ମହଙ୍ଗା ପଡିଲା ‘ଦ ଗ୍ରେଟ୍ ଇଣ୍ଡିଆନ କପିଲ ଶୋ’ରେ ବାବୁରାଓ ଚରିତ୍ର କରିବା, ଲିଗାଲ ନୋଟିସ୍ ପଠାଇଲେ ଫିଲ୍ମ ନିର୍ମାତା

ନୂଆଦିଲ୍ଲୀ ୨୨।୦୯; ନେଟଫ୍ଲିକ୍ସର 'ଦ ଗ୍ରେଟ୍ ଇଣ୍ଡିଆନ୍ କପିଲ୍ ଶୋ' ଅନେକ ଦର୍ଶକଙ୍କୁ ଖୁବ୍‌ ମନୋରଞ୍ଜନ କରୁଛି । ଏହି ଶୋ'ରେ ଅନେକ କଳାକାର ନିଜର ଦମ୍‌ଦାର ଚରିତ୍ର ମାଧ୍ୟମରେ ସମସ୍ତଙ୍କୁ ହସାଇଛନ୍ତି । କିନ୍ତୁ ନିକଟରେ ଆସିଥିବା ଏକ ଏପିସୋଡ୍ ଯୋଗୁଁ କପିଲଙ୍କ ଶୋ’ ସମସ୍ୟାରେ ପଡ଼ିଛି । 'ହେରା ଫେରି' ଫିଲ୍ମର ପ୍ରଯୋଜକ ଫିରୋଜ ନାଦିଆୱାଲା ନେଟଫ୍ଲିକ୍ସ ବିରୁଦ୍ଧରେ ୨୫ କୋଟି ଟଙ୍କାର ଆଇନଗତ ନୋଟିସ୍ ଜାରି କରିଛନ୍ତି । ଶନିବାର 'ଦ ଗ୍ରେଟ୍ ଇଣ୍ଡିଆନ୍ କପିଲ୍ ଶୋ'ର ତୃତୀୟ ସିଜନର ଶେଷ ଏପିସୋଡ୍ ଆସିଥିଲା । ଏଥିରେ ବଲିଉଡ୍ ଅଭିନେତା ଅକ୍ଷୟ କୁମାର ଅତିଥି ଭାବରେ ଆସିଥିଲେ । ଏହି ଏପିସୋଡ୍‌ରେ ଅଭିନେତା କିକୁ ଏବଂ କୃଷ୍ଣା  'ବାବୁ ରାଓ' ଏବଂ ସୁନୀଲ ସେଟ୍ଟୀଙ୍କ ଭୂମିକାରେ ନଜର ଆସିଥିଲେ । ସେମାନଙ୍କର କମିକ୍ ଟାଇମିଂ ପ୍ରତ୍ୟେକ ଥର ଭଳି ଏଥର ମଧ୍ୟ ଚମତ୍କାର ଥିଲା । କିନ୍ତୁ ଏହା ଏବେ  ଶୋ’ର ନିର୍ମାତାଙ୍କୁ ମହଙ୍ଗା ପଡ଼ିଛି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ପ୍ରଯୋଜକ ଫିରୋଜ ନାଡିଆଡୱାଲା ନେଟଫ୍ଲିକ୍ସ ଏବଂ 'ଦ ଗ୍ରେଟ୍ ଇଣ୍ଡିଆନ୍ କପିଲ୍ ଶୋ'ର ନିର୍ମାତାଙ୍କୁ ୨୫ କୋଟି ଟଙ୍କାର ଆଇନଗତ ନୋଟିସ୍ ପଠାଇଛନ୍ତି । ତାଙ୍କର ଅଭିଯୋଗ ହେଉଛି ଯେ ଶୋ’ରେ ପରେଶ ରାୱଲଙ୍କ ବାବୁରାଓ ଚରିତ୍ର'କୁ ବିନା ଅନୁମତିରେ ବ୍ୟବହାର କରାଯାଇଛି । ଫିରୋଜଙ୍କ କହିବା କଥା ଯେ ତାଙ୍କ ପାଖରେ ସେହି ଚରିତ୍ରର କପିରାଇଟ୍ ଅଛି ଏବଂ ଏହି ସ୍କିଟ୍ ତାଙ୍କ ଅନୁମତି ବିନା କରାଯାଇଛି । ପ୍ରଯୋଜକ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ କାହାକୁ ମଧ୍ୟ ବାବୁରାଓଙ୍କ ଚରିତ୍ରର ଭୁଲ୍ ବ୍ୟବହାର କରି ଟଙ୍କା ରୋଜଗାର କରିବାର ଅଧିକାର ନାହିଁ । ସେ ବିବୃତ୍ତି ଜାରି କରି ଲେଖିଛନ୍ତି, 'ବାବୁରାଓ କେବଳ ଏକ ଚରିତ୍ର ନୁହେଁ ବରଂ ଫିଲ୍ମ ହେରା ଫେରିର ପ୍ରାଣ । ଏହି ଚରିତ୍ର ଆମର ପରିଶ୍ରମ, ଚିନ୍ତାଧାରା ଏବଂ ସୃଜନଶୀଳତାରୁ ସୃଷ୍ଟି ହୋଇଛି ଏବଂ ଆମ ଅନୁମତି ବିନା କେହି ଏହାକୁ ଅଧିକାର କରିପାରିବେ ନାହିଁ କିମ୍ବା ଏହାର ଭୁଲ୍ ବ୍ୟବହାର କରିପାରିବେ ନାହିଁ ।'

ଫିରୋଜଙ୍କ ଟିମ୍ ଆଇନଗତ ନୋଟିସ୍‌ରେ ନେଟଫ୍ଲିକ୍ସରୁ ସେହି ଦୃଶ୍ୟକୁ ହଟାଇବାକୁ ଦାବି କରିଛି ଯେଉଁଥିରେ କିକୁ ଶାରଦା ବାବୁ ରାଓଙ୍କ ଚରିତ୍ରରେ ଅଭିନୟ କରୁଥିବା ଦେଖାଯାଇଛି । ଏହା ସହିତ ସବୁ ତୃତୀୟ ପକ୍ଷ ଚ୍ୟାନେଲ ଏବଂ ସୋସିଆଲ ମିଡିଆ ପ୍ଲାଟଫର୍ମରୁ ମଧ୍ୟ ସେହି ଦୃଶ୍ୟକୁ ହଟାଇବାକୁ ଦାବି କରାଯାଇଛି । ନୋଟିସ୍‌ରେ ଏହା ମଧ୍ୟ କୁହାଯାଇଛି ଯେ ବାବୁରାଓଙ୍କ ଚରିତ୍ରକୁ ଭବିଷ୍ୟତରେ ବିନା ଅନୁମତିରେ ପୁନର୍ବାର ବ୍ୟବହାର କରାଯିବ ନାହିଁ । ଏହାର ଲିଖିତ ପ୍ରତିଶ୍ରୁତି ସହିତ ୨୪ ଘଣ୍ଟା ମଧ୍ୟରେ କ୍ଷମା ମଧ୍ୟ ମଗାଯାଇଛି ।