ପୁରୀ ୧୬/୦୫: ଦିନକୁ ଦିନ ଗତି ଧରୁଛି ରଥ ନିର୍ମାଣ । ବୁଧବାର ସନ୍ଧ୍ୟା ସୁଦ୍ଧା ରଥ ଖଳାରେ ୪୨ ତୁମ୍ବ ଗୋଲେଇ ସରିଛି । ଗୁରୁବାର ରଥ ଖଳାରେ ତୁମ୍ବରେ ସୂତା ବାଡ଼ିଆ ହେବ । ଏଥିରେ ପାହି ମହାରଣା ଓ ସୁତାର ମହାରଣାଙ୍କ ପ୍ରମୁଖ ଭୂମିକା ରହିବ । ଅପରାହ୍ନରେ ତୁମ୍ବରେ ବିନ୍ଧ ଅନୁକୂଳ ନେଇ ପ୍ରସ୍ତୁତି ଚାଲିଛି ।
ତିନି ରଥର ମୁଖ୍ୟ ବିଶ୍ୱକର୍ମା ବିନ୍ଧ ଅନୁକୂଳ କରିବେ । ଆଜି ଅପରାହ୍ନରେ ଶ୍ରୀମନ୍ଦିର ପ୍ରଶାସନିକ ଅଧିକାରୀ ଓ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ରଥ ଖଳା ପରିଦର୍ଶନ କରିବା ସହ ରଥ ନିର୍ମାଣ କାର୍ଯ୍ୟ ଅନୁଧ୍ୟାନ କରିଥିଲେ । ସନ୍ଧ୍ୟା ସୁଦ୍ଧା ତିନି ରଥର ମୋଟ ୪୨ ଗୋଟି ତୁମ୍ବର ଗୋଲେଇ ତଥା ମଠା କାର୍ଯ୍ୟ ଶେଷ ହୋଇଛି ।
ଏହାପରେ ତୁମ୍ବରେ ସୁତା ମରା ଓ ବିନ୍ଧ ଖୋଦେଇ ହେବ । କରତି ସେବକମାନେ ତୁମ୍ବର ଘେର କାଟି ତିନି ରଥ ବିଶ୍ୱକର୍ମାଙ୍କୁ ଯୋଗାଇବେ । ସୁତାବାଡ଼ିଆ ପରେ ତୁମ୍ବର ବଳକା ଅଂଶର ଠେକ ତୁଲିଆ କାର୍ଯ୍ୟ ହେବ । ପରେ ମାପ ଚୁପ ହୋଇ ବିନ୍ଧ ଅନୁକୂଳ ହେବ । ବିନ୍ଧରେ ଅର ଖଞ୍ଜାଯିବ । ସେଥିରେ ପହି ଯୋଡ଼ାଯାଇ ଚକ ତିଆର ହେବ । ଗୋଟିଏ ତୁମ୍ବରେ ୪ଗୋଟି ପହି ଲାଗିବ ।
ସେପଟେ ଦୋଳବେଦିସ୍ଥିତ ୩ଟି ଅସ୍ଥାୟୀ ଶାଳରେ ଓଝା ସେବକମାନେ ଅର କଣ୍ଟା ଓ ପନ୍ଦାରି ଆଦି ତିଆରୁଛନ୍ତି । ଆଜି ରଥ ନିର୍ମାଣରେ ୪୭ ଜଣ ବିଶ୍ୱକର୍ମା, ୯ ଓଝା, ୪ କରତି ଓ ୨୭ ଭୋଇ ସେବକ, ୧ ତୁମ୍ବ ବିନ୍ଧ କାରିଗର ଓ ରଥ ଖଳା ସହାୟକଙ୍କୁ ମିଶାଇ ମୋଟ ୮୯ ଜଣ ରଥ ନିର୍ମାଣ ନିୟୋଜିତ ଥିବା ଶ୍ରୀମନ୍ଦିର ପ୍ରଶାସନ ଲୋକ ସମ୍ପର୍କ ଅଧିକାରୀ ଜିତେନ୍ଦ୍ର ମହାନ୍ତି ସୂଚନା ଦେଇଛନ୍ତି ।
