ହାଇଦ୍ରାବାଦ: ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ମ୍ୟାଚରେ ରୋ-କୋ ଯୋଡ଼ି ରେକର୍ଡ କରିଥିବା ବେଳେ ସେପଟେ ଘରୋଇ ଟି-୨୦ କ୍ରିକେଟରେ ହ୍ୟାଣ୍ଡସମ୍ ଓପନର ଅଭିଷେକ ଶର୍ମା ବିସ୍ଫୋରକ ଇନିଂସ ଖେଳିଛନ୍ତି। ୫୨ ବଲ୍‌ରେ ୧୪୮ ରନ୍‌ର ଧୂଆଁଦାର ଇନିଂସ ଖେଳିଛନ୍ତି ଏହି ପଞ୍ଜାବ ବ୍ୟାଟର। ବେଙ୍ଗଲ ପକ୍ଷରୁ ମହମ୍ମଦ ଶାମି ଓ ଆକାଶ ଦୀପଙ୍କ ଭଳି ଅନୁଭବି ବୋଲରଙ୍କ ଆଟାକ ସତ୍ତ୍ୱେ ବି ପଞ୍ଜାବ ପକ୍ଷରୁ ଖେଳୁଥିବା ଶର୍ମା ରେକର୍ଡକାରୀ ବ୍ୟଟିଂ କରିଛନ୍ତି। ତାଙ୍କର ଏହି ବିସ୍ଫୋରକ ଇନିଂସ ବଳରେ ପଞ୍ଜାବ ୫ ୱିକେଟ ହରାଇ ବିଶାଳ ୩୧୦ ରନ୍ କରିପାରିଛି। ଯାହା ଟି-୨୦ ଫର୍ମାଟ୍‌ରେ ଚତୁର୍ଥ ବଡ଼ ସ୍କୋର।

କେବଳ ସେତିକି ନୁହେଁ, ଅଭିଷେକ ଶର୍ମା ଟି-୨୦ ଫର୍ମାଟ୍‌ରେ ଦ୍ରୁତତମ ଅର୍ଦ୍ଧଶତକ ହାସଲ କରିବାରେ ଗୁରୁ ଯୁବରାଜଙ୍କ ସହ ସମକକ୍ଷ ହୋଇଛନ୍ତି। ଉଭୟ ଗୁରୁ ଶିଷ୍ୟ ମିଳିତ ଭାବେ ମାତ୍ର ୧୨ ବଲ୍‌ରେ ଅର୍ଦ୍ଧଶତକ ହାସଲ କରିବାର ରେକର୍ଡ କରିଛନ୍ତି। ସୟଦ ମୁସ୍ତାକ ଅଲି ଟ୍ରଫି ମ୍ୟାଚ୍‌ରେ ଟସ୍ ଜିତିବା ପରେ ପ୍ରଥମେ ବ୍ୟାଟିଂ କରି ପଞ୍ଜାବ ଅଧିନାୟକ ଅଭିଷେକ ଶର୍ମା ମାତ୍ର ୧୨ ବଲ୍‌ରେ ୫ଟି ଛକା ଓ ୫ ଚୌକା ସହ ୫୦ ରନ୍ ସଂଗ୍ରହ କରିଥିଲେ।

୧୨ ବଲ୍‌ରେ ଅର୍ଦ୍ଧଶତକ ହାସଲ କରିବା ପରେ ଶର୍ମା ୩୨ ବଲ୍‌ରେ ଶତକ ପୂରା କରିଥିଲେ। ଏପରି କରି ସେ ମିଳିତ ଭାବରେ ତୃତୀୟ ଭାରତୀୟ ବ୍ୟାଟର ଭାବେ ୩୨ ବଲ୍‌ରେ ଅର୍ଦ୍ଧଶତକ ହାସଲ କରିବାର ରେକର୍ଡ କରିଛନ୍ତି। ଏହା ପୂର୍ବରୁ ଋଷବ ପନ୍ତ ୨୦୧୮ରେ ମଧ୍ୟ ୩୨ ବଲ୍‌ରେ ଶତକ ହାସଲ କରିଥିଲେ। ସେହିପରି ଏସିଆକପ ରାଇଜିଂ ଷ୍ଟାର୍ ୨୦୨୫ ମୁକାବିଲାରେ ବୈଭବ ସୂର୍ଯ୍ୟବଂଶୀ ମଧ୍ୟ ୩୨ ବଲ୍‌ରେ ଶତକ ହାସଲ କରିଛନ୍ତି।

