ପାକିସ୍ତାନରେ ବନ୍ଦୀ ଭଳି ଥିଲେ ଶ୍ରୀଲଙ୍କା ଖେଳାଳି ! ଦୁଃଖ ବଖାଣିଲେ କ୍ୟାପ୍ଟେନ୍ ଶାନୁକା

ଲାହୋର,୦୧ /୧୨: ଖେଳିବା ପାଇଁ ପାକିସ୍ତାନ ଗସ୍ତ କରିଥିଲା ଶ୍ରୀଲଙ୍କା ଟିମ୍ । ଶ୍ରୀଲଙ୍କା ଖେଳାଳିଙ୍କ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିଲା ।କିନ୍ତୁ ଇସଲାମବାଦରେ ବିସ୍ଫୋରଣ ପରେ ଚିନ୍ତାରେ ପଡିଥିଲେ ଶ୍ରୀଲଙ୍କା ଖେଳାଳି । ଘରକୁ ଫେରିଯିବା ପାଇଁ ଚାହିଁଥିଲେ । କିନ୍ତୁ ଦଳର ସୁରକ୍ଷାକୁ ଆହୁରି ବଢାଇ ଦିଆଯାଇଥିଲା । ଏପରି କିଛି ଅନୁଭୂତି ସାଉଣ୍ଟିଥିଲେ ଶ୍ରୀଲଙ୍କା ଖେଳାଳି । ଯାହାକୁ ନେଇ ମୁହଁ ଖୋଲିଛନ୍ତି ଅଧିନାୟକ ଦାସୁନ ଶାନୁକା ।

ଜିମ୍ବାଓ୍ୱେ-ପାକିସ୍ତାନ-ଶ୍ରୀଲଙ୍କା ମଧ୍ୟରେ ସିରିଜ ଶେଷ ହେବା ପରେ ଶାନୁକା କହିଛନ୍ତି ଯେ, ଖେଳାଳିଙ୍କୁ କଡା ନିୟମ ପାଳନ କରିବାକୁ ବାଧ୍ୟ କରାଯାଉଥିଲା । ବିସ୍ଫୋରଣ ପରେ ସିରିଜ୍ ଚାଲୁ ରଖିବା ପାଇଁ ନିର୍ଦ୍ଦେଶ ହୋଇଥିଲା । ଏହାପରେ ସୁରକ୍ଷା ବ୍ୟବସ୍ଥା ଆହୁରି କଡା ହୋଇଥିଲା । ସେମାନେ ଟୁର୍ଣ୍ଣାମେଣ୍ଟକୁ ଉପଭୋଗ କରିଛନ୍ତି । କିନ୍ତୁ ବାହାରକୁ ଯିବା ପାଇଁ ସେମାନଙ୍କୁ ବାରଣ କରାଯାଇଥିଲା ବୋଲି କହିଛନ୍ତି ଶାନୁକା ।

ଅନ୍ୟ ଦିଗରେ ପାକିସ୍ତାନ କ୍ରିକେଟ୍ ବୋର୍ଡ ଉପରେ ସେ କୌଣସି ଅଭିଯୋଗ କରିନାହାଁନ୍ତି ଓଲଟା ଧନ୍ୟବାଦ ଜଣାଇଛନ୍ତି । ପାକର ସୁରକ୍ଷାକର୍ମୀଙ୍କୁ ପରିସ୍ଥିତିକୁ ନିୟନ୍ତ୍ରଣ କରିଥିବାରୁ କୃତଜ୍ଞତା ଜ୍ଞାପନ କରିଛନ୍ତି ।

ସୂଚନାଯୋଗ୍ୟ, ଫାଇନାଲରେ ପାକିସ୍ତାନ ବିପକ୍ଷରେ ଶ୍ରୀଲଙ୍କା ଭଲ ଖେଳ ପ୍ରଦର୍ଶନ କରିପାରିନଥିଲା । ଦଳ ପାକର ସ୍ପିନରଙ୍କ ମୁକାବିଲା କରିପାରିନଥିଲା । ସ୍ପିନ ବଲରେ ଖେଳିବାକୁ ହେଲେ କେଉଁ ବଲରେ ସଟ୍ ମାରହେବ ତାହା ଖେଳାଳି ବୁଝିବା ଦରକାର ବୋଲି ଶାନୁକା କହିଛନ୍ତି ।