ଭୁବନେଶ୍ବର ୩୧।୭: ରକ୍ତମୁଖା ପାଲଟି ଯାଇଛି ନରହନ୍ତା ଦନ୍ତା । ଏକା ଥରକେ ନେଲା ୩ ଜଣଙ୍କ ଜୀବନ । ଢେଙ୍କାନାଳ ବନଖଣ୍ଡର ହିନ୍ଦୋଳ ବନାଞ୍ଚଳରେ ହାତୀ ଆକ୍ରମଣରେ ଦୁଇ ମହିଳାଙ୍କ ସମେତ ୩ ଜଣଙ୍କ ମୃତ୍ୟୁ ହୋଇଛି । ୩ ଜଣଙ୍କ ମୃତ୍ୟୁକୁ ନେଇ ଉତ୍ତେଜନା ଦେଖାଦେଇଛି । ମୃତକଙ୍କ ଶବ ରଖି ଦୁଇ ଘଣ୍ଟା ଧରି ରାସ୍ତା ଅବରୋଧ କରିଥିଲେ ସ୍ଥାନୀୟ ଲୋକେ । ସେପଟେ ଫରେଷ୍ଟରଙ୍କୁ ନିଲମ୍ବିତ କଲେ ଜିଲ୍ଲା ବନଖଣ୍ଡ ଅଧିକାରୀ । 
ସୂଚନାଯୋଗ୍ୟ ଯେ, ଢେଙ୍କାନାଳ ଜିଲ୍ଲା ହିନ୍ଦୋଳ ବନାଞ୍ଚଳ ରାସୋଳ ସେକ୍ସନ ବାଗଧରିଆ ଗ୍ରାମରେ ଘଟିଛି ଅଭାବନୀୟ ଘଟଣା । ଗୁରୁବାର ଭୋର ସମୟରେ ବାଡ଼ି ପଟକୁ ଯାଇଥିବା ବେଳେ ହାତୀ ଆକ୍ରମଣରେ ଝୁଲଣ ଦେହୁରୀ ନାମକ ମହିଳା ଓ କରୁଣାକର ଦେହୁରୀ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଗୁରୁତର ମହିଳା ଶଶୀ ସାହୁଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାକୁ ନେବା ବାଟରେ ତାଙ୍କର ମଧ୍ୟ ମୃତ୍ୟୁ ଘଟିଛି । ଫଳରେ ହାତୀ ଆକ୍ରମଣରେ ଦୁଇ ମହିଳାଙ୍କ ସମେତ ୩ ଜଣଙ୍କର ମୃତ୍ୟୁ ଘଟିଥିବା ଜଣାପଡିଛି । । ଦନ୍ତା ହାତୀ ସମସ୍ତଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରି ଟେକି କଚାଡି କଚାଡି ମାରିଥିବା ଜଣାପଡିଛି ।
ତେବେ ହାତୀ ଆକ୍ରମଣରେ ଏକା ଥରକେ ଏପରି ତିନି ତିନି ଜଣଙ୍କ ମୃତ୍ୟୁ ଘଟଣାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଏପରି କି ମୃତକଙ୍କ ଶବ ରଖି ପୁରୁଣା କଟକ ସମ୍ବଲପୁର ରାସ୍ତାର ସାତମାଇଲ ଛକରେ ରାସ୍ତାରୋକ କରିଥିଲେ ଅଞ୍ଚଳବାସୀ । ମୃତକ ପରିବାର ମାନଙ୍କୁ ତୁରନ୍ତ କ୍ଷତିପୂରଣ ପ୍ରଦାନ, ସ୍ଥାନୀୟ ଅଞ୍ଚଳରେ ସ୍ଥାୟୀ ଫରେଷ୍ଟ କ୍ୟାମ୍ପ ଓ ପାଟ୍ରୋଲିଂ ବ୍ୟବସ୍ଥା, ଲାଇଟ୍ ବ୍ୟବସ୍ଥା କରି ହାତୀ କବଳରୁ ସୁରକ୍ଷା ଦାବିରେ ଅଡ଼ି ବସିଥିଲେ ଆନ୍ଦୋଳନକାରୀ । ତେବେ ହିନ୍ଦୋଳ ଅଞ୍ଚଳରେ ଅତ୍ୟଧିକ ହାତୀ ରହିଥିବା ବେଳେ ସ୍ୱଳ୍ପ ସଂଖ୍ୟକ ବନ କର୍ମଚାରୀ ଥିବା ଆଳ କରି ତୁରନ୍ତ ସୋଲାର ଫେନ୍ସିଂ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ସ୍ଥାନୀୟ ରେଞ୍ଜର ।
