ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ଝାଡଖଣ୍ଡରେ ବଡ଼ ଅଘଟଣ। ପାଲାମୁରେ ହୋଇଥିବା ବିସ୍ଫୋରଣରେ ତିନି ନାବାଳକଙ୍କ ସମେତ ୪ ଜଣଙ୍କର ମୃତ୍ୟୁ ଘଟିଛି। ଦୁଇ ଜଣ ଆହତ ହୋଇଥିବା ଖବର ମିଳିଛି। ପୋଲିସ କହିଛି ଯେ ଏହି ବିସ୍ଫୋରଣ ମନାଟୁ ପୋଲିସ ଷ୍ଟେସନ ପରିସରରେ ଥିବା ଏକ ସ୍କ୍ରାପ ଡିଲରଙ୍କ ଠାରେ ଘଟିଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ରାଜଧାନୀ ରାଞ୍ଚିଠାରୁ ପ୍ରାୟ ୧୯୦ କିଲୋମିଟର ଦୂରରେ ଏହି ଅଘଟଣ ଘଟିଛି।
ପାଲାମୁ ସମେତ ଚାରିଟି ଆସନରେ ଲୋକସଭା ନିର୍ବାଚନ ପୂର୍ବରୁ ଏହି ଘଟଣା ଘଟିଛି। ଗଣମାଧ୍ୟମ ସହ କଥାବାର୍ତ୍ତା ବେଳେ ସୂଚନା ଦେଇ ପାଲାମୁ ଏସପି ରେଶମା ରମେସନ କହିଛନ୍ତି ଯେ ଏହି ଘଟଣାରେ ତିନି ନାବାଳକଙ୍କ ସମେତ ଚାରି ଜଣଙ୍କର ମୃତ୍ୟୁ ଘଟିଛି। ସେ କହିଛନ୍ତି, ଆମେ ବୋମା ବିସ୍ଫୋରଣର କାରଣ ନେଇ ପ୍ରତ୍ୟେକ ଦିଗରୁ ଘଟଣାର ଅନୁସନ୍ଧାନ କରୁଛୁ। ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ବିସ୍ଫୋରଣରେ ଆହତ ସମ୍ପର୍କରେ ସୂଚନା ପାଇବା ପରେ ପରିବାର ସଦସ୍ୟ ମଧ୍ୟ ଡାକ୍ତରଖାନାରେ ପହଞ୍ଚିଥିଲେ। ଡାକ୍ତରଖାନାରେ ଲୋକଙ୍କ ଭିଡ଼ ଦେଖିବାକୁ ମିଳିଛି।
