ନେହରୁ, ଜିନ୍ନା, ଏମର୍ଜେନ୍ସି ଓ ବିଶ୍ୱାସଘାତକ...ବନ୍ଦେ ମାତରମ୍ ଉପରେ ସଂସଦରେ କ’ଣ କ’ଣ କହିଲେ ପ୍ରଧାନମନ୍ତ୍ରୀ ?

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ବନ୍ଦେ ମାତରମ୍‌ର ୧୫୦ ବର୍ଷ ପୂର୍ତ୍ତି ଉପରେ ଲୋକସଭା ଚର୍ଚ୍ଚାରେ ଭାଗ ନେଇ କଂଗ୍ରେସ ଉପରେ ଜୋରଦାର ବର୍ଷିଛନ୍ତି । ସେ ବିରୋଧୀ ଦଳ ଉପରେ ରାଷ୍ଟ୍ରୀୟ ଗୀତକୁ ନେଇ ମହମ୍ମଦ ଅଲି ଜିନ୍ନାଙ୍କ ଆପତ୍ତିକୁ ସମର୍ଥନ ଦେଇ ଦେଶ ସହ ବିଶ୍ୱାସଘାତକ କରିଥିବା ଅଭିଯୋଗ କରିଛନ୍ତି । ପିଏମ୍ ମୋଦୀ ଅଭିଯୋଗ କରିଛନ୍ତି ଯେ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହାରଲାଲ୍ ନେହରୁ ୧୯୩୭ରେ ଜିନ୍ନାର ଅଭିମୁଖ୍ୟକୁ ପାଳନ କରିଥିଲେ । ଦାବି କରିଥିଲେ ଯେ ଏହି ଗୀତ ମୁସଲମାନଙ୍କୁ ଅସନ୍ତୁଷ୍ଟ କରିପାରେ, ଏପରି ଭାବେ ଐତିହ୍ୟ ସହ ସାଲିସ କରାଯାଇଥିଲା ।

ଏହି ତୁଷ୍ଟୀକରଣକୁ ପରବର୍ତ୍ତୀ ରାଜନୈତିକ ନିଷ୍ପତ୍ତି ସହ ଯୋଡ଼ି ପିଏମ୍ ମୋଦୀ କହିଛନ୍ତି ଯେ କଂଗ୍ରେସ କେବଳ ବନ୍ଦେ ମାତରମକୁ ଭାଙ୍ଗି ନାହିଁ, ବରଂ ଦେଶରେ ବିଭାଜନର ମଞ୍ଜି ମଧ୍ୟ ବୁଣିଥିଲା । ଏପରି ଏକ ରାଜନୀତି ଯାହା ସେମାନଙ୍କ ଅନୁସାରେ ଆଜି ବି ଜାରି ରହିଛି ।

ଗୃହରେ ଆଲୋଚନା ପୂର୍ବରୁ ହିଁ କଂଗ୍ରେସ ଉପରେ ଅଭିଯୋଗ ଆଣି ବିଜେପି କହିଥିଲା, ଆଇଏନସି ୧୯୩୭ ଅଧିବେଶନରେ ମୁସଲିମ୍ ଲିଗ୍‌ର ଚାପରେ ବନ୍ଦେ ମାତରମ୍‌କୁ ଦୁର୍ବଳ କରି ସାମ୍ପ୍ରଦାୟିକ ଏଜେଣ୍ଡାକୁ ବଢାଇଥିଲା । ପିଏମ୍ ମୋଦୀ ଗୀତର ଇତିହାସକୁ କଂଗ୍ରେସର ବାରମ୍ୱାର- ବିଶ୍ୱାସଘାତକ ସହ ଯୋଡ଼ିଥିଲେ । ପ୍ରଧାନମନ୍ତ୍ରୀ କହିଥିଲେ, ଯେତେବେଳେ ବନ୍ଦେ ମାତରମ୍ ନିଜ ୧୦୦ତମ ବର୍ଷ ପୂର୍ତ୍ତି ପାଳନ କରିଥିଲା, ସେତେବେଳେ ଦେଶ ଏମର୍ଜେନ୍ସିରେ ଫସିଥିଲା । ସେହି ସମୟରେ ସମ୍ୱିଧାନର ଗଳା ଚାପି ଦିଆଯାଇଥିଲା ଓ ଯେଉଁମାନେ ଦେଶଭକ୍ତି ପାଇଁ ବଞ୍ଚିଥିଲେ-ମରିଥିଲେ, ସେମାନଙ୍କୁ ଜେଲର ଚାରି କାନ୍ଥ ଭିତରକୁ ଠେଲି ଦିଆଯାଇଥିଲା । ଇନ୍ଦିରା ଗାନ୍ଦୀଙ୍କ ସମୟର ଗଣତନ୍ତ୍ରର ଦମନ ଓ ଦଶନ୍ଧି ପୂର୍ବରୁ ଗୀତକୁ ଅଣଦେଖା କରାଯିବା ସହ ସିଧା ସମ୍ପର୍କ ଥିବା ଦର୍ଶାଇଥିଲେ ।

