କତାରରେ ବି ମିଳିବ ୟୁପିଆଇ ସେବା, ଭାରତୀୟ ଯାତ୍ରୀଙ୍କ ପାଇଁ ଆରମ୍ଭ ହେଲା ସୁବିଧା

ନୂଆଦିଲ୍ଲୀ: ଭାରତର ଡିଜିଟାଲ ପେମେଣ୍ଟ ସିଷ୍ଟମ ୟୁପିଆଇ, କେବଳ ଦେଶ ଭିତରେ ସୀମିତ ହୋଇ ରହିନାହିଁ। ବିଦେଶରେ ମଧ୍ୟ ଏହା ବେଶ୍ ଲୋକପ୍ରିୟ ହୋଇଛି। ୟୁଏଇ, ଫ୍ରାନ୍ସ, ସିଙ୍ଗାପୁର ଭଳି ଦେଶରେ ଏହାଦ୍ବାରା ଭାରତୀୟମାନେ ନେଣଦେଣ କରିପାରୁଥିବାବେଳେ, ଏବେ ଏହିକ୍ରମରେ ଆଉ ଏକ ଦେଶର ନାଁ ଯୋଡ଼ି ହୋଇଛି। ଭାରତୀୟଙ୍କ ଜୀବନର ଏକ ଅଂଶ ହୋଇସାରିଥିବା ୟୁପିଆଇ ଏବେ କତାରରେ ମଧ୍ୟ ବ୍ୟବହାର ହୋଇପାରିବ। କତାରରେ ୟୁପିଆଇ ସେବା ପାଇଁ ଏନପିସିଆଇ ଇଣ୍ଟରନ୍ୟାସନାଲ ପେମେଣ୍ଟ୍ସ ଲିମିଟେଡ (NIPL) ଏବଂ କତାର ନ୍ୟାସନାଲ ବ୍ୟାଙ୍କ୍ (QNB) ସହଭାଗିତାରେ କତାରରେ ୟୁପିଆଇ ସେବାର ଆରମ୍ଭ ହୋଇଛି।

ତେବେ ଡିଲ୍‌ ଅନୁସାରେ ବର୍ତ୍ତମାନ ଭାରତୀୟ ଯାତ୍ରୀ କତାରର ପ୍ରମୁଖ ପର୍ଯ୍ୟଟନ ସ୍ଥଳ ଏବଂ କତାର ଡ୍ୟୁଟି ଫ୍ରି ଆଉଟଲେଟ୍‌ ମାନଙ୍କରେ ସହଜରେ ୟୁପିଆଇ ଦ୍ବାରା ପେମେଣ୍ଟ କରିପାରିବେ। ପୂର୍ବରୁ ଭାରତୀୟ ଯାତ୍ରୀଙ୍କୁ କତାରରେ କିଣାକିଣା କିମ୍ବା କୌଣସି ସେବାର ଲାଭ ନେବା ପାଇଁ ନଗଦ କିମ୍ବା କ୍ରେଡିଟ୍ ଏବଂ ଡେବିଟ୍‌ କାର୍ଡର ସାହାଯ୍ୟ ନେବାକୁ ପଡ଼ିଥିଲା। ହେଲେ ଏବେ ୟୁପିଆଇ ଯୋଗୁ ଏହା ସହଜ ହୋଇପାରିବ। ଭାରତୀୟ ଯାତ୍ରୀ ନିଜ ମୋବାଇଲରୁ ସିଧାସଳଖ ସ୍କାନ କରି ପେମେଣ୍ଟ କରିପାରିବେ। କତାରର ଡ୍ୟୁଟି ଫ୍ରି ଷ୍ଟୋରକୁ ପ୍ରତିଦିନି ହଜାର ହଜାର ଭାରତୀୟ ଯାଉଥିବାରୁ ଏହା ସେମାନଙ୍କୁ ପାଇଁ ବେଶ୍ ଆଶ୍ବସ୍ତିକର ହେବ।

ସୂଚନାଥାଉକି, କତାରକୁ ଆସୁଥିବା ଅନ୍ତର୍ଜାତୀୟ ପର୍ଯ୍ୟଟକଙ୍କ ମଧ୍ୟରେ ଭାରତ ଦ୍ବିତୀୟ ନମ୍ବରରେ ରହିଛି। ଏମିତିରେ ଏହି ପଦକ୍ଷେପ ଦ୍ବାରା ଭାରତୀୟ ଯାତ୍ରୀଙ୍କୁ ସବୁଠୁ ଅଧିକ ଉପକୃତ ହେବେ।

