ଭାରତ-ପାକିସ୍ତାନ ଫାଇଟ୍ : ଗର୍ଜିବ ସୂର୍ଯ୍ୟବଂଶୀଙ୍କ ବ୍ୟାଟ୍, ଏଥର ଟାର୍ଗେଟରେ ପାକ୍ ବୋଲର

ନୂଆଦିଲ୍ଲୀ, ୧୬|୧୧: ମୁହାଁମୁହିଁ ହେବେ ଭାରତ ଏବଂ ପାକିସ୍ତାନ । ସାମ୍ନାସାମ୍ନି ହେବେ ଦୁଇ ପାରମ୍ପାରିକ ପ୍ରତିଦ୍ୱନ୍ଦ୍ୱୀ । ଏସିଆ କପ୍ ରାଇଜିଂ ଷ୍ଟାର୍ସରେ ରବିବାର ଦୁଇ ଦେଶ ମଧ୍ୟରେ ଟକ୍କର ହେବ । ଯାହାକୁ କ୍ରିକେଟ୍ ଫ୍ୟାନ୍ସ ଅନାଇ ବସିଛନ୍ତି । ଭାରତ ଏ ଏବଂ ପାକିସ୍ତାନ ସାହିନ୍ସ ମଧ୍ୟରେ ଖେଳାଯିବାକୁ ଥିବା ମୁକାବିଲାରେ ସମସ୍ତଙ୍କ ନଜର ରହିଛି ବୈଭବ ସୂର୍ଯ୍ୟବଂଶୀଙ୍କ ଉପରେ ।

ଭାରତୀୟ ସମୟାନୁସାରେ, ରାତି ୮ଟାରେ ମୁକାବିଲା ଖେଳାଯିବ । ଏଥିପାଇଁ ଉଭୟ ଟିମ୍ ଜୋରଦାର ଅଭ୍ୟାସ କରିଛନ୍ତି । ପରସ୍ପରକୁ ମାତ୍ ଦେବାକୁ ରଣନୀତି ପ୍ରସ୍ତୁତ କରିଛନ୍ତି । ଏସିଆ କପ୍ ଭଳି ରାଇଜିଂ ଏସିଆ କପରେ ମଧ୍ୟ ଜିତେଶ ଶର୍ମାଙ୍କ ନେତୃତ୍ୱାଧିନ ଟିମ୍ ଇଣ୍ଡିଆ ନୋ ହ୍ୟାଣ୍ଡସେକ୍ ପଲିସି ଆପଣାଇବ ବୋଲି କୁହାଯାଉଛି । ଯାହା ଏସିଆ କପ୍ ଏବଂ ମହିଳା ବିଶ୍ବକପ ମୁକାବିଲାରେ ଦୁଇ ଦେଶ ମଧ୍ୟରେ ଦେଖିବାକୁ ମିଳିଥିଲା ।

ମୁକାବିଲାରେ ଭାରତ-ଏ ପାଇଁ ବୈଭବ ସୂର୍ଯ୍ୟବଂଶୀ ଫେଭରେଟ୍ ରହିଛନ୍ତି । ୧୪ ବର୍ଷୀୟ ବୈଭବ ଦମଦାର ଫର୍ମରେ ଅଛନ୍ତି । ପ୍ରଥମ ମୁକାବିଲାରେ ସେ ୩୨ ବଲରୁ ଶତକ ଅର୍ଜନ କରିଥିଲେ । ୟୁଏଇ ବିପକ୍ଷରେ ମାତ୍ର ୫୨ ବଲ୍ ଖେଳି ୧୪୪ ରନର ବିସ୍ଫୋରକ ପାଳି ତାଙ୍କ ବ୍ୟାଟରୁ ବାହାରିଥିଲା । ଯେଉଁଥିରେ ୧୫ ଛକା ଏବଂ ୧୧ ଚଉକା ସାମିଲ ଥିଲା । ଏହାପୂର୍ବରୁ ଆଇପିଏଲରେ ସେ ବିସ୍ଫୋରକ ବ୍ୟାଟିଂ କରି ସମସ୍ତଙ୍କୁ ନଜରରେ ଆସିଥିଲେ ।

ଭାରତୀୟ ଟିମ୍ ଯୁବ ଖେଳାଳିଙ୍କୁ ନେଇ ଜୋସରେ ରହିଛନ୍ତି । ଦଳର ମାତ୍ର ୨ ଜଣ ଖେଳାଳି ଅନ୍ତର୍ଜାତୀୟ ମୁକାବିଲା ଖେଳିଛନ୍ତି । ଏଥିରେ ଜିତେଶ ଶର୍ମା ଏବଂ ରମନଦୀପ ସିଂଙ୍କ ନାଁ ସାମିଲ ଅଛି । ପ୍ରିୟାଂଶ ଆର୍ଯ୍ୟା, ନେହାଲ ବଢେରା ଓ ନମନ ଧୀରଙ୍କ ଭଳି ଖେଳାଳି ଟିମରେ ଯୋଡି ହୋଇଛନ୍ତି । ଯେଉଁମାନେ ଆଇପିଏଲରେ ଭଲ ପ୍ରଦର୍ଶନ କରିଥିଲେ ।