ତେବେ ଅଭିଷେକ ଏହ ଶତକ ହାସଲ କରିବା ସହିତ କମ ଇନିଂସରେ ଶତକ ହାସଲ କରିବାରେ ମଧ୍ୟ ସେ ରୋହିତ ଶର୍ମାଙ୍କ ରେକର୍ଡ ସମକକ୍ଷ ହୋଇଛନ୍ତି। ଏହି ଇନିଂସକୁ ମିଶାଇଲେ ଅଭିଷେକ ୧୫୭ ଇନିଂସ ଖେଳି ଅଷ୍ଟମ ଟି-୨୦ ଶତକ ହାସଲ କରିଛନ୍ତି, ଯାହା ରୋହିତ ଶର୍ମାଙ୍କ ରେକର୍ଡ ସମକକ୍ଷ ହୋଇଛି। ଏ କ୍ଷେତ୍ରରେ କେବଳ ବିରାଟ ୯ଟି ଶତକ ସହ ଆଗରେ ଅଛନ୍ତି। ଅଭିଷେକଙ୍କର ଆଜିର ଶତକରେ ୧୬ଟି ଛକ୍କା ଓ ୮ଟି ଚୌକା ସାମିଲ ଥିଲା। ଏହି ମ୍ୟାଚ୍‌ରେ ସେ ୫୨ ବଲ୍‌ରେ ୧୪୮ ରନ୍ କରି ଦୀପଙ୍କ ଶିକାର ହୋଇଥିଲେ।

ଏହି ଗୋଟିଏ ମ୍ୟାଚ୍‌ରେ ରେକର୍ଡର ବର୍ଷା କରିଛନ୍ତି ଅଭିଷେକ ଶର୍ମା। ଏହି ଇନିଂସ ସହିତ, ୨୫ ବର୍ଷୀୟ ଖେଳାଳି ଚଳିତ ବର୍ଷ ଟି-୨୦ରେ ତାଙ୍କର ଛକା ସଂଖ୍ୟା ୯୧ ରେ ପହଞ୍ଚିଛି। ଯାହା ଗୋଟିଏ କ୍ୟାଲେଣ୍ଡର ବର୍ଷରେ ଭାରତୀୟ ବ୍ୟାଟର ମରାଯାଇଥିବା ସର୍ବାଧିକ ଛକ୍କା। ଏହା ପୂର୍ବରୁ ସେ ଗତ ବର୍ଷ ୮୭ ଛକା ରେକର୍ଡ କରିଥିଲେ।।

ଏହା ପୂର୍ବରୁ ଗତ ବର୍ଷ ମେଘାଳୟ ବିରୁଦ୍ଧରେ ଖେଳି ଅଭିଷେକ ଶର୍ମା ମିଳିତ ଭାବେ ୨୮ ବଲ୍ରେ ଶତକ ହାସଲ କରିବାରେ ଦ୍ୱିତୀୟ ଭାରତୀୟ ବ୍ୟାଟର ହୋଇଥିଲେ। ଉର୍ଭିଲ୍ ପଟେଲ ମଧ୍ୟ ସମାନ ରେକର୍ଡ କରିଥିଲେ।

ଗୋଟିଏ କ୍ୟାଲେଣ୍ଡର ବର୍ଷରେ ଜଣେ ଭାରତୀୟଙ୍କ ଦ୍ୱାରା ସର୍ବାଧିକ ଟି-୨୦ ଛକା

• ୯୧* (୩୩ ଇନିଂସ) – ଅଭିଷେକ ଶର୍ମା (୨୦୨୫)
• ୮୭ (୩୮ ଇନିଂସ) – ଅଭିଷେକ ଶର୍ମା (୨୦୨୪)
• ୮୫ (୪୧ ଇନିଂସ) – ସୂର୍ଯ୍ୟକୁମାର ଯାଦବ (୨୦୨୨)
• ୭୧ (୩୩ ଇନିଂସ) – ସୂର୍ଯ୍ୟକୁମାର ଯାଦବ (୨୦୨୩)
• ୬୬ (୩୧ ଇନିଂସ) – ରିଷଭ ପନ୍ତ (୨୦୧୮)
• ୬୩ (୪୨ ଇନିଂସ) – ଶ୍ରେୟସ ଆୟର (୨୦୧୯)
• ୬୦ (୩୨ ଇନିଂସ) – ସଞ୍ଜୁ ସାମସନ (୨୦୨୪)