ନୂଆଦିଲ୍ଲୀ: ଚିକିତ୍ସା କ୍ଷେତ୍ରରେ ଆରମ୍ଭ ହେବ ନୂଆ ଅଧ୍ୟାୟ। ଏବେ ମଣିଷ ମନକୁ ପଢ଼ିବ AI। ଦରକାର ପଡ଼ିବନି କୌଣସି ଅସ୍ତ୍ରୋପଚାର। ଏଲୋନ ମସ୍କଙ୍କ ନ୍ୟୁରାଲିଙ୍କକୁ ଚାଲେଞ୍ଜ ଦେବ ଅଲ୍ଟମ୍ୟାନଙ୍କ ବ୍ରେନ। ChatGPT ନିର୍ମାତା OpenAIର ସିଇଓ ସାମ୍ ଅଲ୍ଟମ୍ୟାନ୍ ଏବେ ବ୍ରେନ୍ ନାମକ ଏକ ନୂତନ ପ୍ରୋଜେକ୍ଟ ଉପରେ ଆରମ୍ଭ କରିଛନ୍ତି ଗବେଷଣା। ରିପୋର୍ଟ ଅନୁଯାୟୀ, Open AI ଏବେ Merge Labs ସହିତ ମିଶି କାମ କରୁଛି। ବ୍ରେନ୍-କମ୍ପ୍ୟୁଟର୍ ଇଣ୍ଟରଫେସ୍ (BCI) ଡେଭଲପ କରିବା ଏହାର ଲକ୍ଷ୍ୟ। ମସ୍ତିଷ୍କରୁ ସିଗ୍ନାଲ ଏବଂ ଶବ୍ଦକୁ ଧରିବ ଏହି ସିଷ୍ଟମ୍।

ସାମ୍ ଅଲ୍ଟମ୍ୟାନଙ୍କ ଆଗାମୀ ପ୍ରୋଜେକ୍ଟ ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲୋନ୍ ମସ୍କଙ୍କ ମାଲିକାନାରେ ଥିବା ନ୍ୟୁରାଲିଙ୍କ୍ ସହିତ ସିଧାସଳଖ ପ୍ରତିଯୋଗିତା କରିବ। ନ୍ୟୁରାଲିଙ୍କ୍ ମାନବ ମସ୍ତିଷ୍କରେ ଏକ BCI ଚିପ୍ ମଧ୍ୟ ସ୍ଥାପନ କରିଥାଏ। ଏହା ପୂର୍ବରୁ ଏକ ସଫଳ ପରୀକ୍ଷଣ କରିଛି। ଯାହା ବ୍ୟବହାରକାରୀମାନଙ୍କୁ ବ୍ରେନ୍‌ୱେଭ୍ ଏବଂ ଶବ୍ଦ ବ୍ୟବହାର କରି ଏକ କମ୍ପ୍ୟୁଟର କର୍ସର୍ ପରିଚାଳନା କରିବାକୁ ଅନୁମତି ଦିଏ।

ନ୍ୟୁରାଲିଙ୍କର BCI ଚିପ୍ ପ୍ରତିରୋପଣ କରିବା ପାଇଁ ମସ୍କିକ ଅସ୍ତ୍ରୋପଚାର ଆବଶ୍ୟକ। ତା’ପରେ ମସ୍ତିଷ୍କରେ ଚିପସେଟ୍ ପ୍ରତିରୋପଣ କରିବା ଆବଶ୍ୟକ। କିନ୍ତୁ ସାମ୍ ଅଲ୍ଟମ୍ୟାନ୍ କହିଛନ୍ତି ଯେ ତାଙ୍କର ଏହି ପ୍ରୋଜେକ୍ଟ ମସ୍ତିଷ୍କର ବିନା ଅସ୍ତ୍ରୋପଚାରର ଆବଶ୍ୟକତାକୁ ଦୂର କରିବ।

ଦି ଭର୍ଜରେ ପ୍ରକାଶିତ ରିପୋର୍ଟ ଅନୁଯାୟୀ, ସାମ ଅଲ୍ଟମ୍ୟାନ୍ ମର୍ଜ ଲ୍ୟାବ୍ସ ପାଇଁ ଏକ ବଡ଼ ଏବଂ ଶକ୍ତିଶାଳୀ ଟିମକୁ ନିଯୁକ୍ତି ଦେଉଛନ୍ତି। ଏଥିରେ ପ୍ରସିଦ୍ଧ ଆଣବିକ ବୈଜ୍ଞାନିକ ମିଖାଏଲ୍ ସିପାରୋ ମଧ୍ୟ ଅଛନ୍ତି। ସେ କେଉଁ ପଦବୀରେ ରହିବେ ତାହା ଏପର୍ଯ୍ୟନ୍ତ ସ୍ପଷ୍ଟ କରାଯାଇନାହିଁ।

ନ୍ୟୁରାଲିଙ୍କର BCI ବ୍ରେନ୍ ଚିପ୍ ପକ୍ଷାଘାତ ବା ପାରାଲିସିସ ପୀଡିତଙ୍କ ପାଇଁ ଡିଜାଇନ୍ କରାଯାଇଛି। ନୋଲାନ୍ ଆର୍ବୋ ହେଉଛନ୍ତି ପ୍ରଥମ ବ୍ୟକ୍ତି ଯାହାଙ୍କ ମସ୍ତିଷ୍କରେ ସଫଳତାର ସହ ନ୍ୟୁରାଲିଙ୍କ୍ ଚିପସେଟ୍ ପ୍ରତିରୋପଣ କରାଯାଇଛି। ସେ ପକ୍ଷାଘାତରେ ପୀଡ଼ିତ। ତାଙ୍କ ବେକ ତଳ ଅଂଶକୁ ନିୟନ୍ତ୍ରଣ କରିପାରୁନାହାଁନ୍ତି। ଏପରି ପରିସ୍ଥିତିରେ, ନ୍ୟୁରାଲିଙ୍କ ବ୍ରେନ୍ ଚିପ୍ ତାଙ୍କ ପାଇଁ ବହୁତ ଉପଯୋଗୀ ପ୍ରମାଣିତ ହୋଇଛି। ସେ ଏବେ ସୁସ୍ଥ ଅଛନ୍ତି ଏବଂ ବ୍ରେନ୍ ଚିପ୍ ସାହାଯ୍ୟରେ କମ୍ପ୍ୟୁଟର ଏବଂ ଲାପଟପ୍ ଚଲାଇ ପାରୁଛନ୍ତି। ଅଲ୍ଟମ୍ୟାନଙ୍କ ପ୍ରୋଜେକ୍ଟ ବ୍ରେନ ମସ୍କଙ୍କ ନ୍ୟୁରାଲିଙ୍କକୁ କିପରି ଚ୍ୟାଲେଞ୍ଜ ଦେବ, ତାହା ଉପରେ ବିଶ୍ୱର ନଜର।