାରତୀୟ ବାୟୁସେନାର ସ୍ୱଦେଶୀ ଲାଇଟ୍ କମ୍ବାଟ୍ ଏୟାରକ୍ରାଫ୍ଟ (ଏଲସିଏ) ତେଜସ୍ ମାର୍କ ୧ଏ ଯୁଦ୍ଧବିମାନକୁ ଶକ୍ତି ଯୋଗାଇବା ପାଇଁ ଆମେରିକୀୟ କମ୍ପାନୀ ଜେନେରାଲ୍ ଇଲେକ୍ଟ୍ରିକ୍ (ଜିଇ) ଠାରୁ ୧୧୩ଟି ଜିଇ-ଏଫ୪୦୪ ଇଞ୍ଜିନ୍ କିଣିବାକୁ ଯୋଜନା କରୁଛି। ଏହି ଚୁକ୍ତିର ମୂଲ୍ୟ ପ୍ରାୟ ୧ ବିଲିୟନ ଡଲାର (ପ୍ରାୟ ୮,୪୦୦ କୋଟି ଟଙ୍କା) ହେବ ବୋଲି ଜଣାପଡ଼ିଛି। ଏହା ପୂର୍ବରୁ ହିନ୍ଦୁସ୍ତାନ ଏୟାରୋନଟିକ୍ସ ଲିମିଟେଡ୍ (ଏଚଏଏଲ) ୮୩ଟି ତେଜସ୍ ମାର୍କ ୧ଏ ଯୁଦ୍ଧବିମାନ ପାଇଁ ୯୯ଟି ଜିଇ-ଏଫ୪୦୪ ଇଞ୍ଜିନ୍ କିଣିବା ପାଇଁ ଜିଇ ସହିତ ଏକ ଚୁକ୍ତି ସ୍ୱାକ୍ଷର କରିସାରିଛି।
ନୂଆ ଅର୍ଡର ଅନୁଯାୟୀ, ଅତିରିକ୍ତ ୯୭ଟି ତେଜସ୍ ମାର୍କ ୧ଏ ଯୁଦ୍ଧବିମାନ ପାଇଁ ୧୧୩ଟି ଇଞ୍ଜିନ୍ ଯୋଗାଇ ଦିଆଯିବ, ଯାହା ଏଚଏଏଲର ମୋଟ ୨୧୨ଟି ଜିଇ-ଏଫ୪୦୪ ଇଞ୍ଜିନ୍ ଆବଶ୍ୟକତାକୁ ପୂରଣ କରିବ। ଏହି ଚୁକ୍ତି ସେପ୍ଟେମ୍ବର ମାସ ସୁଦ୍ଧା ଚୂଡ଼ାନ୍ତ ହେବାର ସମ୍ଭାବନା ରହିଛି। ଜିଇ ପ୍ରତି ମାସରେ ଦୁଇଟି ଇଞ୍ଜିନ୍ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛି, ଯାହା ଏଚଏଏଲକୁ ଉତ୍ପାଦନ କାର୍ଯ୍ୟକୁ ତ୍ୱରାନ୍ୱିତ କରିବାରେ ସହାୟକ ହେବ। ଏଚଏଏଲ ପ୍ରଥମ ୮୩ଟି ତେଜସ୍ ମାର୍କ ୧ଏ ଯୁଦ୍ଧବିମାନ ୨୦୨୯-୩୦ ସୁଦ୍ଧା ଏବଂ ପରବର୍ତୀ ୯୭ଟି ୨୦୩୩-୩୪ ସୁଦ୍ଧା ଯୋଗାଇ ଦେବାକୁ ଯୋଜନା କରିଛି। ଏହି ଚୁକ୍ତି ଭାରତର ‘ଆତ୍ମନିର୍ଭର ଭାରତ’ ଏବଂ ‘ମେକ୍ ଇନ୍ ଇଣ୍ଡିଆ’ ଉଦ୍ୟମକୁ ଆହୁରି ଶକ୍ତିଶାଳୀ କରିବ। ଏହା ସ୍ୱଦେଶୀ ଯୁଦ୍ଧବିମାନ ଉତ୍ପାଦନକୁ ବୃଦ୍ଧି କରିବା ସହିତ ଦେଶର ଛୋଟ ଏବଂ ମଧ୍ୟମ ଉଦ୍ୟୋଗଗୁଡ଼ିକୁ ପ୍ରତିରକ୍ଷା କ୍ଷେତ୍ରରେ ନୂଆ ସୁଯୋଗ ପ୍ରଦାନ କରିବ। ଏହା ଭାରତୀୟ ବାୟୁସେନାର ପୁରୁଣା ମିଗ-୨୧ ଯୁଦ୍ଧବିମାନକୁ ବଦଳାଇବାରେ ମଧ୍ୟ ସହାୟକ ହେବ, ଯାହା ଆଗାମୀ ସପ୍ତାହରେ ସେବାରୁ ବିଦାୟ ନେବାକୁ ଯାଉଛି।
ଏହା ସହିତ, ଭାରତ ଏବଂ ଜିଇ ମଧ୍ୟରେ ଏଲସିଏ ମାର୍କ ୨ ଏବଂ ଆଡଭାନ୍ସଡ୍ ମିଡିୟମ କମ୍ବାଟ୍ ଏୟାରକ୍ରାଫ୍ଟ (ଏଏମସିଏ) ପାଇଁ ୨୦୦ଟି ଜିଇ-ଏଫ୪୧୪ ଇଞ୍ଜିନ୍ କିଣିବା ପାଇଁ ଆଲୋଚନା ଚାଲିଛି, ଯେଉଁଥିରେ ୮୦ ପ୍ରତିଶତ ଟେକ୍ନୋଲୋଜି ଟ୍ରାନ୍ସଫର ଅନ୍ତର୍ଭୁକ୍ତ ରହିଛି। ଏହି ଚୁକ୍ତିର ମୂଲ୍ୟ ପ୍ରାୟ ୧.୫ ବିଲିୟନ ଡଲାର ହେବ ଏବଂ ଆଗାମୀ କିଛି ମାସ ମଧ୍ୟରେ ଏହା ଚୂଡ଼ାନ୍ତ ହେବାର ସମ୍ଭାବନା ରହିଛି। ଏହି ପ୍ରତିରକ୍ଷା ଚୁକ୍ତି ଭାରତର ବାୟୁସେନାର ଆଧୁନିକୀକରଣ ଏବଂ ସ୍ୱଦେଶୀ ଉତ୍ପାଦନ କ୍ଷମତାକୁ ଆହୁରି ମଜବୁତ କରିବାରେ ଏକ ମାଇଲଖୁଣ୍ଟ ସାବ୍ୟସ୍ତ ହେବ।
ଚୁକ୍ତି ଅନୁଯାୟୀ ଆମେରିକୀୟ କମ୍ପାନୀ GE ଏବେ ପ୍ରତି ମାସରେ ଭାରତକୁ ଦୁଇଟି ଇଞ୍ଜିନ୍ ଯୋଗାଇବ। ଟାରିଫ୍ ମାଡ଼ ପରେ ଭାରତ ଏବଂ ଆମେରିକା ମଧ୍ୟରେ ଏହା ଦ୍ୱିତୀୟ ପ୍ରମୁଖ ପ୍ରତିରକ୍ଷା ଚୁକ୍ତି ବୋଲି କୁହାଯାଇଛି। ପ୍ରଥମ ଚୁକ୍ତି 62,000 କୋଟି ଟଙ୍କାର ଥିଲା, ଯାହା ଅଧୀନରେ ଭାରତ 97 LCA ମାର୍କ 1A ଲଢ଼ୁଆ ବିମାନ କିଣିବାକୁ ନିଷ୍ପତ୍ତି ନେଇଥିଲା।
