ଖୋର୍ଦ୍ଧା: ଭାରସାମ୍ୟ ହରାଇ ଗଛରେ ପିଟିଲା ଘରୋଇ ଯାତ୍ରୀ ବାହୀ ବସ୍। ଏଥିରେ ୫ ଯାତ୍ରୀ ଗୁରୁତର ହୋଇଥିବାବେଳେ ୧୦ ଜଣ ଆହତ ହୋଇଛନ୍ତି। ସମସ୍ତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣା ଘଟିଛି ବୋଲଗଡ଼ ଗୋପବନ୍ଧୁ ଛକ ନିକଟରେ।
ସୂଚନା ଅନୁଯାୟୀ, ସୋମବାର ଅପରାହ୍ନ ସାଢ଼େ ୪ଟାବେଳେ ଘଟିଛି ଏହି ଦୁର୍ଘଟଣା। ଘରୋଇ ବସ୍ ନାରାୟଣୀ ଭୁବନେଶ୍ବରେ ଅଭିମୁଖେ ଆସୁଥିବାବେଳେ ୫୭ ନମ୍ବର ଜାତୀୟ ରାଜପଥର ବୋଲଗଡ଼ ଗୋପବନ୍ଧୁ ଛକଠାରେ ଦୁର୍ଘଟଣାଗ୍ରସ୍ତ ହୋଇଥିଲା।ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ବସ୍ଟିର ପତା ଭାଙ୍ଗିଯିବାରୁ ଭାରସାମ୍ୟ ହରାଇ ରାସ୍ତା ପାର୍ଶ୍ବକୁ ଖସିପଡ଼ିବା ସହ ଏକ ଗଛରେ ପିଟିହୋଇଯାଇଥିଲା। ଦୁର୍ଘଟଣାରେ ବସ୍ଟିର ସମ୍ମୁଖ ଭାଗ ସଂପୂର୍ଣ୍ଣ ଭାବରେ ଭାଙ୍ଗିଯାଇଛି।
ତେବେ ସମସ୍ତ ଆହତଙ୍କୁ ବୋଲଗଡ଼ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ଗୁରୁତର ୫ ଜଣକୁ ଖୋର୍ଦ୍ଧା ମେଡିକାଲ ଏବଂ ସେମାନଙ୍କ ମଧ୍ୟରୁ ତିନି ଜଣକୁ ଭୁବନେଶ୍ବର ସ୍ଥାନାନ୍ତର କରାଯାଇଛି। ବସ୍ରେ ପ୍ରାୟ ୫୦ରୁ ଅଧିକ ଯାତ୍ରୀ ଥିଲେ।
