ଭୁବନେଶ୍ୱର: ଟାରିଫ୍ ଶୁଳ୍କକୁ ନେଇ ମୁହାଁମୁହିଁ ହୋଇଛନ୍ତି ଆମେରିକା-ଚୀନ୍। ଦୁଇ ଦେଶ ମଧ୍ୟରେ ଆରମ୍ଭ ହୋଇଛି ଟ୍ରେ଼ଡ୍ ୱାର୍। ଟ୍ରମ୍ପ ଚୀନ ଉପରେ ୧୪୫% ଟାରିଫ୍ ଲଗାଇଛନ୍ତି, ଜବାବରେ ଚୀନ ବି ଲଗାଇଛି ୧୨୫% ଶୁଳ୍କ। କେବଳ ସେତିକି ନୁହେଁ ଆମେରିକା ସହିତ ଏଭଳି ଯୁଦ୍ଧ ଶେଷ ପର୍ଯ୍ୟନ୍ତ ଲଢ଼ିବ ବୋଲି ରୋକଠୋକ୍ କହିଛି ଚାଇନା। ଏଥିପାଇଁ ରଣନୀତି ବି ଆରମ୍ଭ କରିଦେଇଛି। ଆଉ ଚୀନର ନଜର ଏବେ ଭାରତ ଉପରେ। ଦୀର୍ଘଦିନ ଧରି ଶତ୍ରୁତା ଆଚରଣ କରୁଥିବା ଚୀନ ଏବେ ଭାରତର ଟ୍ରୁ ଫ୍ରେଣ୍ଡ୍। ମାନେ ପକ୍କା ଦୋସ୍ତ। ଚୀନ ତାର ସାମଗ୍ରୀ ଭାରତକୁ ରପ୍ତାନୀ କରିବାକୁ ଚାହୁଁଛି। ଏପଟେ ଭାରତ ବି ଆମେରିକା ଶୁଳ୍କ ଚାପରେ ଚୀନ ସହ ବିଜନେଶ କରି ନିଜର କ୍ଷତି ଭରଣା କରିବାକୁ ସୁଯୋଗ ଖୋଜୁଛି। ଟ୍ରମ୍ପଙ୍କ ଟାରିଫ ମାଡ଼ ଏବେ ଦୁଇ ଦେଶକୁ ଘନିଷ୍ଠ ବନ୍ଧୁ କରିଦେଇଛି। ପଢ଼ନ୍ତୁ ରିପୋର୍ଟ
ଆରମ୍ଭ ହୋଇଛି ଟ୍ରେଡ୍ ୱାର୍। ମୁହାଁମୁହିଁ ବିଶ୍ୱର ଦୁଇ ମହାନ ଆର୍ଥନୀତି, ଚୀନ ଓ ଆମେରିକା। ଟକ୍କର ଦେଇ ପରସ୍ପର ଉପରେ ଲଗାଉଛନ୍ତି ଶୁଳ୍କ। ଆମେରିକା ଚୀନ ଉପରେ ୧୪୫ ପ୍ରତିଶତ ଶୁଳ୍କ ଲଗାଇଥିବା ବେଳେ ଚୀନ ବି ଜବାବ ଦେଇ ଆମେରିକା ଉପରେ ଲଗାଇଛି ୧୨୫ ପ୍ରତିଶତ ଶୁଳ୍କ। ଏହି ଯୁଦ୍ଧ ଶେଷ ପର୍ଯ୍ୟନ୍ତ ଲଢିବ ବୋଲି ରୋକ୍ଠୋକ୍ କହିଦେଇଛି ଚାଇନା। ଆମେରିକା ଠାରୁ ଉଚ୍ଚ ଶୁଳ୍ଖ ଚାପର ଶିକାର ହେବା ପରେ ଚୀନ ଏବେ ଭାରତ ଭଳି ଏକ ବଡ଼ ମାର୍କେଟ୍କୁ ଆଡ଼କୁ ଆଶାପୂର୍ଣ୍ଣ ଆଖିରେ ଚାହିଁ ରହିଛି। ଭାରତର ୧.୪ ବିଲିଅନ ଗ୍ରାହକ ଓ ବଢ଼ୁଥିବା ମେନୁଫେକ୍ଚରିଂ ସେକ୍ଟର ଚୀନ ପାଇଁ ଏକ ଭଲ ବିକଳ୍ପ ହୋଇପାରେ ନିଶ୍ଚୟ। ଏଥିପାଇଁ ଚୀନ ନିୟମିତ ଭାରତକୁ ମନାଇବାରେ ଲାଗି ପଡ଼ିଛି।
ପଢନ୍ତୁ- ଭାରତ ବନାମ ଚୀନ: ଷ୍ଟାର୍ଟଅପ୍ରେ ରେସ୍ରେ କାହିଁକି ପଛରେ ପଡ଼ିଗଲା ଭାରତ?
