ପାକିସ୍ତାନକୁ ଲଜ୍ଜିତ କଲା ICC, ଟି୨୦ ବିଶ୍ୱକପ୍ ଟିକେଟ୍ ପ୍ରମୋରେ ରଖିଲାନି ପାକ୍ କ୍ୟାପ୍ଟେନଙ୍କ ଫଟୋ

ନୂଆଦିଲ୍ଲୀ, ୧୪/୧୨:ପାକିସ୍ତାନ କ୍ରିକେଟ ବୋର୍ଡକୁ ଲଜ୍ଜା । ଟି୨୦ କ୍ରିକେଟ୍ ବିଶ୍ୱକପ୍ ଟିକେଟଏବଂ ପ୍ରମୋରେ ନାହିଁ ପାକିସ୍ତାନୀ ଅଧିନାୟକଙ୍କ ଫଟୋ । ଆଇସିସି ଜାରି କରିଥିବା ଟିକେଟରେ ନାହିଁ ପାକ୍ ଅଧିନାୟକ ସଲମାନ୍ ଅଲ୍ଲୀ ଆଗାଙ୍କ ଫଟୋ । ଯାହାକୁ ନେଇ ପୁଣି ଅନ୍ତର୍ଜାତୀୟ କ୍ରିକେଟ୍ ମଞ୍ଚରେ ଲଜ୍ଜିତ ହୋଇଛି ପାକ୍ କ୍ରିକେଟ୍ ବୋର୍ଡ । ତେବେ ଆଇସିସିର ଏପରି ପଦକ୍ଷେପକୁ ନେଇ ପିସିବି ଅସନ୍ତୋଷ ମଧ୍ୟ ଜାହିର କରିଛି ।

ରିପୋର୍ଟ ଅନୁସାରେ, ଆଇସିସି ଟି୨୦ ବିଶ୍ୱକପ୍ ପାଇଁ ଟିକେଟ୍ ବିକ୍ରି ଆରମ୍ଭ କରିଛି । ତେବେ ଟିକେଟର ପ୍ରମୋରେ କେବଳ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ, ଦକ୍ଷିଣ ଆଫ୍ରିକାର ଏଡେନ୍ ମାରକ୍ରମ୍, ଅଷ୍ଟ୍ରେଲିଆ ମିଚେଲ୍ ମାର୍ସ, ଶ୍ରୀଲଙ୍କାର ଦାସୁନ ସନକା ଏବଂ ଇଂଲଣ୍ଡର ହ୍ୟାରି ବ୍ରୁକଙ୍କ ଫଟୋ ରହିଛି । କିନ୍ତୁ ପାକ୍ ଅଧିନାୟକଙ୍କ ଫଟୋ ନାହିଁ ।

ପିସିବିର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ପାକିସ୍ତାନ ସହ ଆଇସିସି କିଛି ଠିକ୍ କରୁନାହିଁ । ଏସିଆ କପରେ ମଧ୍ୟ ଏପରି କିଛି ଘଟିଥିଲା । ବିଭିନ୍ନ ବ୍ରଡକାଷ୍ଟର ପାକିସ୍ତାନଅଧିନାୟକ କିମ୍ବା ପତାକାବିନା ପ୍ରମୋ କରିଥିଲେ । ତେବେ ପିସିବି ଏସିଆନ କ୍ରିକେଟ୍ କାଉନସିଲ୍ ସହ କଥା ହେଲା ପରେ ପାକ୍ ଅଧିନାୟକଙ୍କ ଫଚୋ ଏସିଆ କପ୍ ପ୍ରମୋରେ ସାମିଲ ହୋଇଥିଲା ।

ସେ ଆହୁରି କହିଛନ୍ତି ଯେ, ଏବେ ମଧ୍ୟ ସମାନ କିଛି ଘଟିଛି । ଆଇସିସି ଟିକେଟ୍ ବିକ୍ରିର ପ୍ରମୋସନାଲ ଭିଡିଓରେ ସଲମାନ ଅଲ୍ଲୀ ଆଗାଙ୍କୁ ସ୍ଥାନ ଦେଇ ନାହିଁ । ପାକିସ୍ତାନ ଟି୨୦ ରାଙ୍କିରେ ଟପ୍ ୫ ନମ୍ବରରେ ନାହିଁ । କିନ୍ତୁ ଦଳର ଭଲ ଦବଦବା ରହିଛି । ଆଗାମୀ ଦିନରେ ଆଇସିସି ଟିକେଟ୍ ଏବଂ ପ୍ରମୋରେ ପାକିସ୍ତାନ ଅଧିନାୟକଙ୍କୁ ସ୍ଥାନ ଦେବ ବୋଲି ପିସିବି ଆଶା ରଖିଛି ।