ସେପଟେ, ହାତୀ ଆକ୍ରମଣରେ ୩ ମୃତକଙ୍କ ପରିବାରକୁ ମିଳିବ କ୍ଷତିପୂରଣ । ଏ ନେଇ ସୋସିଆଲ ମିଡିଆ ‘ଏକ୍ସ’ରେ ରାଜ୍ୟ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ସୂଚନା ଦେଇଛନ୍ତି । ତେବେ କାର୍ଯ୍ୟରେ ଅବହେଳା କରିଥିବା ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ମୃତକଙ୍କ ଆତ୍ମାର ସଦଗତି କାମନା ସହ ଶୋକସନ୍ତପ୍ତ ପରିବାରବର୍ଗଙ୍କୁ ମନ୍ତ୍ରୀ ସମବେଦନା ଜଣାଇଛନ୍ତି ।
ଘଟଣା ଘଟିବାର ଘଣ୍ଟାଏ ପରେ ମଧ୍ୟ ରାସୋଳ ଫରେଷ୍ଟର ଏବଂ ହିନ୍ଦୋଳ ବନ ବିଭାଗ ଘଟଣାସ୍ଥଳରେ ପହଞ୍ଚି ନଥିବାରୁ ଉତ୍ତେଜନା ବୃଦ୍ଧି ପାଇଥିଲା । ରାସ୍ତା ଅବରୋଧ ଯୋଗୁଁ ପୁରୁଣା କଟକ ସମ୍ବଲପୁର ରାସ୍ତାରେ ସଧାରଣ ଯାତାୟାତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା । ଉତ୍ତେଜନାକୁ ନେଇ ଘଟଣାସ୍ଥଳକୁ ବନ ବିଭାଗ ପକ୍ଷରୁ ରେଞ୍ଜର, ଏସିଏଫଓ ପ୍ରମୁଖ ବନ ଅଧିକାରୀ, ପ୍ରଶାସନ ପକ୍ଷରୁ ହିନ୍ଦୋଳ ଉପ ଜିଲ୍ଲାପାଳ ଓ ତହସିଲଦାର, ପୋଲିସ ପକ୍ଷରୁ ହିନ୍ଦୋଳ ଏସଡିପିଓ, ହିନ୍ଦୋଳ, ବାଲିମୀ ଥାନା ଅଧିକାରୀଙ୍କ ସମେତ ବରିଷ୍ଠ ପୋଲିସ ଅଧିକାରୀ ବ୍ୟାପକ ପୋଲିସ ଫୋର୍ସ ସହିତ ଆନ୍ଦୋଳନକାରୀ ମାନଙ୍କୁ ବୁଝାସୁଝା କରିବା ସହିତ ପ୍ରଶାସନ ପକ୍ଷରୁ ପ୍ରତିଶ୍ରୁତି ପାଇବା ପରେ ଉତ୍ତେଜନା ଥମିବା ସହିତ ଆନ୍ଦୋଳନରୁ ହଟିଛନ୍ତି ସ୍ଥାନୀୟ ଲୋକେ । ପରେ ମୃତଦେହ ଗୁଡିକୁ ବ୍ୟବଚ୍ଛେଦ ପାଇଁ ପଠାଇ ବନ ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଛି । ଏହି ଘଟଣାରେ କାର୍ଯ୍ୟରେ ଅବହେଳା ଦର୍ଶାଇ ରାସୋଳ ଫରେଷ୍ଟ ସେକ୍ସନ ଇନଚାର୍ଜ ଫରେଷ୍ଟର ଲୁସ୍ମିତା ସିଂଙ୍କୁ ଜିଲ୍ଲା ବନଖଣ୍ଡ ଅଧିକାରୀ ନିଲମ୍ବିତ କରିଛନ୍ତି ।
ସେପଟେ ଉକ୍ତ ନରହନ୍ତା ଦନ୍ତା ହାତୀଟି ପାଖ ଜଙ୍ଗଲକୁ ପଳାଇଥିବା ଜଣାପଡିଛି । ତା ଉପରେ ବନ ବିଭାଗ ପକ୍ଷରୁ ତୀକ୍ଷ୍ଣ ନଜର ରଖାଯାଇଥିବା ସୂଚନା ମିଳିଛି । ତେବେ ଢେଙ୍କାନାଳ ବନଖଣ୍ଡର ହିନ୍ଦୋଳ ବନାଞ୍ଚଳରେ ହାତୀ ମଣିଷ ଲଢେଇ ଏକ ନିତିଦିନିଆ ଘଟଣା ।
You Can Read:
