ବିଗ୍‌ବସ୍‌-୧୯ ୱିନର ଗୌରବ ଖାନ୍ନା, ଟ୍ରଫି ସହ ଜିତିଲେ ୫୦ ଲକ୍ଷ ଟଙ୍କାର ପ୍ରାଇଜ ମନି

ନୂଆଦିଲ୍ଲୀ ୦୮।୧୨; ବିଗ୍ ବସ୍-୧୯ ଫାଇନାଲ ଶେଷ ହୋଇଛି । ସିଜିନ୍କୁ ମିଳି ସାରିଛି ବିଜେତା । ଟିଭି ସୁପରଷ୍ଟାର ତଥା ଗୌରବ ଖାନ୍ନା ବିଗ୍ ବସ୍-୧୯ ବିଜେତା ହୋଇଛନ୍ତି । ତାଙ୍କୁ ଟ୍ରଫି ସହ ୫୦ ଲକ୍ଷ ଟଙ୍କାର ପ୍ରାଇଜ ମନି ମିଳିଛି । ଫରହାନା ଭଟ୍ଟ ପ୍ରଥମ ରସର-ଅପ୍ ହୋଇଥିବା ଦ୍ଵିତୀୟ ରନର-ଅପ ପ୍ରଣୀତ ମୋରେ ହୋଇଛନ୍ତି । ଅଗଷ୍ଟ ୨୪ରୁ ଆରମ୍ଭ ହୋଇଥିବା ବିଗ୍ ବସ୍ ଦର୍ଶକଙ୍କୁ ୧୦୬ ଦିନ ଯାଏ ବାନ୍ଧି ରଖିଥିଲା । ଗତକାଲି ଅର୍ଥାତ୍ ରବିବାର ହୋଇଥିବା ଫାଇନାଲରେ ଗୌରବ ଖାନ୍ନା ବାଜି ମାରିଛନ୍ତି ।

ଦୀର୍ଘ ୩ ମାସରୁ ଅଧିକ ଦିନ ଧରି କଲର୍ସ ଟିଭିରେ ପ୍ରସାରିତ ହୋଇ ଆସିଥିବା ଏହି ଟେଲିଭିଜନ ରିୟଲିଟି ଶୋ ରବିବାର ଶେଷ ହୋଇଛି । ଶେଷ ଦିନରେ ବଲିଉଡ ଅଭିନେତା ସଲମାନ୍ ଖାନ ଷ୍ଟେଜ ଉପରେ ବିଜେତାଙ୍କ ନାମ ଘୋଷଣା କରିଥିଲେ । ଚୂଡାନ୍ତ ପର୍ଯ୍ୟାୟରେ ପହଞ୍ଚିଥିବା ୫ ଜଣଙ୍କ ମଧ୍ୟରୁ ପ୍ରଥମେ ଅମାଲ ମଲ୍ଲିକ ପ୍ରତିଯୋଗିତାରୁ ବାଦ୍ ପଡିଥିଲେ । କିଛି ସମୟ ପରେ ତାନ୍ୟା ମିତ୍ତଲ ମଧ୍ୟ ଆଉଟ ହୋଇଥିଲେ । ପ୍ରଣିତ ମୋରେ, ଗୌରବ ଖାନ୍ନା ଓ ଫାହାନା ଭଟ୍ଟ ଫାଇନାଲକୁ ଯାଇଥିଲେ । ପରେ ପରେ ପ୍ରଣୀତ ମୋରେ ମଧ୍ୟ ପ୍ରତିଦ୍ୱନ୍ଦ୍ୱିତାରୁ ହଟିଥିଲେ । ଶେଷରେ ଫରହାନା ଓ ଗୌରବଙ୍କ ମଧ୍ୟରେ ହୋଇଥିଲା କଡା ଟକ୍କର । ଉଭୟଙ୍କ ହାତ ଧରି ସଲମାନ ଷ୍ଟେଜ ଉପରକୁ ଆସିଥିଲେ ଏବଂ ଗୌରବ ବିଗ୍ ବସ୍ ୧୯ ବିଜେତା ବୋଲି ଘୋଷଣା କରିଥିଲେ ।

