ଶ୍ରୀନଗର: ଜମ୍ମୁ-କାଶ୍ମୀରର ଲାଇନ୍ ଅଫ୍ କଣ୍ଟ୍ରୋଲରେ ହାଇଆଲର୍ଟ । ରଜୌରୀ, ତଙ୍ଗଧର, ପୁଞ୍ଛ ଆଦି ସେକ୍ଟରରେ ପାକିସ୍ତାନ ସୀମା ପଟୁ ଘନଘନ ଗୁଳିମାଡ଼ । ପାକ୍ ସେନା ସିଜ୍ଫାୟାର ନିୟମ ଉଲ୍ଲଙ୍ଘନ କରି ଗୁଳିଗୋଳା ବର୍ଷଣ କରୁଛି । ଏଥିରେ ଜଣେ ଯବାନ ସହିଦ୍ ହୋଇଥିବା ସୂଚନା ରହିଛି । ସହିଦ ଯବାନ ହେଲେ ପଞ୍ଚମ ପଦାତିକ ରେଜିମେଣ୍ଟର ଲାନ୍ସ ନାଏକ ଦିନେଶ କୁମାର । ଏହାଛଡ଼ା ଭାରତୀୟ ସେନାର ‘ଅପରେସନ ସିନ୍ଦୂର’ ପରଠାରୁ ପାକିସ୍ତାନର ଏହି ଅସ୍ତ୍ରବିରତି ଉଲ୍ଲଙ୍ଘନ ଜାରି ରହିଛି । ଏଥିରେ ସୀମାକୁ ଲାଗି କରିଥିବା ଗାଁ ଗୁଡ଼ିକ ପ୍ରଭାବିତ ହୋଇଛି । ବହୁ ବିଲ୍ଡିଂ ନଷ୍ଟ ହୋଇଥିବା ବେଳେ ଅନେକ କ୍ଷୟକ୍ଷତି ହୋଇଛି । ଆଜି ଗୋଟିଏ ଦିନରେ ପାକ୍ ସେନାର ଗୁଳିମାଡ଼ରେ ୧୨ଜଣ ସାଧାରଣ ଲୋକଙ୍କ ମୃତ୍ୟୁ ହୋଇଥିବା ବେଳେ ୫୦ରୁ ଅଧିକ ଆହତ ହୋଇଛନ୍ତି ।
ପହଲଗାମ ଆତଙ୍କବାଦୀ ଆକ୍ରମଣର ବଦ୍ଲା ନେଇଛି ଭାରତ । ମଙ୍ଗଳବାର ବିଳମ୍ବିତ ରାତିରେ ଭାରତୀୟ ସେନା ‘ଅପରେସନ ସିନ୍ଦୂର’ ମାଧ୍ୟମରେ ଏୟାର ଷ୍ଟ୍ରାଇକ୍ କରିଛି । ପାକିସ୍ତାନ ଓ ପିଓକେର ୯ଟି ଆତଙ୍କବାଦୀ ଆଡ୍ଡା ଉପରେ ସଠିକ୍ ମିସାଇଲ୍ ମାଡ଼ କରିଥିଲା । ଏଥିରେ ଜୈଶ-ଇ-ମହମ୍ମଦ ଓ ଲସ୍କର-ଏ-ତୈବା ୯୦ରୁ ଅଧିକ ଆତଙ୍କବାଦୀ ନିପାତ ହୋଇଛନ୍ତି । ଏନେଇ ଭାରତୀୟ ସେନା ମଧ୍ୟ ପ୍ରେସ୍ ବିବୃତି ମାଧ୍ୟମରେ ସମ୍ପୂର୍ଣ୍ଣ ତଥ୍ୟ ଦେଇଛି । । ‘ଅପରେସନ ସିନ୍ଦୂର’ ପରେ ବିଳିବିଳି ହେଉଛନ୍ତି ପାକିସ୍ତାନ ସରକାର । ପାକ୍ ସେନା ଏଲଓସିରେ ଲଗାତାର ସିଜ୍ଫାୟାର କରି ଭାରତର ସାଧାରଣ ଲୋକଙ୍କୁ ଟାର୍ଗେଟ୍ କରୁଛନ୍ତି ।
