ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଥିବା ବେଳେ ଦୁଇ ଦେଶର ନୌସେନା ଏବେ ବିପଜ୍ଜନକ ଭାବରେ ନିକଟତର ହୋଇ ସମାନ୍ତରାଳ ସାମରିକ ଅଭ୍ୟାସ କରିବାକୁ ପ୍ରସ୍ତୁତ ହେଉଥିବା ସୂଚନା ମିଳିଛି। ଭାରତୀୟ ନୌସେନା ମେ ୮ ତାରିଖରେ ଆରବ ସାଗରରେ ଏହାର ଅଭ୍ୟାସ ଆରମ୍ଭ କରିଥିଲା, ଏହି ଅଭ୍ୟାସଗୁଡ଼ିକ ମେ ୧୩ ପର୍ଯ୍ୟନ୍ତ ଜାରି ରହିବ।
ଏପଟେ ପାକିସ୍ତାନ ନୌସେନା ମେ ୯ ରୁ ଗ୍ୱାଦରରୁ କରାଚୀ ପର୍ଯ୍ୟନ୍ତ ଏହାର ସମରାଭ୍ୟାସ ଆରମ୍ଭ କରୁଛି। ଏବଂ ମେ ୧୨ ପର୍ଯ୍ୟନ୍ତ ଚାଲିବ ବୋଲି ସୂଚନା ମିଳିଛି। ୪ ଦିନର ଅବଧି ପାଇଁ, ଉଭୟ ନୌସେନା ପ୍ରାୟତଃ ଏକପ୍ରକାର ମୁହାଁମୁହିଁ ହୋଇ ସମରାଭ୍ୟାସ କରିବେ। ସେମାନଙ୍କର ମଧ୍ୟରେ ଅପରେସନାଲ ଦୂରତ୍ୱ ମାତ୍ର ୬୦ କିଲୋମିଟର ରହିବ। ଏତେ ପାଖରୁ ଦୁଇ ଶତ୍ରୁ ରାଷ୍ଟ୍ର ନୌସେନା ସମରାଭ୍ୟାସ କଲେ ସ୍ଥିତି ଉତ୍ତେଜନା ପୂର୍ଣ୍ଣ ହୋଇପାରେ ବୋଲି ପ୍ରତିରକ୍ଷା ବିଶ୍ଳେଷକମାନେ ଚିନ୍ତା ପ୍ରକଟ କରିଛନ୍ତି।
ପଢ଼ନ୍ତୁ- ଭାରତ ପାକିସ୍ତାନ ଯୁଦ୍ଧ ନେଇ ଜେଡି ଭେନ୍ସ କହିଲେ ଏଥିରେ ଆମର ଯାଏଆସେ ନାହିଁ
ଗୁରୁବାର ରାତିରେ ଭାରତ ଓ ପାକିସ୍ତାନ ମଧ୍ୟରେ ଭୟଙ୍କର ଯୁଦ୍ଧ ହୋଇଛି। ପାକିସ୍ତାନ ଭାରତର ବିଭିନ୍ନ ସ୍ଥାନରେ ଆକ୍ରମଣ ଜାରି ରଖିଛି। ଜମ୍ମୁ, ପଞ୍ଜାବ ଏବଂ ରାଜସ୍ଥାନରେ ଭାରତୀୟ ସହରଗୁଡ଼ିକୁ ଟାର୍ଗେଟ କରିଛି ପାକିସ୍ତାନ। ହେଲେ ପଡ଼ୋଶୀର ସବୁ ଆକ୍ରମଣକୁ ଭାରତ ଏୟାର ଡିଫେନ୍ସ ସିଷ୍ଟମ ପଣ୍ଡ କରିଦେଇଛି। ଭାରତ ମଧ୍ୟ ପାକିସ୍ତାନର କଡ଼ା ଜବାବ ଦେଇଛି। ଭାରତ କରାଚୀ ପୋର୍ଟ ଉପରେ ଏୟାରଷ୍ଟ୍ରାଇକ୍ କରିଛି। ଭାରତ ଏକ ପାକିସ୍ତାନୀ AWACS (ଏୟାରବର୍ଣ୍ଣ ୱାର୍ଣ୍ଣିଂ ଆଣ୍ଡ୍ କଣ୍ଟ୍ରୋଲ ସିଷ୍ଟମ୍) ବିମାନକୁ ମଧ୍ୟ ଖସାଇ ଦେଇଛି। ଫଳରେ ପାକିସ୍ତାନର ନିରୀକ୍ଷଣ କ୍ଷମତାକୁ ଏକପ୍ରକାର ପଙ୍ଗୁ କରି ଦେଇଛି।
