ଭୁବନେଶ୍ୱର ୩୦।୧୧ : ରାଜ୍ୟରେ ବର୍ତ୍ତମାନ ଶୀତ ପ୍ରକୋପ ସାମାନ୍ୟ କମିଛି। ଅଧିକାଂଶ ସ୍ଥାନରେ ରାତି ତାପମାତ୍ରା କ୍ରମଶଃ ବୃଦ୍ଧି ପାଇଛି। ବର୍ତ୍ତମାନ ତାପମାତ୍ରାରେ ଆସନ୍ତା ୪ ଦିନ ପର୍ଯ୍ୟନ୍ତ ବିଶେଷ ପରିବର୍ତ୍ତନ ସମ୍ଭାବନା ନାହିଁ। ଏହାପରେ ପରବର୍ତ୍ତୀ ୪ ଦିନ ଭିତରେ ସର୍ବନିମ୍ନ ତାପମାତ୍ରା ବର୍ତ୍ତମାନ ତୁଳନାରେ ୨ରୁ ୩ ଡିଗ୍ରୀ କମିପାରେ। ଭୁବନେଶ୍ୱର ପାଣିପାଗ କେନ୍ଦ୍ର ଏଭଳି ପୂର୍ବାନୁମାନ କରିଛି ।

ରାଜ୍ୟରେ ପାଗ ବର୍ତ୍ତମାନ ଶୁଖିଲା ରହିଛି। ଆସନ୍ତା ଡିସେମ୍ବର ୬ ତାରିଖ ପର୍ଯ୍ୟନ୍ତ ଜାରି ହୋଇଥିବା ପୂର୍ବାନୁମାନରେ ପାଗ ଶୁଖିଲା ରହିବ। ଏବେ ବର୍ଷା ନେଇ କୌଣସି ସୂଚନା ଦିଆଯାଇନାହିଁ। ଅର୍ଥାତ୍ ଡିସେମ୍ବର ପ୍ରଥମ ସପ୍ତାହରେ ପାଗ ଶୁଖିଲା ହିଁ ରହିବ।

ଶୁକ୍ରବାର ରାତିରେ ଜି.ଉଦୟଗିରିରେ ସର୍ବନିମ୍ନ ତାପମାତ୍ରା ୮.୩ ଡିଗ୍ରୀ ସେଲସିୟସ୍ ଓ ସେମିଳିଗୁଡ଼ାରେ ୯.୬ ଡିଗ୍ରୀ ରେକର୍ଡ ହୋଇଥିବାବେଳେ ବାକି କୌଣସି ସ୍ଥାନରେ ପାରଦ ୧୦ ଡିଗ୍ରୀ ତଳେ ନଥିଲା । ଦାରିଙ୍ଗିବାଡ଼ି ତାପମାତ୍ରା ୧୦ ଡିଗ୍ରୀ, ଫୁଲବାଣୀ ୧୦, କୋରାପୁଟ ୧୦.୨, ଝାରସୁଗୁଡ଼ା ୧୦.୪, ନବରଙ୍ଗପୁର ୧୦.୮, ରାଉରକେଲା ୧୧, ଚିପିଲିକା ୧୧.୪, କିରେଇ ୧୧.୬, ସୁନ୍ଦରଗଡ଼ ୧୨.୨, କେନ୍ଦୁଝର ୧୨.୮ ଡିଗ୍ରୀ ଥିଲା। ଉପକୂଳ ଅଞ୍ଚଳରେ ତାପମାତ୍ରା ବଢ଼ିଥିବାବେଳେ ଭୁବନେଶ୍ୱର ୧୭.୨ ଓ କଟକ ୧୬ ଡିଗ୍ରୀରେ ପହଞ୍ଚିଥିଲା ଶୁକ୍ରବାର ରାତିରେ।