ନେପାଳରେ ପ୍ରତିବାଦକାରୀଙ୍କ ମଧ୍ୟରେ ବନ୍ଧୁକଧାରୀ କିଏ ? ଏବେ କାହା ହାତକୁ ଯିବ କ୍ଷମତା?

କାଠମାଣ୍ଡୁ ୧୦/୦୯: ଦୁଇ ଦିନ ମଧ୍ୟରେ ପୁରା ବଦଳି ଯାଇଛି ନେପାଳ ଚିତ୍ର । ପ୍ରତିବାଦ କରିବାର ଷ୍ଟାଇଲ୍ ବି ବଦଳି ଯାଇଛି । ସୋମବାର ଦିନ ରାଜଧାନୀ କାଠମାଣ୍ଡୁର ରାସ୍ତାରେ ସ୍କୁଲ ଓ କଲେଜ ଛାତ୍ରମାନେ ସୋସିଆଲ ମିଡିଆ ପ୍ରତିବନ୍ଧକ ବିରୋଧରେ ପ୍ରତିବାଦ କରୁଥିଲେ । କିନ୍ତୁ ମାତ୍ର ୨୪ ଘଣ୍ଟା ମଧ୍ୟରେ ପରିସ୍ଥିତି ନେଇଥିଲା ହିଂସାତ୍ମକ ରୂପ । ମଙ୍ଗଳବାର ଦିନ, ପ୍ରଦର୍ଶନକାରୀମାନେ ଅସ୍ତ୍ରଶସ୍ତ୍ର ଧରି ହିଂସାତ୍ମକ ରୂପରେ ବାହାରି ଆସିଥିଲେ । ଅଜ୍ଞାତ ସଶସ୍ତ୍ର ଲୋକମାନେ ପ୍ରତିବାଦର ଅଂଶ ହୋଇ ସରକାରଙ୍କ ବିରୋଧରେ ହିଂସାର ପଥ ଗ୍ରହଣ କରୁଛନ୍ତି । 
 

ବିଶେଷଜ୍ଞଙ୍କ କହିବା କଥା ନେପାଳରେ ଏହି ବିଶୃଙ୍ଖଳା ସ୍ଥିତି ପଛରେ କିଛି ସ୍ୱାର୍ଥପର ଗୋଷ୍ଠୀ ଓ ରାଜନୈତିକ ନେତାଙ୍କ ରହିଛି ହାତ । ଯେଉଁମାନେ ଏହି ପରିବେଶର ସୁଯୋଗ ନେଇ ସରକାର ପରିବର୍ତ୍ତନ କରିବାକୁ ଚେଷ୍ଟା କରୁଛନ୍ତି । ପ୍ରତିବାଦର ଆଡ଼ରେ ଶିଳ୍ପ ପ୍ରତିଷ୍ଠାନ, ସରକାରୀ କାର୍ଯ୍ୟାଳୟ ଏବଂ ପୋଲିସ ଷ୍ଟେସନ ଉପରେ ଆକ୍ରମଣ କରାଯାଉଛି। ମଲ୍ ଏବଂ ବ୍ୟାଙ୍କରେ ପଶି ଭଙ୍ଗାରୁଜା ଏବଂ ଲୁଟପାଟ ଘଟଣା ସାମ୍ନାକୁ ଆସିଛି। ପ୍ରତିବାଦକାରୀମାନେ ରାଷ୍ଟ୍ରପତି ଭବନ, ସଂସଦ, ସୁପ୍ରିମକୋର୍ଟ ଏବଂ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି। ଅନେକ ମନ୍ତ୍ରୀଙ୍କ ଘରକୁ ମଧ୍ୟ ଟାର୍ଗେଟ କରାଯାଇଥିଲା। ସେମାନଙ୍କୁ ରାସ୍ତାରେ ମାଡ଼ ମଧ୍ୟ ଖାଇବାକୁ ପଡିଥିଲା। 

ପରିସ୍ଥିତି ଖରାପ ହେଉଥିବା ଦେଖି, ନେପାଳ ସେନାକୁ ପରିସ୍ଥିତି ପରିଚାଳନା କରିବାର ଦାୟିତ୍ୱ ଦିଆଯାଇଥିଲା। ତଥାପି, ଗୋଟିଏ ଦିନ ପୂର୍ବରୁ ପ୍ରଧାନମନ୍ତ୍ରୀ କେପି ଶର୍ମା ଓଲି ସେନାକୁ ସାହାଯ୍ୟ ପାଇଁ ନିବେଦନ କରିଥିଲେ, କିନ୍ତୁ ସେନା ହସ୍ତକ୍ଷେପ କରିବାକୁ ମନା କରିଦେଇଥିଲା । ଏହା ପରେ ଓଲିଙ୍କୁ ଇସ୍ତଫା ଦେବାକୁ ପଡିଲା ଏବଂ ସେ ହେଲିକପ୍ଟର ଯୋଗେ ଏକ ସୁରକ୍ଷିତ ସ୍ଥାନକୁ ଚାଲିଗଲେ। ସୋସିଆଲ ମିଡିଆ ପ୍ରତିବନ୍ଧକ ଏବଂ ଦୁର୍ନୀତି ବିରୋଧରେ ପ୍ରତିବାଦ ସ୍ୱରୂପ ଏହି ହିଂସାତ୍ମକ ଆନ୍ଦୋଳନ ଆରମ୍ଭ ହୋଇଥିଲା।

କିନ୍ତୁ ପ୍ରତିବାଦ ଶାନ୍ତିପୂର୍ଣ୍ଣ ରହିଥିଲେ ମଧ୍ୟ ହଠାତ୍ ହିଂସା ଏବଂ ବିଶୃଙ୍ଖଳାରେ ପରିଣତ ହୋଇଥିଲା। ଗୋଟିଏ ଚିତ୍ରରେ, ପ୍ରତିବାଦକାରୀମାନେ ସୁପ୍ରିମକୋର୍ଟ ସମ୍ମୁଖରେ ଅସ୍ତ୍ରଶସ୍ତ୍ର ଉଠାଇ ଠିଆ ହୋଇଥିବା ଦେଖାଯାଉଛି, ଅନ୍ୟ ଏକ ଚିତ୍ରରେ ସେମାନେ ସିଂହା ଦୁର୍ଗାବାର କାର୍ଯ୍ୟାଳୟ ପରିସରକୁ କବଜା କରି ହିଂସା ଚଳାଇଛନ୍ତି। ପ୍ରତିବାଦ ସମୟରେ, ଅନେକ ଯାନବାହାନ ପୋଡ଼ି ଦିଆଯାଇଛି। ପୋଲିସ ଷ୍ଟେସନ ଭଙ୍ଗାରୁଜା କରାଯାଇଛି ଏବଂ ସରକାରୀ ପ୍ରତିଷ୍ଠାନରେ ନିଆଁ ଲଗାଯାଇଛି।