ଜିଲ୍ଲାପାଳ ଦେଖାଇଲେ ମହାନତା, ବୁଝିଲେ ଅସହାୟ ବୃଦ୍ଧାଙ୍କ ଦୁଃଖ

ସୁବର୍ଣ୍ଣପୁର: ବୃଦ୍ଧାଙ୍କ ଦୁଃଖ ସହି ପାରିଲେନି ଜିଲ୍ଲାପାଳ। ନିଜେ ଯାଇ ବୁଝିଲେ ଦୁଃଖ। ଖାଲିଯେ ଦୁଃଖ ବୁଝିଲେ ତାହା ନୁହେଁ, ଦୁଃଖ ଦୂର କରିବାକୁ ଦେଲେ ପ୍ରତିଶ୍ରୁତି। ଏଭଳି କିଛି ଭାବବିହ୍ବଳ ପୂର୍ଣ୍ଣ ଦୃଶ୍ୟ ଦେଖିବାକୁ ମିଳିଛି ସୁବର୍ଣ୍ଣପୁର ପୁରୁରା ଡାକ୍ତରଖାନା ପରିସରରେ। ସୁବର୍ଣ୍ଣପୁର ଜିଲ୍ଲାପାଳ ଡ.ନୃପରାଜ ସାହୁଙ୍କୁ ମହାନତାଙ୍କୁ ନେଇ ଏବେ ସବୁଠୁ ଚର୍ଚ୍ଚା।

ପ୍ରକୃତରେ ସ୍ଥାନୀୟ ଅଞ୍ଚଳରରେ ବୃଦ୍ଧା କିଛି ବୁଲା ଗୋରୁଙ୍କ ଯତ୍ନ ନେଉଥିଲେ। ହେଲେ ଦୁଇ ଦିନ ତଳେ ସହରରେ ବୁଲା ଗାଈ ଗୋରୁଙ୍କ ପ୍ରାଦୁର୍ଭାବ ରୋକିବା ଅଭିଯାନକ୍ରମେ, ବୃଦ୍ଧା ଯତ୍ନ ନେଉଥିବା ଗାଈ ଗୋରୁଙ୍କୁ ମଧ୍ୟ ରାସ୍ତାରୁ ନେଇ ଗୋଶାଳାରେ ଛାଡ଼ିଦେଇଥିଲା ପ୍ରଶାସନ। ଯାହାକୁ ନେଇ ଦୁଃଖରେ ଭାଙ୍ଗିପଡ଼ିଥିଲେ ବୃଦ୍ଧା। ଏମିତିକି ବୃଦ୍ଧା ଜଣକ କାନ୍ଦୁଥିବାରୁ ଏକ ଭିଡିଓ ମଧ୍ୟ ଭାଇରାଲ ହୋଇଥିଲା।

ତେବେ ଏହି ଭିଡିଓ ଦେଖିବା ପରେ ଖୋଦ୍ ଜିଲ୍ଲାପାଳ, ପୁରୁଣା ଡାକ୍ତରଖାନା ପରିସରରେ ରହୁଥିବା ବୃଦ୍ଧାଙ୍କ ପାଖକୁ ଯାଇଥିଲେ ଏବଂ ତାଙ୍କର ହଜିଯାଇଥିବା ଗାଈ ପାଇଁ ଗୁହାଳ ଓ ବୃଦ୍ଧା ମାଆ ପାଇଁ ଏକ ଘର ତିଆରି କରିଦେବା ପାଇଁ ପ୍ରତିଶ୍ରୁତି ଦେଇଥିଲେ।

ଜଣେ ଜିଲ୍ଲାପାଳ ବୃଦ୍ଧାଙ୍କ ପାଖକୁ ଯାଇ ମା ଡାକି ପାଖେ ବସି ତାଙ୍କ ଦୁଃଖ ବୁଝିବା ଏବେ ସାଧାରଣରେ ଚର୍ଚ୍ଚା ବିଷୟ ପାଲଟି ଯାଇଛି। ବୃଦ୍ଧା ଜଣକ ପ୍ରତ୍ୟେକ ଦିନ ବଜାରକୁ ଯାଇ ପନିପରିବା ମାଗି ଆଣି ଉକ୍ତ ଗୋରୁ ଗାଈଙ୍କୁ ଖାଇବାକୁ ଦେଉଥିବା ସୂଚନା ମିଳିଛି। ସେ ରହୁଥିବା ସ୍ଥାନରେ ଅନେକ ବିଲେଇ ଥିବା ଓ ବୃଦ୍ଧା ଜଣକ ସମସ୍ତ ବିଲେଇଙ୍କୁ କିଛି କିଛି ଖାଇବାକୁ ଦେଉଥିବା ଦେଖିବାକୁ ମିଳିଛି।