‘‘ମୋ ମୁଣ୍ଡ ୨୦୦ କୋଟି ଟଙ୍କାର, ମୋର ଆୟ ସଚ୍ଚୋଟ’’: ନୀତିନ ଗଡକରୀ

ନୂଆଦିଲ୍ଲୀ: ଇଥାନଲ ମିଶ୍ରିତ ପେଟ୍ରୋଲ ବ୍ୟବହାର ପାଇଁ ସରକାରଙ୍କ ପ୍ରୟାସକୁ ନେଇ ବିବାଦ ଜାରି ରହିଛି। ଅନେକ ଲୋକ ଏଥିପାଇଁ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀଙ୍କୁ ମଧ୍ୟ ସମାଲୋଚନା କରୁଛନ୍ତି। ସେମାନଙ୍କ ଅଭିଯୋଗ କେନ୍ଦ୍ରମନ୍ତ୍ରୀ ନିଜର ବ୍ୟକ୍ତିଗତ ଲାଭ ପାଇଁ ଏଭଳି କରୁଛନ୍ତି । ହେଲେ ଏହି ଅଭିଯୋଗଗୁଡ଼ିକୁ ଖାରଜ କରିଛନ୍ତି ନୀତିନ ଗଡକରୀ । ନାଗପୁରରେ ଏକ କାର୍ଯ୍ୟକ୍ରମରେ ଯୋଗଦେବା ଅବସରରେ ଗଡକରୀ କହିଛନ୍ତି ‘‘ମୋ ମୁଣ୍ଡ ୨୦୦ କୋଟି ଟଙ୍କା ମୂଲ୍ୟର ଏବଂ ମୁଁ ଠକେଇ ନକରି ସଚ୍ଚୋଟ ଭାବରେ ରୋଜଗାର କରୁଛି।’’
ସୂଚନାଥାଉକି, ସରକାର ଇଥାନଲକୁ ଏକ ସ୍ବଚ୍ଛ ଏବଂ ଶସ୍ତା ବିକଳ୍ପ ଇନ୍ଧନ ଭାବରେ ପ୍ରୋତ୍ସାହିତ କରୁଛନ୍ତି। ହେଲେ ଏହାର ଖାଦ୍ୟ, ଜଳ ସୁରକ୍ଷା, ଯାନବାହନ ସୁରକ୍ଷା ଏବଂ ଗ୍ରାହକଙ୍କ ପସନ୍ଦ ଉପରେ ଏହାର ପ୍ରଭାବ ଉପରେ ଚିନ୍ତା ପ୍ରକାଶ ପାଇଛି। ସମାଲୋଚକମାନେ ଏହା ମଧ୍ୟ ଦାବି କରିଛନ୍ତି ଯେ, ଦୁଇଟି ପ୍ରମୁଖ ଇଥାନଲ କମ୍ପାନି ଗଡକରୀଙ୍କ ପୁଅମାନେ ପରିଚାଳିତ କରୁଛନ୍ତି।
ଏମିତିରେ ଗଡକରୀ ସିଧାସଳଖ ବିବାଦର ଉଲ୍ଲେଖ କରିନଥିଲେବି କହିଛନ୍ତି, ‘‘ମୁଁ ମୋ ପୁଅମାନଙ୍କୁ ବ୍ୟବସାୟରେ ମାର୍ଗଦର୍ଶନ କରେ। କିନ୍ତୁ ମୁଁ ଠକେଇର ଆଶ୍ରୟ ନିଏ ନାହିଁ।’’
ସେ କହିଛନ୍ତି ‘ନିକଟରେ ମୋ ପୁଅ ଇରାନରୁ ୮୦୦ କଣ୍ଟେନର ସେଓ ଆମଦାନୀ କରିଛି ଏବଂ ଭାରତରୁ ୧ ହଜାର କଣ୍ଟେନର କଦଳୀ ଇରାନକୁ ରପ୍ତାନୀ କରିଛି। ଇରାନ ସହିତ କୌଣସି ଆର୍ଥିକ କାରବାର ନାହିଁ। ମୋ ପୁଅ ଆମଦାନୀ ଏବଂ ରପ୍ତାନୀ କରେ। ମୋର ଏକ ଚିନି କାରଖାନା, ଏକ ଡିଷ୍ଟିଲେରୀ ଏବଂ ଏକ ପାଓ୍ବାର ପ୍ଲାଣ୍ଟ ମଧ୍ୟ ଅଛି। ମୁଁ ବ୍ୟକ୍ତିଗତ ଲାଭ ପାଇଁ କୃଷି ସହିତ ପରୀକ୍ଷଣ କରୁନାହିଁ।’’ 
ଗଡକରୀ ସ୍ଥାନୀୟ ଉଦ୍ୟୋଗକୁ ଉତ୍ସାହିତ କରିବା ପାଇଁ ତାଙ୍କର ପ୍ରୟାସ ଉପରେ ମଧ୍ୟ ଆଲୋକପାତ କରିଥିଲେ। କିପରି ନାଗପୁରରେ ଫଳ ମଲ୍ ପ୍ରତିଷ୍ଠା କରିବାକୁ ପନିପରିବା ବିକ୍ରେତାମାନଙ୍କୁ ପରାମର୍ଶ ଦେଇଥିଲେ ତାହା ଉଲ୍ଲେଖ କରିଥିଲେ। ତାଙ୍କ ମତରେ, ଏପରି ପଦକ୍ଷେପ ପ୍ରମୁଖ ସହର ସ୍ଥାନଗୁଡ଼ିକରେ ସିଧାସଳଖ ବିକ୍ରୟକୁ ସକ୍ଷମ କରି ବ୍ୟବସାୟୀ ଏବଂ ଚାଷୀମାନଙ୍କୁ ସଶକ୍ତ କରିଥାଏ ।
E20 ପେଟ୍ରୋଲ ଉପରେ ଚାଲିଥିବା ସମାଲୋଚନାକୁ ଖାରଜ କରି କହିଛନ୍ତି ଯେ, ତାଙ୍କୁ ଟାର୍ଗେଟ କରିବା ପାଇଁ ଏକ "ଦେୟଯୁକ୍ତ" ଏବଂ "ରାଜନୈତିକ ଭାବରେ ପ୍ରେରିତ" ସୋସିଆଲ ମିଡିଆ ଅଭିଯାନ ଆରମ୍ଭ କରାଯାଇଛି। ସେ ଦୃଢ଼ ଭାବରେ କହିଛନ୍ତି ଯେ ଇନ୍ଧନ ସୁରକ୍ଷିତ। ସରକାର କହିଛନ୍ତି ଯେ, E20 ଏକ ଆମଦାନୀ ବିକଳ୍ପ, ମୂଲ୍ୟ-ପ୍ରଭାବଶାଳୀ ଏବଂ ପ୍ରଦୂଷଣ ହ୍ରାସ କରେ, ଏବଂ ମକା ଏବଂ ଆଖୁ ଭଳି ଫସଲର ଚାହିଦା ସୃଷ୍ଟି କରି ଚାଷୀମାନଙ୍କୁ ଲାଭ ମଧ୍ୟ ପହଞ୍ଚାଏ