ନୂଆଦିଲ୍ଲୀ: ସ୍ବଦେଶୀ ଜ୍ଞାନ କୌଶଳରେ ନିର୍ମାଣ ହେବ ଏଚ-୧୩୦ ଲାଇଟ୍ ସିଙ୍ଗଲ୍ ଇଞ୍ଜିନ ହେଲିକପ୍ଟର ଫ୍ୟୁଏଲଏଜ୍ । ଏୟାରବସ୍ ଏନେଇ ମହିନ୍ଦ୍ରା ଏୟାରଷ୍ଟ୍ରକ୍ଚର୍ସ ଚୟନ କରିଛି । ମେକ୍ ଇନ ଇଣ୍ଡିଆ ଦିଗରେ ଏହା ଏକ ମହତ୍ବପୂର୍ଣ୍ଣ ଉପଲବ୍ଧି ହେବ ବୋଲି ଆଶା କରାଯାଉଛି । ମାର୍ଚ୍ଚ ୨୦୨୭ ସୁଦ୍ଧା ୟୁରୋପରୁ ଏୟାରବସ୍ ହେଲିକପ୍ଟରର ଆସେମ୍ବିଲ୍ ପାଇଁ ଡେଲିଭରି ଆରମ୍ଭ ହେବ । ଭାରତ ସରକାରଙ୍କ ବେସାମରିକ ବିମାନ ଚଳାଚଳ ମନ୍ତ୍ରୀ କେ.ଆର୍ ନାଇଡୁ, ବେସାମରିକ ବିମାନ ଚଳାଚଳ ସଚିବ ଭୁମଲୁନ୍ମାଙ୍ଗ ଭୁଲନମ, ଭାରତ ଓ ଦକ୍ଷିଣ ଏସିଆର ଏୟାରବସ୍ ଅଧ୍ୟକ୍ଷ ଏବଂ ପ୍ରବନ୍ଧ ନିର୍ଦ୍ଦେଶକ ରେମି ମେଲାର୍ଡଙ୍କ ସହିତ ମହିନ୍ଦ୍ରା ସମୂହର ଗ୍ରୁପ ସିଇଓ ଏବଂ ଏମଡି ଡ. ଅନିଶ ଶାହଙ୍କ ଭିତରେ ଚୁକ୍ତି ହୋଇଛି । ୮ ସିଟ୍ ବିଶିଷ୍ଟ ଏଚ-୧୩୦ ଏକ ଲୋକପ୍ରିୟ ହେଲିକପ୍ଟର । ପରିବହନ, ପର୍ଯ୍ୟଟନ, ଚିକିତ୍ସା, ନିରୀକ୍ଷଣ ଓ ଘରୋଇ ବିମାନ ଗତିବିଧିରେ ଏହାକୁ ବ୍ୟବହାର କରାଯାଇଥାଏ ।
ମହିନ୍ଦ୍ରା ସମୂହର ସହାୟକ କମ୍ପାନି ମହିନ୍ଦ୍ରା ଏୟାରଷ୍ଟ୍ରକ୍ଚର୍ସ ପ୍ରାଇଭେଚ୍ ଲିମିଟେଡକୁ ଏୟାରବସ୍ ହେଲିକପ୍ଟର୍ସ ଦ୍ବାରା ଏଚ-୧୩୦ ଲାଇଟ୍ ସିଙ୍ଗଲ୍ ଇଞ୍ଜିନ ହେଲିକପ୍ଟର ଫ୍ୟୁଏଲଏଜ୍ ନିର୍ମାଣ ଓ ଆସେମ୍ବିଲ୍ ପାଇଁ ଅନୁମତି ପ୍ରଦାନ କରାଯାଇଛି । ଏହି ଚୁକ୍ତିନାମା ପରେ ବୈଶ୍ବିକ ଏୟରୋସ୍ପେସ ସପ୍ଲାଏ ଶୃଙ୍ଖଳାରେ ମହିନ୍ଦ୍ରା ବିଶ୍ବସନୀୟ ଭାଗିଦାରୀ ଭାବେ ନିଜ ସ୍ଥିତିକୁ ଆହୁରି ମଜଭୁତ କରିଛି । ତେବେ ଏୟାରବସ୍ ଏଚ-୧୩୦ ହେଲିକପ୍ଟର ନିର୍ମାଣ ଓ ଆସେମ୍ବିଲ୍ କାର୍ଯ୍ୟ ଖୁବଶୀଘ୍ର ଆରମ୍ଭ ହେବ । ଏଥିପାଇଁ ୟୁରୋପରୁ ସାମଗ୍ରୀ ପଠାଯିବ । ଆସନ୍ତା ଦୁଇ ବର୍ଷ ମଧ୍ୟରେ ପ୍ରଥମେ କ୍ୟାବିନ୍ ଆସେମ୍ବିଲ୍ ଡେଲିଭରି କରାଯିବ ।
