ପ୍ରକୃତି ଛାଡ଼ି ପାରୁନାହାନ୍ତି ମୁନିର; ଲଢେଇରେ ଏକାଠି ହେବା ପାଇଁ ମୁସଲିମ୍ ଦେଶଗୁଡ଼ିକୁ ପ୍ରବର୍ତ୍ତାଉଛନ୍ତି

ନୂଆଦିଲ୍ଲୀ: ପାକିସ୍ତାନ ସେନାର ସର୍ବେସର୍ବା ଥିବା ଅସୀମ ମୁନିର ପୁଣି ଥରେ ଉସାଇବା କାମ କରିଛନ୍ତି । ଅସୀମ ମୁନିରଙ୍କ ହିନ୍ଦୁ ଏବଂ ଭାରତ ବିରୋଧୀ ପୂର୍ବ ବୟାନ କାଶ୍ମୀରରେ ପହଲଗାମ ଆତଙ୍କବାଦୀ ଆକ୍ରମଣ ଏବଂ 'ଅପରେସନ୍ ସିନ୍ଦୂର' ପାଇଁ ଦାୟୀ ଥିଲା । ସ୍ଥିତି ଏପରି ହୋଇଥିଲା ଯେ ଦୁଇ ପରମାଣୁ ଶକ୍ତି ସମ୍ପନ୍ନ ଦକ୍ଷିଣ ଏସୀୟ ରାଷ୍ଟ୍ରକୁ ଏକ ସମ୍ପୂର୍ଣ୍ଣ ଯୁଦ୍ଧର ଦ୍ୱାରଦେଶରେ ପହଞ୍ଚାଇ ଦେଇଥିଲା ।

ପାକିସ୍ତାନୀ ସେନାମୁଖ୍ୟରୁ ଫିଲ୍ଡ ମାର୍ଶାଲ ହୋଇଥିବା ଏହି ପାକିସ୍ତାନୀ ସେନାମୁଖ୍ୟ ପୁଣି ଥରେ ଉତ୍ତେଜନାପୂର୍ଣ୍ଣ ବୟାନ ଦେଇଛନ୍ତି । ସେ ଏଥର ମୁସଲିମ ରାଷ୍ଟ୍ରଗୁଡ଼ିକୁ 'ଆଲ୍ଲାହର ଶତ୍ରୁ' ବିରୁଦ୍ଧରେ ସେନାରେ ଯୋଗଦେବାକୁ ଆହ୍ୱାନ କରିଛନ୍ତି । ଲିବିଆରେ ଭାଷଣ ଦେଇ, ମୁନିର ପାକିସ୍ତାନକୁ ବିଶ୍ୱ ମୁସଲିମ ସମ୍ପ୍ରଦାୟର ରକ୍ଷକ ଭାବରେ ଚିତ୍ରଣ କରିବାକୁ ଚେଷ୍ଟା କରିଥିଲେ । ସେ ପାକିସ୍ତାନୀ ପ୍ରଧାନମନ୍ତ୍ରୀଙ୍କ ଭୂମିକା ମଧ୍ୟ କରିଥିଲେ । ଲିବିଆ ଏବଂ ଅନ୍ୟ ମୁସଲିମ ରାଷ୍ଟ୍ରଗୁଡ଼ିକୁ ପ୍ରତିରକ୍ଷା ଏବଂ ସାମରିକ ଉପକରଣ ପ୍ରତିଶ୍ରୁତି ଦେଇ, ପାକିସ୍ତାନର ସରକାରୀ ନିଷ୍ପତ୍ତିରେ ତାଙ୍କର ଭୂମିକାକୁ ରେଖାଙ୍କିତ କରିଥିଲେ ।

ପାକିସ୍ତାନ ଫିଲ୍ଡ ମାର୍ଶଲ ମୁନିର ଆଫ୍ରିକୀୟ ଏବଂ ଆରବ ରାଷ୍ଟ୍ର ଗସ୍ତରେ ଅଛନ୍ତି । ସେ ଗତ ସପ୍ତାହରେ ଲିବିଆରେ ଏକ ଭାଷଣ ଦେଇଥିଲେ, ଯେଉଁଠାରେ ପାକିସ୍ତାନ ସହିତ ଅସ୍ତ୍ରଶସ୍ତ୍ର ବିକ୍ରୟ ପାଇଁ ୪ ବିଲିୟନ ଡଲାରର ଚୁକ୍ତି ସ୍ୱାକ୍ଷର କରିଥିବା ଜଣାପଡ଼ିଛି ।

କୁରାନକୁ ଉଦ୍ଧୃତ କରି ମୁନିର ମୁସଲିମ ଦେଶମାନଙ୍କ ମଧ୍ୟରେ ଧାର୍ମିକ ସମ୍ପର୍କକୁ ଉଜାଗର କରିଥିଲେ । ସେ କହିଥିଲେ ଯେ ମୁସଲିମ ରାଷ୍ଟ୍ରଗୁଡ଼ିକରେ ବର୍ତ୍ତମାନ ଶକ୍ତି ନାହିଁ, କାରଣ ଅନ୍ୟ ରାଷ୍ଟ୍ରଗୁଡ଼ିକ ମୁସଲିମ ଦେଶମାନଙ୍କଠାରୁ ପ୍ରଯୁକ୍ତିବିଦ୍ୟା ନେଇଯାଇଛନ୍ତି । ସେ କହିଥିଲେ ଯେ ପାକିସ୍ତାନ ପାଖରେ ଥିବା ସମସ୍ତ ଉପକରଣ ଏବଂ ପ୍ରଯୁକ୍ତିବିଦ୍ୟା ଆମ ଭାଇମାନଙ୍କ ପାଇଁ ଉପଲବ୍ଧ । ସେ କହିଥିଲେ, "ପାକିସ୍ତାନରୁ ଆପଣଙ୍କୁ ଆବଶ୍ୟକ ହେଉଥିବା ଯେକୌଣସି ସହାୟତା ଉପଲବ୍ଧ କରାଇବ ।"

ମୁନିର ଦାବି କରିଥିଲେ, "ଯଦି ଆମେ ବିଶ୍ୱକୁ ଦେଖିବା, ତେବେ ବିଶେଷକରି ମୁସଲିମ ୱାର୍ଲଡକୁ ବହୁତ କଷ୍ଟ ଏବଂ ଯନ୍ତ୍ରଣାରେ ଦେଖୁ । ଗତ ୨୦ ବର୍ଷ ମଧ୍ୟରେ ସାତ କିମ୍ବା ଆଠଟି "ମହାନ ମୁସଲିମ ଦେଶ, ଗୋଟିଏ ପରେ ଗୋଟିଏ, ଧ୍ୱଂସ ପାଇଛି"। ଦୁର୍ଭାଗ୍ୟବଶତଃ, ଆଜି ମୁସଲିମ ୱାର୍ଲଡ ଏହାର ପତନ ଚାହୁଁଥିବା ଦେଶଗୁଡ଼ିକ ଦ୍ୱାରା ବିଶ୍ୱାସଘାତକତା ଓ ଷଡ଼ଯନ୍ତ୍ରର ଶିକାର ହୋଇଛି । ସେ ସମସାମୟିକ ବିଶ୍ୱରେ ଆଇନର ଶାସନ ନାହିଁ ବୋଲି କହିଥିଲେ ।