ନୂଆଦିଲ୍ଲୀ: ପରିବେଶ ନିୟମ ଉଲ୍ଲଂଘନ କାରଣ ଦର୍ଶାଇ କର୍ଣ୍ଣାଟକ ରାଜ୍ୟ ପ୍ରଦୂଷଣ ବୋର୍ଡ ମଙ୍ଗଳବାର ବିଗ୍ ବସ୍ କନ୍ନଡ ଆୟୋଜନ କରୁଥିବା ଷ୍ଟୁଡିଓ କମ୍ପ୍ଲେକ୍ସକୁ ତୁରନ୍ତ ବନ୍ଦ କରିବାକୁ ନିର୍ଦ୍ଦେଶ ଦେଇଛି । ୟୁନିଟ୍ ସିଲ୍ କରିବା ପାଇଁ ପୋଲିସକୁ ନିର୍ଦ୍ଦେଶ ଦିଆଯାଇଛି । ସେହିପରି ବେଙ୍ଗାଲୁରୁ ବିଦ୍ୟୁତ୍ ଯୋଗାଣ କମ୍ପାନୀ ଲିମିଟେଡର ପରିଚାଳନା ନିର୍ଦ୍ଦେଶକଙ୍କୁ କମ୍ପ୍ଲେକ୍ସରୁ ବିଦ୍ୟୁତ୍ ବିଚ୍ଛିନ୍ନ କରିବାକୁ ନିର୍ଦ୍ଦେଶ ଦେଇଛି । ବିଗ୍ ବସ୍ କନ୍ନଡ଼ ସିଜିନ୍ ୧୨ର ଆରମ୍ଭ ପରେ ଏହି ନିର୍ଦ୍ଦେଶ ଆସିଛି । ଏହାପରେ, ହୋଷ୍ଟ କିଚ୍ଚା ସୁଦୀପଙ୍କ ସମେତ ପ୍ରତିଯୋଗୀମାନଙ୍କୁ ଶୋ’ରୁ ବାହାର କରାଯିବ । ଘରର ଦ୍ୱାର ସିଲ୍ କରାଯାଇଥିବା ଏକ ଭିଡିଓ ମଧ୍ୟ ସାମ୍ନାକୁ ଆସିଛି ।

ବୋର୍ଡ ଏକ ନୋଟିସରେ ୱେଲ୍ସ ଷ୍ଟୁଡିଓ ଏବଂ ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡକୁ ତତ୍କାଳ ପ୍ରଭାବରୁ ସମସ୍ତ କାର୍ଯ୍ୟକଳାପ ବନ୍ଦ କରିବାକୁ ନିର୍ଦ୍ଦେଶ ଦେଇଛି । ବୋର୍ଡ କହିଛି, "ଉକ୍ତ ପରିସରଗୁଡ଼ିକ ବଡ଼ ଧରଣର ମନୋରଞ୍ଜନ ଏବଂ ଷ୍ଟୁଡିଓ କାର୍ଯ୍ୟ ପାଇଁ ବ୍ୟବହୃତ ହେଉଛି । କିନ୍ତୁ ଜଳ (ପ୍ରଦୂଷଣ ନିବାରଣ ଏବଂ ନିୟନ୍ତ୍ରଣ) ଆଇନ, ୧୯୭୪ଏବଂ ବାୟୁ (ପ୍ରଦୂଷଣ ନିବାରଣ ଏବଂ ନିୟନ୍ତ୍ରଣ) ଆଇନ, ୧୯୮୧ ଅନୁଯାୟୀ ଆବଶ୍ୟକୀୟ ସହମତି ନିଆଯାଇ ନାହିଁ ।"

ନୋଟିସରେ ଆହୁରି ଉଲ୍ଲେଖ କରାଯାଇଛି, "ପରିବେଶ ଉଲ୍ଲଂଘନକୁ ଦୃଷ୍ଟିରେ ରଖି, ତତ୍କାଳ ପ୍ରଭାବରୁ କାର୍ଯ୍ୟ ବନ୍ଦ କରିବାକୁ ଏବଂ ନିର୍ଦ୍ଧାରିତ ସମୟ ମଧ୍ୟରେ  ସ୍ପଷ୍ଟୀକରଣ ଦାଖଲ କରିବାକୁ ନିର୍ଦ୍ଦେଶ ଦିଆଯାଉଛି।" ନିର୍ଦ୍ଦେଶକୁ କାର୍ଯ୍ୟକାରୀ ପାଇଁ ବନ୍ଦ ନିର୍ଦ୍ଦେଶର କପି ରାମନଗର ଡେପୁଟି କମିଶନର, BESCOMର ପରିଚାଳନା ନିର୍ଦ୍ଦେଶକ ଏବଂ ଅନ୍ୟ ଅଧିକାରୀଙ୍କୁ ମଧ୍ୟ ନୋଟିସ ପଠାଯାଇଛି ।

ଦକ୍ଷିଣ ଅଭିନେତା କିଚ୍ଚା ସୁଦୀପଙ୍କ ଦ୍ୱାରା ହୋଷ୍ଟ ବିଗ୍ ବସ୍ କନ୍ନଡକୁ ବିଦାଦିର ଏକ ସ୍ୱତନ୍ତ୍ର ଭାବରେ ନିର୍ମିତ ସେଟରେ ଅନେକ ବର୍ଷ ଧରି ସୁଟିଂ କରାଯାଉଛି । ରାଜ୍ୟର ସର୍ବାଧିକ ଦେଖାଯାଉଥିବା ଟେଲିଭିଜନ କାର୍ଯ୍ୟକ୍ରମ ମଧ୍ୟରୁ ଏହି ଶୋ' ହେଉଛି ଗୋଟିଏ । ଏହି ବନ୍ଦ ନିର୍ଦ୍ଦେଶ ଶୋ'ର ସିଜିନ୍ ୧୨ ଉପରେ କି ପ୍ରଭାବ ପକାଇବ ତାହା ଦେଖିବା ବାକି ଅଛି ।