ନୂଆଦିଲ୍ଲୀ: ଭାରତ ପହଲଗାମରେ ଘଟିଥିବା ଆତଙ୍କୀ ହମଲା ପରେ ଅପରେସନ ସିନ୍ଦୂର ଜରିଆରେ ପାକିସ୍ତାନ ଓ ପିଓକେ ସ୍ଥିତ ୯ ଆତଙ୍କୀ କେନ୍ଦ୍ରକୁ ଧ୍ଵଂସ କରିଛି। ଏଥିରେ ପ୍ରତିଶୋଧ ପରାୟଣ ହୋଇ ପାକିସ୍ତାନ ବୁଧବାର ରାତି ସାରା ଭାରତର ୧୫ଟି ସ୍ଥାନରେ ଆକ୍ରମଣ କରିବାକୁ ଉଦ୍ୟମ କରିଛି। କିନ୍ତୁ ଭାରତୀୟ ସେନା ପାକିସ୍ତାନର ସବୁ ପ୍ରୟାସକୁ ପଣ୍ଡ କରି ଦେଇଛନ୍ତି। ଓଲଟା ଗୁରୁବାର ସକାଳେ ଭାରତ ପାକିସ୍ତାନର ଅନେକ ସହର ଉପରେ ଡ୍ରୋନ ଆକ୍ରମଣ କରିଛି। ଏଥିରେ ରାଓ୍ଵଲପିଣ୍ଡି ଷ୍ଟାଡିୟମ ବି କ୍ଷତିଗ୍ରସ୍ତ ହୋଇଛି। ଭାରତର ଆକ୍ରମଣରେ ପୂରା ପାକିସ୍ତାନରେ ଭୟର ବାତାବରଣ ଖେଳି ଯାଇଛି। ରାଓ୍ଵଲପିଣ୍ଡି ଷ୍ଟାଡିୟମରେ ଡ୍ରୋନ ଆକ୍ରମଣ ହେବାରୁ ଆଜି ପିଏସଏଲରେ ହେବାକୁ ଥିବା ମ୍ୟାଚ୍ ସ୍ଥଗିତ ରଖାଯାଇଛି। ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଚରମରେ ପହଞ୍ଚିବା ପାକିସ୍ତାନ କ୍ରିକେଟ୍ ବୋର୍ଡ ସାମ୍ନାରେ ନୂଆ ସଙ୍କଟ ସୃଷ୍ଟି ହୋଇଛି। ପାକିସ୍ତାନ ସୁପର ଲିଗ୍ ୨୦୨୫ ଖେଳୁଥିବା ବିଦେଶୀ ଖେଳାଳି ସ୍ଵଦେଶ ଫେରିଯିବା ବିକଳ୍ପ ଉପରେ ବିଚାର କରୁଛନ୍ତି।
‘ଦ ଟେଲିଗ୍ରାଫ’ର ଏକ ରିପୋର୍ଟ ଅନୁସାରେ, ବୁଧବାର ସକାଳେ ଭାରତୀୟ ସେନାର ହମଲା ପରେ ଇଂଲଣ୍ଡର ଖେଳାଳି ପାକିସ୍ତାନରେ ରହି କ୍ରିକେଟ୍ ଖେଳିବା ନେଇ ଦ୍ଵିଧାରେ ଅଛନ୍ତି। ଇଂଲଣ୍ଡ ଆଣ୍ଡ ଓ୍ଵେଲ୍ସ କ୍ରିକେଟ୍ ବୋର୍ଡ ଓ ପେଶାଓ୍ଵର କ୍ରିକେଟ୍ ସଂଘ ମଧ୍ୟରେ ଜରୁରୀକାଳୀନ ଆଲୋଚନା ହୋଇଛି। ଏହି ସମୟରେ ଖେଳାଳିଙ୍କୁ ସ୍ଵଦେଶ ନ ଫେରିବାକୁ କୁହାଯାଇଛି।
ରିପୋର୍ଟରେ କୁହାଯାଇଛି, ଅଧିକାଂଶ ଖେଳାଳି ଏବେ ପାକିସ୍ତାନରେ ରହିବାକୁ ଇଚ୍ଛା ପ୍ରକାଶ କରିଛନ୍ତି। ଆଉ ଅନେକ ଖେଳାଳି ସ୍ଵଦେଶ ଫେରିବା ଉପରେ ବିଚାର କରୁଛନ୍ତି। ଇଂଲଣ୍ଡର ସାତ ଖେଳାଲି ଜେମ୍ସ ଭିନ୍ସ, ଟମ୍ କରନ, ସାମ ବିଲିଙ୍ଗ୍ସ, କ୍ରିସ ଜୋର୍ଡାନ, ଡେଭିଡ ଓ୍ବିଲି, ଲ୍ୟୁକ ଉଡ ଓ ଟମ କୋହଲର କ୍ୟାଡମୋର ପିଏସଏଲ ୨୦୨୫ ଖେଳୁଛନ୍ତି। ମେ ୧୮ରେ ପିଏସଏଲର ଫାଇନାଲ୍ ମ୍ୟାଚ୍ ଖେଳାଯିବ। ଇଂଲଣ୍ଡର କୋଚ୍ ରବି ବୋପାରା ଓ ଆଲେକଜେଣ୍ଡ୍ରା ହାର୍ଟଲେ ବି ପିଏସଏଲର ଏହି ସିଜିନରେ ଅଛନ୍ତି।
ଭାରତୀୟ ସେନାର ହମଲା ପରେ ପାକିସ୍ତାନ କ୍ରିକେଟ୍ ବୋର୍ଡ ଜରୁରୀକାଳୀନ ବୈଠକ ଡକାଇ ଆଲୋଚନା ଚଳାଇଛି ଯେ, ପିଏସଏଲକୁ ବାତିଲ୍ କରି ଦେବା ଉଚିତ୍ କି ନାହିଁ ? ପିସିବି ନିଜର ଲିଗ୍ ଜାରି ରଖିବା ନେଇ ପାକିସ୍ତାନ ସରକାରଙ୍କ ପରାମର୍ଶ ଲୋଡ଼ିଛି। ଇଂଲଣ୍ଡ କ୍ରିକେଟ୍ ଦଳର ଖେଳାଳି ଉତ୍ତେଜନା ସ୍ଥିତିକୁ ଦୃଷ୍ଟିରେ ରଖି ନିଷ୍ପତ୍ତି ନେବା ରଣନୀତି ଆପଣେଇଛି।