କତାରର ରିଟେଲ ଏବଂ ପର୍ଯ୍ୟଟନ ସେକ୍ଟରକୁ ମଧ୍ୟ ମିଳିବ ଫାଇଦା

ଏହି ପଦକ୍ଷେପ କେବଳ ଭାରତୀୟ ଯାତ୍ରୀଙ୍କୁ ଆଶ୍ବସ୍ତି ଦେବ ତାହା ନୁହେଁ ବରଂ କତାରର ବିଜନେସ ଏବଂ ଟୁରିଜିମ ସେକ୍ଟରକୁ ମଧ୍ୟ ନୂଆ ଦିଗ ଦେବ। ୟୁପିଆଇ ପେମେଣ୍ଟ ଆରମ୍ଭ ହେବା ଦ୍ବାରା QNB ସହ ଜଡ଼ିତ ବ୍ୟବସାୟୀଙ୍କ ଟ୍ରାଞ୍ଜାକ୍ସନ ଭଲ୍ୟୁମ ବଢ଼ିବ। ଫଳରେ କତାରରେ ଦୋକାନୀ ଏବଂ ସ୍ଥାନୀୟ ବ୍ୟବସାୟୀଙ୍କ ସହ ଅଧିକ ଗ୍ରାହକ ସିଧାସଳଖ ଯୋଡ଼ିହୋଇପାରିବେ। ସେମାନଙ୍କ ଆମଦାନୀ ମଧ୍ୟ ବଢ଼ିବ ଏବଂ ଦେଶର ଅର୍ଥନୀତି ମଧ୍ୟ ମଜଭୁତ ହେବ।

NPCI ଇଣ୍ଟରନ୍ୟାସନାଲ ବଡ଼ ଲକ୍ଷ୍ୟ

NPCI ଇଣ୍ଟରନ୍ୟାସନାଲର MD ଏବଂ CEO ରିତେଶ ଶୁକ୍ଲା କହିଛନ୍ତି ଯେ, ସେମାନଙ୍କର ଲକ୍ଷ୍ୟ ହେଉଛି ସାରା ବିଶ୍ୱରେ UPIକୁ ଲୋକପ୍ରିୟ କରାଇବା ଏବଂ ଏକ ଆନ୍ତଃପରିଚାଳିତ ବିଶ୍ୱ ପେମେଣ୍ଟ ନେଟୱାର୍କ ସୃଷ୍ଟି କରିବା। କତାର ସହ ଏହି ସହଭାଗୀତା ସେହି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ସେ କହିଛନ୍ତି ଏହା ଲକ୍ଷ ଲକ୍ଷ ଭାରତୀୟ ଯାତ୍ରୀଙ୍କୁ ଡିଜିଟାଲ୍ କାରବାରକୁ କେବଳ ସୁରକ୍ଷିତ ନୁହେଁ ବରଂ ସୁବିଧାଜନକ କରିବାରେ ସକ୍ଷମ କରିବ। ନଗଦ ଉପରେ ସେମାନଙ୍କର ନିର୍ଭରଶୀଳତା ହ୍ରାସ କରିବ।

