ନୂଆଦିଲ୍ଲୀ: ପାକିସ୍ତାନର ଆତଙ୍କବାଦୀ ଆଡ୍ଡା ଉପରେ ଭାରତ ଏୟାରଷ୍ଟ୍ରାଇକ୍ କରିବା ପରେ ଦୁଇ ଦେଶ ମଧ୍ୟରେ ଉତ୍ତେଜନା ବଢ଼ିଯାଇଛି। ସୀମାରେ ଉତ୍ତେଜନା ବଢ଼ିବା ସହିତ ସୁନା ମୂଲ୍ୟରେ ବି ଅହେତୁକ ବୃଦ୍ଧି ହୋଇଛି। ବୁଧବାର ୧୦ ଗ୍ରାମ ୨୪ କ୍ୟାରେଟ ସୁନା ମୂଲ୍ୟରେ ୧ ହଜାର ଟଙ୍କା ବୃଦ୍ଧି ପାଇ ଦିଲ୍ଲୀରେ ଭରି ୧ ଲକ୍ଷ ପାର୍ କରିଛି।
ଅଲ୍ ଇଣ୍ଡିଆ ସରଫା ଆସୋସିଏସନ୍ ଅନୁଯାୟୀ, ୯୯.୯% ଶୁଦ୍ଧତା ବିଶିଷ୍ଟ ସୁନା ପୂର୍ବ ଦିନର ୯୯,୭୫୦ ଟଙ୍କା ତୁଳନାରେ ପ୍ରତି ୧୦ ଗ୍ରାମ ପିଛା ୧,୦୦,୭୫୦ ଟଙ୍କାକୁ ବୃଦ୍ଧି ପାଇଛି। ସେହିପରି ୯୯.୫% ଶୁଦ୍ଧତା ବିଶିଷ୍ଟ ସୁନାର ଚାହିଦା ବଢ଼ିବା କାରଣରୁ ଏଥିରେ ୧୦ ଗ୍ରାମ ପିଛା ୧,୦୫୦ ଟଙ୍କା ବୃଦ୍ଧି ପାଇ ୧,୦୦,୩୫୦ ଟଙ୍କାରେ ପହଞ୍ଚିଛି।
ପଢନ୍ତୁ- ଭାରତ ଓ ବ୍ରିଟେନ ମଧ୍ୟରେ ମୁକ୍ତ ବାଣିଜ୍ୟ ବୁଝାମଣା, ଐତିହାସିକ ଉପଲବ୍ଧି କହିଲେ ପିଏମ୍ ମୋଦୀ
ବୁଧବାର ମଧ୍ୟରାତ୍ରୀରେ ଭାରତୀୟ ସଶସ୍ତ୍ର ବାହିନୀ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (ପିଓକେ)ରେ ୯ଟି ଆତଙ୍କବାଦୀ ଆଡ୍ଡା ଉପରେ ମିସାଇଲ୍ ମାଡ଼ କରିଥିବା ରିପୋର୍ଟ ପରେ ଘରୋଇ ସୁନା ମୂଲ୍ୟରେ ବୃଦ୍ଧି ଘଟିଛି।
ଏହା ପୂର୍ବରୁ ସୁନା ୨୨ ଏପ୍ରିଲରେ ପ୍ରତି ୧୦ ଗ୍ରାମ ୧,୦୧,୬୦୦ ଟଙ୍କା ସର୍ବକାଳୀନ ସର୍ବୋଚ୍ଚ ସ୍ତରରେ ପହଞ୍ଚିଥିଲା। ସେଦିନ ସୁନା ମୂଲ୍ୟ ଗୋଟିଏ ଦିନରେ ୧୮୦୦ ଟଙ୍କା ବୃଦ୍ଧି ପାଇଥିଲା। ରୂପା ମୂଲ୍ୟ ମଧ୍ୟ ବଢିଛି। ଏଥିରେ କେଜି ପ୍ରତି ୪୪୦ ଟଙ୍କା ବୃଦ୍ଧି ପାଇ କିଲୋଗ୍ରାମ ୯୮,୯୪୦ ଟଙ୍କା ହୋଇଛି। ଭାରତରେ ବୃଦ୍ଧି ସତ୍ତ୍ୱେ, ଆନ୍ତର୍ଜାତୀୟ ସ୍ତରରେ ସୁନା ୧.୮% କିମ୍ବା ୬୨.୧୨ ଡଲାରରେ ହ୍ରାସ ପାଇ ୩,୩୬୯.୬୫ ଡଲାର ପ୍ରତି ଆଉନ୍ସରେ ଟ୍ରେଡିଂ ହେଉଛି। ତେବେ ଭୁବନେଶ୍ୱରରେ ଆଜି ୧୦ ଗ୍ରାମ ୨୨ କ୍ୟାରେଟ୍ ସୁନାର ମୂଲ୍ୟ 90,୭୫୦ ଟଙ୍କା ରହିଥିବା ବେଳେ ୧୦ ଗ୍ରାମ ୨୪ କ୍ୟାରେଟ୍ ସୁନା ମୂଲ୍ୟ ୯୯,୦୫୦ ଟଙ୍କା ରହିଛି। ଆଜି ଭୁବନେଶ୍ୱରେ ସୁନା ମୂଲ୍ୟ ୭୫୦ ଟଙ୍କା ବୃଦ୍ଧି ପାଇଥିଲା।
