କଟକ ୨୫।୦୪ : ହାଇକୋର୍ଟଙ୍କ ଅଶ୍ୱସ୍ତି । କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ବିରୋଧରେ ଦାଏର ଏକ ମାମଲାକୁ ହାଇକୋର୍ଟ ଖାରଜ କରିଛନ୍ତି । ଏହାସହ ଆବେଦନକାରୀଙ୍କ ଉପରେ ୫ ଲକ୍ଷ ଟଙ୍କା ଜରିମାନାର ନିର୍ଦ୍ଦେଶ ଦେଇଛନ୍ତି । ରାଜନୈତିକ ଉଦ୍ଦେଶ୍ୟ ରଖି ମାମଲା ଦାଏର କରାଯାଇଛି ବୋଲି ହାଇକୋର୍ଟ ମତବ୍ୟକ୍ତ କରିଛନ୍ତି ।
୨୦୧୯ରେ ରାଜ୍ୟସଭା ପାଇଁ ପ୍ରାର୍ଥିପତ୍ର ଦାଖଲ ସମୟରେ କେନ୍ଦ୍ରମନ୍ତ୍ରୀ ଶ୍ରୀ ବୈଷ୍ଣବ ଯେଉଁ ସତ୍ୟପାଠ ଦାଖଲ କରିଥିଲେ । ସେଥିରେ ମିଥ୍ୟା ସୂଚନା ଦେଇଥିବା ଦର୍ଶାଇ ଭାଗ୍ୟଧର ବେହେରା ଏହି ମାମଲା ଦାଏର କରିଥିଲେ । ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ଚକ୍ରଧାରୀ ଶରଣ ସିଂ ଏବଂ ଜଷ୍ଟିସ୍ ଏମ୍.ଏସ୍. ରମଣଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରି ପିଟିସନ୍ ଖାରଜ କରିଛନ୍ତି । ଏହାସହ ଆବେଦନକାରୀଙ୍କ ଉପରେ ଏହି ଜରିମାନା ମଧ୍ୟ ଲାଗୁ କରିଛନ୍ତି । ଆବେଦନକାରୀ ଶ୍ରୀ ବେହେରା ଆସନ୍ତା ଦୁଇ ସପ୍ତାହ ମଧ୍ୟରେ ଜରିମାନା ଅର୍ଥ ହାଇକୋର୍ଟ ବାର୍ ଆସୋସିଏସନ୍ କଲ୍ୟାଣ ପାଣ୍ଠିରେ ଜମା କରିବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି ।
ଆବେଦନକାରୀ ପିଟିସନ୍ରେ ଅଭିଯୋଗ କରିଥିଲେ ଯେ, ଅଶ୍ୱିନୀ ବୈଷ୍ଣବ ଓଡ଼ିଶାରୁ ରାଜ୍ୟସଭାକୁ ଯିବା ଲାଗି ୨୦୧୯ ମସିହାରେ ଯେଉଁ ନାମାଙ୍କନପତ୍ର ଦାଖଲ କରିଥିଲେ । ସେଥିରେ ସେ ସତ୍ୟପାଠରେ ମିଥ୍ୟା ସୂଚନା ଦେଇଥିଲେ । ଏନେଇ ଆବେଦନକାରୀ ଭାରତୀୟ ନିର୍ବାଚନ ଆୟୋଗଙ୍କ ନିକଟରେ ଅଭିଯୋଗ କରିଥିଲେ । କିନ୍ତୁ ଆୟୋଗ ଏହା ଉପରେ କୌଣସି ପଦକ୍ଷେପ ନନେବାରୁ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ନିର୍ବାଚନ କମିସନଙ୍କୁ ଏହା ଉପରେ ତ୍ୱରିତ ପଦକ୍ଷେପ ନେବା ଲାଗି ହାଇକୋର୍ଟ ନିର୍ଦ୍ଦେଶ ଦେବାକୁ ଆବେଦନକାରୀ ପିଟିସନ୍ରେ ପ୍ରାର୍ଥନା କରିଥିଲେ । ହାଇକୋର୍ଟ ଏହା ଉପରେ ଶୁଣାଣି କରି ଆବେଦନକାରୀଙ୍କ ଉପରେ ଭୀଷଣ କ୍ଷୁବ୍ଧ ହୋଇଥିଲେ । ବୁଧବାର ଏହା ଉପରେ ପୁନର୍ବାର ଶୁଣାଣି ହୋଇଥିଲା । ନିଜେ ଆବେଦନକାରୀ ଅଦାଲତରେ ଉପସ୍ଥିତ ରହି ଏହି ପିଟିସନ୍କୁ ପ୍ରତ୍ୟାହାର ପାଇଁ ପ୍ରାର୍ଥନା କରିଥିଲେ । ହାଇକୋର୍ଟ ମାମଲା ଖାରଜ ସହ ପ୍ରତ୍ୟାହାର ଅନୁମତି ପ୍ରଦାନ କରିଥିଲେ । ସେହିପରି ଆବେଦନକାରୀଙ୍କ ଉପରେ ୫ ଲକ୍ଷ ଟଙ୍କାର ଜରିମାନା ମଧ୍ୟ କରିଛନ୍ତି । ରାଜ୍ୟ ସରକାରଙ୍କ ପକ୍ଷରୁ ଏଜିଏ ଦେବକାନ୍ତ ମହାନ୍ତି ଏହି ମାମଲା ପରିଚାଳନା କରୁଥିଲେ ।