କତାରର ପର୍ଯ୍ୟଟନ ଏବଂ ଖୁଚୁରା କ୍ଷେତ୍ରକୁ ଲାଭଦାୟକ କରିବ: QNB

କାତାର ନ୍ୟାସନାଲ ବ୍ୟାଙ୍କ (QNB)ର ଗ୍ରୁପ୍ ଚିଫ୍ ବିଜନେସ୍ ଅଫିସର୍ ୟୁସେଫ୍ ମହମୁଦ୍ ଅଲ୍-ନେମା କହିଛନ୍ତି ଯେ, UPIର ଶୁଭାରମ୍ଭ କତାର ପାଇଁ ଐତିହାସିକ। ଏହା କେବଳ ଭାରତୀୟ ଯାତ୍ରୀଙ୍କୁ ସୁବିଧା ପ୍ରଦାନ କରିବ ନାହିଁ ବରଂ ନଗଦବିହୀନ କାରବାରକୁ ମଧ୍ୟ ପ୍ରୋତ୍ସାହିତ କରିବ। ଏହା ସିଧାସଳଖ କତାରର ପର୍ଯ୍ୟଟନ ଏବଂ ରିଟେଲ କ୍ଷେତ୍ରକୁ ଲାଭଦାୟକ କରିବ। ସେ ଆହୁରି ମଧ୍ୟ କହିଛନ୍ତି ଯେ, ସ୍ଥାନୀୟ ବ୍ୟବସାୟୀମାନେ ଅଧିକ ଗ୍ରାହକଙ୍କୁ ଆକର୍ଷିତ କରି ଏବଂ ସେମାନଙ୍କୁ ସୁବିଧାଜନକ ଡିଜିଟାଲ୍ ପେମେଣ୍ଟ ବିକଳ୍ପ ପ୍ରଦାନ କରି ଯଥେଷ୍ଟ ଲାଭ ପାଇବେ।

ପ୍ରଥମ ମର୍ଚ୍ଚାଣ୍ଟ ହେଲା କତାର ଡ୍ୟୁଟି ଫ୍ରି

କତାର ଡ୍ୟୁଟି ଫ୍ରି ପକ୍ଷରୁ ଜାରି ବିବୃତ୍ତି ଅନୁସାରେ, ‘‘ଆମେ ସର୍ବଦା ଯାତ୍ରୀଙ୍କ ସୁବିଧାକୁ ଉନ୍ନତ କରିବା ପାଇଁ ପ୍ରତିବଦ୍ଧ। ଆମେ UPI ପେମେଣ୍ଟ ଆରମ୍ଭ କରିବାରେ ପ୍ରଥମ ଆଉଟଲେଟ୍ ହୋଇଥିବାରୁ ଗର୍ବିତ।’’ କତାର ଏୟାରୱେଜ୍ ଗ୍ରୁପର ମୁଖ୍ୟ ରିଟେଲ ଏବଂ ହସ୍ପିଟାଲିଟି ଅଧିକାରୀ ଥାବେଟ୍ ମୁସଲେହ କହିଛନ୍ତି ‘‘ଏହା ଭାରତୀୟ ଯାତ୍ରୀମାନଙ୍କୁ ହମ୍ମାଦ ଅନ୍ତର୍ଜାତୀୟ ବିମାନବନ୍ଦରରେ ଏକ ସମ୍ପୂର୍ଣ୍ଣ ନୂତନ ସପିଂ ଏବଂ ପେମେଣ୍ଟ ଅଭିଜ୍ଞତା ପ୍ରଦାନ କରିବ।’’

ଭାରତୀୟ ଡିଜିଟାଲ ଶକ୍ତିର ବଢୁଛି ପ୍ରଭାବ

ଏହି ସହଭାଗୀତା ପୁଣିଥରେ ଭାରତର ଡିଜିଟାଲ୍ ଶକ୍ତି ଏବଂ UPIର ବିଶ୍ୱ ଲୋକପ୍ରିୟତାକୁ ପ୍ରଦର୍ଶନ କରୁଛି। ପୂର୍ବରୁ ୟୁଏଇ, ଫ୍ରାନ୍ସ, ସିଙ୍ଗାପୁର, ଭୁଟାନ, ନେପାଳ, ମରିସସ ଏବଂ ଶ୍ରୀଲଙ୍କା ଭଳି ଦେଶରେ UPI ଗ୍ରହଣ କରାଯାଇଥିଲା। ଆଉ ବର୍ତ୍ତମାନ କତାର ଏହି ତାଲିକାରେ ସାମିଲ ହୋଇଛି। ତେଣୁ ଏହା ସ୍ପଷ୍ଟ ଯେ ଭବିଷ୍ୟତରେ ଅଧିକ ଦେଶରେ UPI ଆରମ୍ଭ ହେବ। ଯାହା ଭାରତୀୟ ଯାତ୍ରୀମାନଙ୍କୁ ସବୁଠି ନଗଦବିହୀନ, ସୁରକ୍ଷିତ ଏବଂ ସହଜ ପେମେଣ୍ଟର ସୁବିଧା ପ୍ରଦାନ କରିବ।