ପ୍ରଧାନମନ୍ତ୍ରୀ ମୋଦୀ, ୧୮୭୫ ନଭେମ୍ୱରରେ ବଙ୍କିମ୍ ଚନ୍ଦ୍ର ଚାଟର୍ଜୀଙ୍କ ଦ୍ୱାରା ରଚିତ ଏହି ଗୀତକୁ ପ୍ରଶଂସା କରିଛନ୍ତି । ଏହା ଏପରି ନାରା ଯିଏ ସ୍ୱାଧୀନତା ପାଇଁ ଲଢେଇ କରିଥିବା ଅନେକ ପିଢିକୁ ପ୍ରରଣା ଦେଇଥିଲା । ସେ କହିଛନ୍ତି, ଏବେ ୧୫୦ ବର୍ଷ ପରେ ବନ୍ଦେ ମାତରମ୍‌ର ଚମକକୁ ଫେରାଇ ଆଣିବାର ଏକ ଭଲ ଅବସର ଅଟେ ।

ଲୋକସଭାରେ ସେ କହିଛନ୍ତି, ଆମେ ନିକଟ ଅତୀତରେ ସମ୍ୱିଧାନର ୭୫ତମ ବର୍ଷ ପୂର୍ତ୍ତି ପାଳନ କରିଛୁ । ଦେଶ ସର୍ଦ୍ଦାର ବଲ୍ଲଭବାଇ ପଟେଲ୍ ଓ ଭଗବାନ ବିର୍ସା ମୁଣ୍ଡାଙ୍କ ୧୫୦ତମ ଜୟନ୍ତୀ ପାଳନ କରିଛି । ଗୁରୁ ତେଗ୍ ବାହାଦୁର ଜୀଙ୍କ ୩୫୦ତମ ବଳିଦାନ ଦିବସ ପାଳନ କରୁଛୁ । ଆଜି ଆମେ ବନ୍ଦେ ମାତରମର ୧୫୦ ବର୍ଷ ପୂର୍ତ୍ତିର ସେଲିବ୍ରେସନ କରୁଛୁ ।

ଏହି ଗୀତକୁ ବଳିଦାନ, ଏକତା ଓ ଦୃଢତାର ମନ୍ତ୍ର ଉଲ୍ଲେଖ କରି, ପିଏମ୍ ମୋଦୀ ସଂସଦରେ ଏକ ନିବେଦନ କରିଛନ୍ତି । ଏହି ଐତିହ୍ୟ ଆଗାମୀ ପିଢିଙ୍କ ପାଇଁ ଯେପରି ସୁରକ୍ଷିତ ରହିବ ତାହା ସୁନିଶ୍ଚିତ କରାଯିବ ଦରକାର । ସେ କହିଛନ୍ତି, ଏହା କେବଳ ଇତିହାସକୁ ଶ୍ରଦ୍ଧାଞ୍ଜଳି ନୁହେଁ, ବରଂ ଆମ ଗଣତାନ୍ତ୍ରିକ ଭାବନାକୁ ପୁଣି ଥରେ ସ୍ପଷ୍ଟ କରୁଛି । ଅତୀତର ଶିକ୍ଷା ଆମ ଭବିଷ୍ୟର ମାର୍ଗଦର୍ଶନ ହୋଇ ରହିବା ଦରକାର ।