ଉଦ୍ଯାପନୀ ଦିବସରେ ପୱନ ସିଂହ, ସନ୍ନି ଲିଓନି, କରନ କୁନ୍ଦ୍ରା, କାର୍ତ୍ତିକ ଆର୍ୟନ, ନିଲମ ଗିରି ଓ ଅନନ୍ୟା ପାଣ୍ଡେ ମଧ୍ୟ ନଜର ଆସିଥିଲେ । ଷ୍ଟେଜରେ ସଲମାନ ଦିଗଂଗତ ଅଭିନେତା ଧର୍ମେନ୍ଦ୍ରଙ୍କୁ ମନେପକାଇ ଭାବବିହ୍ୱଳ ହୋଇପଡିଥିଲେ । ଗତ ଅଗଷ୍ଟ ୨୪ରେ ବିଗ୍ବସ୍-୧୯ର ଶୁଭାରମ୍ଭ ହୋଇଥିଲା । ସବୁ ସିଜିନ ଭଳି ଚଳିତ ସିଜିନ୍ରେ ମଧ୍ୟ ସଲମାନ ଖାନ ଏହାର ଉଦ୍ଘାଟନ କରିଥିଲେ ।

ଗୌରବ ଖାନ୍ନା କିଏ?

"ବିଗ୍ ବସ୍ ୧୯" ବିଜେତା ଗୌରବ ଖାନ୍ନା ଉତ୍ତର ପ୍ରଦେଶର କାନପୁରରୁ ଆସିଛନ୍ତି। ତାଙ୍କର ଜନ୍ମ ୧୧ ଡିସେମ୍ବର ୧୯୮୧ରେ ହୋଇଥିଲା। ସେ "ଅନୁପମା" ଭଳି ଶୋ’ ସମେତ ଅନେକ ଟିଭି ଧାରାବାହିକରେ ଅଭିନୟ କରିଛନ୍ତି, ଯେଉଁଠାରେ ସେ ଅନୁଜ କପାଡିଆ ଭୂମିକାରେ ଅଭିନୟ କରିଥିଲେ। ସେ ପ୍ରମୁଖ ଭୂମିକାରେ ଶ୍ରେଷ୍ଠ ଅଭିନେତା ପାଇଁ ଭାରତୀୟ ଟେଲି ପୁରସ୍କାର ମଧ୍ୟ ଜିତିଥିଲେ। ଏହା ବ୍ୟତୀତ, ସେ "ସେଲିବ୍ରିଟି ମାଷ୍ଟରସେଫ୍ ଇଣ୍ଡିଆ ସିଜନ୍ ୧"ର ବିଜେତା ଥିଲେ। ଅଭିନୟରେ ପ୍ରବେଶ କରିବା ପୂର୍ବରୁ ଏକ ଆଇଟି ଫାର୍ମରେ ମାର୍କେଟିଂ ମ୍ୟାନେଜର ଭାବରେ କାମ କରିଥିଲେ। ସେ ଟିଭି ବିଜ୍ଞାପନ ସହିତ ତାଙ୍କର ଅଭିନୟ କ୍ୟାରିୟର ଆରମ୍ଭ କରିଥିଲେ। ତାଙ୍କୁ ପ୍ରଥମେ ୨୦୦୭ରେ "ମେରି ଡୋଲି ତେରେ ଆଙ୍ଗନା" ରେ ମୁଖ୍ୟ ଭୂମିକାରେ ଦେଖିବାକୁ ମିଳିଥିଲା। ପରବର୍ତ୍ତୀ ସମୟରେ ସେ ଅନେକ ଟିଭି ଧାରାବାହିକରେ କାମ କରିଥିଲେ।