ବାଂଲାଦେଶ ରାଷ୍ଟ୍ରଦୂତଙ୍କୁ ପୁଣିଥରେ ସମନ କଲା ଭାରତ: ଗମ୍ଭୀର ସ୍ଥିତିରେ ଭାରତ ବାଂଲାଦେଶ ସମ୍ପର୍କ

ନୂଆଦିଲ୍ଲୀ: ବାଂଲାଦେଶରେ ଦୀପୁ ଦାସଙ୍କ ହତ୍ୟା ଘଟଣାରେ ନୂଆ ଦିଲ୍ଲୀରେ ଥିବା ବାଂଲାଦେଶ ଦୂତାବାସ ସମ୍ମୁଖରେ ହିନ୍ଦୁ ସଂଗଠନ ବିରୋଧ କରିବା ପରେ ବାଂଲାଦେଶ ଭାରତର ରାଷ୍ଟ୍ରଦୂତଙ୍କୁ ସମନ କରିଥିଲା। ଏହାର ଜବାବରେ ଭାରତ ମଙ୍ଗଳବାର ବାଂଲାଦେଶ ରାଷ୍ଟ୍ରଦୂତ ରିଆଜ ହମୁଦିଲ୍ଲାହଙ୍କୁ ପୁଣିଥରେ ସମନ କରିଛି। ଭାରତ ପକ୍ଷରୁ ଦ୍ୱିତୀୟ ଥର ପାଇଁ ତାଙ୍କୁ ସମନ କରାଯାଇଛି।

ଆଜି ସକାଳେ ବାଂଲାଦେଶୀ ବୈଦେଶିକ ମନ୍ତ୍ରଣାଳୟ ଭାରତୀୟ ରାଷ୍ଟ୍ରଦୂତଙ୍କୁ ସମନ କରି ବାଂଲାଦେଶ ଦୂତାବାସ ସମ୍ମୁଖରେ ହିନ୍ଦୁ ସଂଗଠନର ଆନ୍ଦୋଳନକୁ ବିରୋଧ କରିଥିଲା। ଜାରି ବିବୃତ୍ତିରେ ବାଂଲାଦେଶ କହିଛି ଯେ ୨୦ ଡିସେମ୍ବର ୨୦୨୫ ରେ ନୂଆଦିଲ୍ଲୀରେ ଥିବା ବାଂଲାଦେଶ ହାଇକମିଶନରଙ୍କ ବାସଭବନ ବାହାରେ ଘଟିଥିବା ଘଟଣା ଏବଂ ଡିସେମ୍ବର ୨୨ରେ ସିଲିଗୁଡ଼ିର ଭିସା ସେଣ୍ଟରରେ ହୋଇଥିବା ଭଙ୍ଗାରୁଜା ବିଷୟରେ ଢାକାର ଗମ୍ଭୀର ଚିନ୍ତା ବିଷୟରେ ବର୍ମାଙ୍କୁ ଅବଗତ କରିଛି। ଏହା ଉଗ୍ରବାଦୀମାନଙ୍କ ଆକ୍ରମଣ ବୋଲି ବାଂଲାଦେଶ କହିଥିଲା।ଏହାର କିଛି ଘଣ୍ଟା ପରେ ମଙ୍ଗଳବାର ସନ୍ଧ୍ୟାରେ ଭାରତ ମଧ୍ୟ ବାଂଲାଦେଶର ରାଷ୍ଟ୍ରଦୂତଙ୍କୁ ସମନ କରିଛି।

ଏହା ପୂର୍ବରୁ ଗତ ସପ୍ତାହରେ, ଭାରତ ପ୍ରଥମେ ବାଂଲାଦେଶରେ "ବିଗିଡ଼ିଯାଉଥିବା ସୁରକ୍ଷା ପରିବେଶ" ଏବଂ ଢାକାରେ ଭାରତୀୟ ଉଚ୍ଚାୟୋଗ ପ୍ରତି ବିପଦ ସମ୍ପର୍କରେ ରାଷ୍ଟ୍ରଦୂତ ହମିଦୁଲ୍ଲାଙ୍କୁ ସମନ କରିଥିଲା। କିଛି ଚରମପନ୍ଥୀ ଭାରତୀୟ ଦୂତାବାସର ସୁରକ୍ଷା ପ୍ରତି ବିପଦ ସୃଷ୍ଟି କରିବାକୁ ଚାହୁଁଛନ୍ତି ବୋଲି ଭାରତ କହିଥିଲା। ଏଥିସହିତ ବାଂଲାଦେଶରେ ଘଟୁଥିବା ଘଟଣା ପାଇଁ ଭାରତକୁ ଯେଉଁ ଦାୟୀ କରାଯାଉଛି,ଏହାକୁ ମଧ୍ୟ ଖଣ୍ଡନ କରିଥିଲା ଭାରତ। ତା ସହିତ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ଏପର୍ଯ୍ୟନ୍ତ ଘଟଣା ସମ୍ପର୍କରେ ବ୍ୟାପକ ତଦନ୍ତ କରି ନାହାଁନ୍ତି କିମ୍ବା ଭାରତ ସହିତ ବିଶ୍ୱସନୀୟ ପ୍ରମାଣ ଶେୟାର କରି ନାହାଁନ୍ତି ବୋଲି ସମନରେ କହିଥିଲା।

ସୂଚନା ଥାଉକି, ଜଣେ ବାଂଲାଦେଶୀ ନେତା ଭାରତର ଉତ୍ତର-ପୂର୍ବ ରାଜ୍ୟଗୁଡ଼ିକୁ ଇଙ୍ଗିତ କରି ସେଭେନ୍ ସିଷ୍ଟର୍ସକୁ ଅଲଗା କରିବା ପାଇଁ ଧମକ ଦେଇଥିଲେ। ଏହାର ଗୋଟିଏ ଦିନ ପରେ ହମିଦୁଲ୍ଲାଙ୍କୁ ସମନ କରାଯାଇଥିଲା।