ରାଜନଗର BDOଙ୍କୁ ଦୁର୍ବ୍ୟହାର ଘଟଣାରେ ନୂଆମୋଡ଼, ସମର୍ଥନରେ ଓଏଏସ ସଂଘ, ସେପଟେ ଛୁଟିରେ ବିଡିଓ

କେନ୍ଦ୍ରାପଡ଼ା: କେନ୍ଦ୍ରାପଡା ରାଜନଗର ବ୍ଲକ୍ ବିଡିଓଙ୍କୁ କାର୍ଯ୍ୟାଳୟରେ ଦୁର୍ବ୍ୟବହାର ଘଟଣାରେ ନୂଆ ମୋଡ ଆସିଛି। ବିଡିଓ ତିଲୋତ୍ତମା ପୃଷ୍ଟିଙ୍କ ଅଭିଯୋଗ ପରେ ଏବେ ଓଏଏସ ସଂଘ ତାଙ୍କ ସପକ୍ଷରେ ବାହାରିଛି। ସଂଘର କାର୍ଯ୍ୟକର୍ତ୍ତା ଜିଲ୍ଲାପାଳଙ୍କୁ ଭେଟି ଅଭିଯୁକ୍ତମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଅନ୍ୟପକ୍ଷରେ ବିଡିଓଙ୍କୁ ନ୍ୟାୟ ଦାବି କରି ବ୍ଲକ୍ ଅଫିସ ଆଗରେ ଧାରଣାରେ ବସିଛି ସରପଞ୍ଚ ସଂଘ। ସେପଟେ ଥାନାରେ ଏତଲା ନ ଦେଇ ବିଡିଓ ଛୁଟିରେ ଯିବା ଘଟଣା ମଧ୍ୟ ଅନେକ ପ୍ରଶ୍ନବାଚୀ ସୃଷ୍ଟି କରୁଛି।

ବ୍ଲକ ଅଧ୍ୟକ୍ଷଙ୍କ ଅଭିଯୋଗ ଆଧାରରେ କେନ୍ଦ୍ରାପଡ଼ା ରାଜନଗର ବ୍ଲକ୍ ବିଡିଓ ତିଲୋତମା ପୃଷ୍ଟିଙ୍କୁ ଦୁର୍ବ୍ୟବହାର ଘଟଣାର ତଦନ୍ତ କରିବ ପୋଲିସ। ତିଳୋତ୍ତମାଙ୍କ ସପକ୍ଷରେ ଓଏଏସ ସଂଘ ବାହାରିବା ପରେ ଜିଲ୍ଲାପାଳଙ୍କ ନିର୍ଦ୍ଦେଶରେ ଆରମ୍ଭ ହେବ ତଦନ୍ତ। ତେବେ ଘଟଣା ଘଟିବାର ୩ ଦିନ ପରେ ଜିଲ୍ଲା ଓଏଏସ ସଂଘ ଜିଲ୍ଲାପାଳଙ୍କୁ ଭେଟି ଅଭିଯୁକ୍ତମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଛି। ସରକାରୀ ଅଧିକାରୀମାନଙ୍କୁ କାର୍ଯ୍ୟକ୍ଷେତ୍ରରେ ସୁରକ୍ଷା ଓ ସମ୍ମାନ ନମିଳିଲେ ସାଧାରଣ କାର୍ଯ୍ୟ ବ୍ୟାହତ ହେବ ବୋଲି ସଂଘ ପକ୍ଷରୁ କୁହାଯାଇଛି।

ଘଟଣା ସମ୍ପର୍କରେ ଜିଲ୍ଲାସଂଘ ରାଜ୍ୟ ସଂଘକୁ ମଧ୍ୟ ଅବଗତ କରିଛି। ଘଟଣା ଘଟିବା ପରଠାରୁ ରାଜନଗର ବିଡିଓ ତିଳୋତ୍ତମା ପୃଷ୍ଟି ଛୁଟିରେ ଅଛନ୍ତି। ଅନ୍ୟପକ୍ଷରେ ଏହି ଘଟଣାରେ ରାଜନଗର ବ୍ଲକ୍ ଅଧ୍ୟକ୍ଷା ପ୍ରତିଭା ପାତ୍ର ସ୍ଥାନୀୟ ଥାନାରେ ବିଜେପି ନେତା ଲଲିତ କୁମାର ବେହେରାଙ୍କ ସମେତ ମୋଟ ୧୦ ଜଣଙ୍କ ନାମରେ ଏତଲା ଦେଇଛନ୍ତି। ଏହି ଏତଲା ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ବିଡିଓଙ୍କୁ ଦୁର୍ବ୍ୟବହାର ଘଟଣାର ପ୍ରତିବାଦ କରି ବ୍ଲକ୍ ସମ୍ମୁଖରେ ଧାରଣାରେ ବସିଛି ସରପଞ୍ଚ ଓ ସମିତି ସଭ୍ୟ ସଂଘ। ତାଙ୍କ ସହିତ ଧାରଣାରେ ବସିଛି ବ୍ଲକ୍ ଅଧ୍ୟକ୍ଷା। ଏହିଭଳି ଘଟଣା ବାରମ୍ବାର ଘଟୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆ ଯାଉନଥବା ସରପଞ୍ଚ ସଂଘ ଅଭିଯୋଗ କରିଛି। ଅନ୍ୟପକ୍ଷରେ ବ୍ରହ୍ମାନନ୍ଦ ସେଠୀ ନାମକ ଜଣେ ବ୍ୟକ୍ତି ବ୍ଲକ୍ ଅଧ୍ୟକ୍ଷାଙ୍କ ବିରୁଦ୍ଧରେ ଦୁର୍ନୀତି ଅଭିଯୋଗ ଆଣି ରାଜନଗର ଥାନାରେ ଏତଲା ଦେଇଛି।

ସେହିପରି ବିଡିଓଙ୍କ ବଦଳି ଦାବି କରି ପ୍ରମୋଦ ବଳ ନାମକ ଜଣେ ସ୍ଥାନୀୟ ବ୍ୟକ୍ତି ପଞ୍ଚାୟତରାଜ ବିଭାଗକୁ ପତ୍ର ଲେଖିଥବା ଜଣା ପଡ଼ିଛି। ବିଡିଓଙ୍କୁ ଦୁର୍ବୟବହାର ଘଟଣା ଆରୋପ ପ୍ରତ୍ୟାରୋପ ଭିତରେ ଛନ୍ଦି ହୋଇ ପଡିଛି। ଅନ୍ୟପଟେ ବିଡିଓଙ୍କୁ ଦୁର୍ବ୍ୟବହାର କରିବା ଘଟଣାକୁ ଅସ୍ଵୀକାର କରିଛି ବିଜେପି ନେତା ଲଳିତ ବେହେରା। ଘଟଣାକୁ ୪ ଦିନ ବିତିଥିଲେ ସୁଦ୍ଧା ଏ ଯାଏ ବିଡିଓ ତିଳୋତ୍ତମା ପୃଷ୍ଟିଙ୍କ ପକ୍ଷରୁ ଥାନାରେ ଅଭିଯୋଗ ହୋଇ ନାହିଁ।