ସ୍ୱାମୀ-ସ୍ତ୍ରୀଙ୍କ ଝଗଡ଼ାରେ ‘ଯା, ମରିଯା…’, କହିବା ଅପରାଧ ନା ନୁହେଁ ? ହାଇକୋର୍ଟ ଦେଲେ ବଡ଼ ରାୟ

ନୂଆଦିଲ୍ଲୀ: କେରଳ ହାଇକୋର୍ଟ ଏକ ପାରିବାରିକ ବିବାଦ ଉପରେ ରାୟ ଶୁଣାଇ ବଡ଼ ଟିପ୍ପଣୀ କରିଛନ୍ତି । ଯଦି ସ୍ୱାମୀ-ସ୍ତ୍ରୀ ରାଗରେ ଯା-ମାରି ଯାଅ ପରି ଶବ୍ଦ ବ୍ୟବହାର କରନ୍ତି ତେବେ ତାହା ଆତ୍ମହତ୍ୟା ପାଇଁ ଉସକାଇବା ବୋଲି ଧରାଯିବ ନାହିଁ । କୋର୍ଟ ସ୍ପଷ୍ଟ କରିଛନ୍ତି ଯେ ଭାରତୀୟ ଦଣ୍ଡ ସଂହିତାର ଧାରା ୩୦୬ ଅଧିନରେ ଅପରାଧ ସିଦ୍ଧ କରିବା ପାଇଁ ଅଭିଯୁକ୍ତର ଉଦ୍ଦେଶ୍ୟ ଜାଣିଶୁଣି ଆତ୍ମହତ୍ୟା ପାଇଁ ଉସାଇବାର ଥିଲା ବୋଲି ପ୍ରମାଣିତ କରିବାକୁ ପଡ଼ିବ ।

ଏହି ମାମଲା ଜଣେ ମହିଳା ଏବଂ ତାଙ୍କ ସାନ ଝିଅ ସହିତ ଜଡିତ, ଯେଉଁମାନେ ତାଙ୍କ ସ୍ୱାମୀଙ୍କ ଦ୍ୱାରା ଗାଳି ଖାଇବା ପରେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି ।

ପୂରା ଘଟଣା ଏମିତି

ଅଭିଯୋଗ ଅନୁଯାୟୀ, ମହିଳାଙ୍କ ସ୍ୱାମୀଙ୍କର ଅନ୍ୟ ଜଣେ ବିବାହିତ ମହିଳାଙ୍କ ସହିତ ଅବୈଧ ସମ୍ପର୍କ ଥିଲା । ଯେତେବେଳେ ମୃତ ମହିଳା ଏହା ଜାଣିବାକୁ ପାଇଲେ, ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଅବୈଧ ସମ୍ପର୍କକୁ ନେଇ ଦମ୍ପତିଙ୍କ ମଧ୍ୟରେ ଝଗଡ଼ା ହେବା ପରେ, ସ୍ୱାମୀ ମହିଳାଙ୍କୁ କହିଥିଲେ, "ଏଠାରୁ ଚାଲିଯାଅ ଓ ମରିଯାଅ ।" ତା'ପରେ ମହିଳା ଜଣକ ତାଙ୍କ ସାଢ଼େ ପାଞ୍ଚ ବର୍ଷର ଝିଅ ସହିତ ସେପ୍ଟେମ୍ବର ୧୫, ୨୦୨୩ରେ ଏକ କୂଅରେ ଡେଇଁ ଆତ୍ମହତ୍ୟା କରିଥିଲେ ।

ଏହା ପରେ, କସରଗୋଡର ମେଲପାରମ୍ବା ପୋଲିସ ଷ୍ଟେସନ ମହିଳାଙ୍କ ସ୍ୱାମୀଙ୍କ ବିରୋଧରେ ଏକ ମାମଲା ରୁଜୁ କରିଥିଲା । କସରଗୋଡ ଅତିରିକ୍ତ ଜିଲ୍ଲା ଏବଂ ସେସନ୍ସ କୋର୍ଟ ଅଧୁରଙ୍କ ଦୋଷମୁକ୍ତ ଆବେଦନକୁ ଖାରଜ କରି ତାଙ୍କ ବିରୁଦ୍ଧରେ ଚାର୍ଜସିଟ୍ ଦାଖଲ କରିବାକୁ ନିଷ୍ପତ୍ତି ନେଇଥିଲେ । ମହିଳାଙ୍କ ସ୍ୱାମୀ ଏହା ପରେ ହାଇକୋର୍ଟର ଦ୍ୱାରସ୍ଥ ହୋଇଥିଲେ । ସେ ଯୁକ୍ତି ଦେଇଥିଲେ ଯେ ରାଗରେ ସେହି ଶବ୍ଦ ବ୍ୟବହାର କରିଥିଲେ ଏବଂ ତାଙ୍କ ସ୍ତ୍ରୀଙ୍କୁ ଆତ୍ମହତ୍ୟା ପାଇଁ ଉସୁକାଇବା ପାଇଁ ଏହା ଉଦ୍ଦିଷ୍ଟ ନୁହେଁ ।

ଏହା ଉପରେ ରାୟ ଦେବା ସମୟରେ ହାଇକୋର୍ଟ ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ଉଦ୍ଧୃତ କରିଥିଲେ, ଯେଉଁଥିରେ କୁହାଯାଇଥିଲା ଯେ ଝଗଡା ସମୟରେ ରାଗରେ କୁହାଯାଇଥିବା ଅସାବଧାନ ଶବ୍ଦ ଆତ୍ମହତ୍ୟାକୁ ଉସକାଇବାର ଉଦ୍ଦେଶ୍ୟ ନୁହେଁ । କେରଳ ହାଇକୋର୍ଟ କହିଛନ୍ତି ଯେ ଏହି ମାମଲାରେ, ମୃତକଙ୍କ ଆତ୍ମହତ୍ୟା ପାଇଁ କୌଣସି ଉଦ୍ଦେଶ୍ୟ ନଥାଇ, ଯୁକ୍ତିତର୍କ ସମୟରେ "ଯାଅ ଏବଂ ମର" ଶବ୍ଦଗୁଡ଼ିକ ଉତ୍ତେଜିତ ହୋଇ କୁହାଯାଇଥିଲା ।ତେଣୁ IPC ଧାରା ୩୦୬ ଅନୁଯାୟୀ ଅପରାଧ ନୁହେଁ ।