ସେପଟେ ଭାରତ ବି ଆମେରିକା ଲଗାଇଥିବା ୨୫ ପ୍ରତିଶତ ଶୁଳ୍କ ଉପରେ ରହିଛି। ଆମେରିକାର ଶୁଳ୍କ ଏହାର ଟେକ୍ସଟାଇଲ୍, ଅଟୋ କମ୍ପୋନେଣ୍ଟ ଓ କେମିକଲ ସେକ୍ଟର ପ୍ରଭାବିତ କରିବ। ତେଣୁ ଭାରତ ଏସବୁ ଚୀନକୁ ରପ୍ତାନୀ କରି କ୍ଷତି ଭରଣା କରିବାକୁ ଚାହିଁବ। ପ୍ରତିଶ୍ରୁତି ମୁତାବକ ସତରେ ଯଦି ଚୀନ ଭାରତୀୟ ସାମଗ୍ରୀ ପାଇଁ ନିଜ ବଜାର ଖୋଲି ଦେଲା ତେବେ ଚୀନ ସହିତ ଦୀର୍ଘଦିନ ଧରି ରହି ଆସୁଥିବା ଭାରତୀୟ ବାଣିଜ୍ୟିକ କ୍ଷତିକୁ କିଛି ମାତ୍ରାରେ ଭରଣା କରିପାରିବ।
ତେଣୁ ପରସ୍ପର ମଧ୍ୟରେ ସମ୍ପର୍କ ସୁଧାରିବାକୁ ଲାଗିପଡ଼ିଛନ୍ତି ଉଭୟ ଦେଶର ନେତା। ସବୁଠାରୁ ମଜା କଥା ହେଲା ଚୀନ ଭାରତ ସହିତ ସମ୍ପର୍କ ସୁଧାରିବାକୁ ନିଜ ଆଡୁ ଖୁବ୍ ଇଣ୍ଟରେଷ୍ଟ ଦେଖାଉଛି। ଟ୍ରମ୍ପ ଟାରିଫ ଲାଗୁ କରିବାର କିଛିଦିନ ପୂର୍ବରୁ ଦିଲ୍ଲୀରେ ଥିବା ଚୀନର ରାଷ୍ଟ୍ରଦୂତ ସୁ ଫେଇହଙ୍ଗ ଭାରତ ସହ ବାଣିଜ୍ୟ ବଢ଼ାଇବା କଥା କହିଥିଲେ। ଚୀନ ଭାରତ ଠାରୁ ଅଧିକ ସାମଗ୍ରୀ କିଣିବ ଓ ବାଣିଜ୍ୟ ସମ୍ପର୍କ ମଜଭୁତ କରିବାକୁ ପ୍ରସ୍ତୁତ ଅଛି ବୋଲି ସୁ କହିଥିଲେ।
ଗ୍ଲୋବାଲ ଟାଇମ୍ସକୁ ପ୍ରତିକ୍ରିୟା ଦେଇ ସୁ କହିଥିଲେ, ଆମେ ବାଣିଜ୍ୟ ଏବଂ ଅନ୍ୟାନ୍ୟ କ୍ଷେତ୍ରରେ ବ୍ୟବହାରିକ ସହଯୋଗକୁ ସୁଦୃଢ଼ କରିବା, ଏବଂ ଚୀନ୍ ବଜାରକୁ ସୁହାଇଲା ଭଳି ଅଧିକ ଭାରତୀୟ ଉତ୍ପାଦ ଆମଦାନୀ କରିବା ପାଇଁ ଭାରତ ସହିତ ମିଶି କାମ କରିବାକୁ ଇଚ୍ଛୁକ ବୋଲି ସୁ କହିଥିଲେ। କେବଳ ସେତିକି ନୁହେଁ ଭାରତୀୟ କମ୍ପାନୀମାନେ ମଧ୍ୟ ହିମାଳୟ ସୀମା ଡେଇଁ ଚୀନ ଭିତରେ ନିବେଶ କରିବାକ ସେ ଆହ୍ୱାନ ଦେଇଥିଲେ।
ନିକଟରେ ଚୀନ ରାଷ୍ଟ୍ରପତି ସି ଜିନପିଙ୍ଗ ମଧ୍ୟ ଭାରତକୁ ମନେଇବାକୁ ଚେଷ୍ଟା କରିଥିଲେ। ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଜିନପିଙ୍ଗ କହିଥିଲେ ଆମେ ଦୁଇ ଦେଶ ମିଳିମିଶି କାମ କରିବା ଦରକାର। ଏବଂ ଆମ ସମ୍ପର୍କ ଡ୍ରାଗନ ଏଲିଫାଣ୍ଟ ଟାଙ୍ଗୋ ସଦୃଶ୍ୟ ହେବ ଦରକାର। ଅର୍ଥାତ ଏକ ମଜଭୁତ ସମ୍ପର୍କ ହେବା ଦରକାର ବୋଲି ଜିନପିଙ୍ଗ କହିଥିଲେ। ଏପ୍ରିଲ ୧ ତାରିଖରେ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କକୁ ୭୫ ବର୍ଷ ପୂର୍ତ୍ତି ଅବସରେ ଦୁଇ ରାଷ୍ଟ୍ରପତି ପରସ୍ପରକୁ ଶୁଭେଚ୍ଛା ମଧ୍ୟ ଜଣାଇଥିଲେ।
ମାର୍ଚ୍ଚ ମାସରେ ଚୀନ ମିଡିଆ ମଧ୍ୟ ପ୍ରଧାନମନ୍ତ୍ର ନରେନ୍ଦ୍ର ମୋଦୀଙ୍କୁ ପ୍ରବଳ ପ୍ରଶଂସା କରିଥିଲା। ଏବଂ ଦୁଇ ଦେଶ ମଧ୍ୟରେ ଏକ ସୁସ୍ଥ ବ୍ୟବହାରିକ ସମ୍ପର୍କ ସ୍ଥାପନ କରିବାକୁ ଜୋର୍ ଦେଇଥିଲା।
ସେହିପରି ପ୍ରଧାନମନ୍ତ୍ରୀ ମୋଦୀ ମଧ୍ୟ ଆମେରିକୀୟ ପଡକାଷ୍ଟର ଲେକ୍ସ ଫ୍ରିଡମ୍ୟାନଙ୍କୁ ଇଣ୍ଟରଭ୍ୟୁ ଦେଲା ବେଳେ ଚୀନ ପ୍ରତି ଉତ୍ତମ ଆଭିମୁଖ୍ୟ ଦର୍ଶାଇଥିଲେ। ପଡ଼ୋଶୀ ମଧ୍ୟରେ ଏମିତି ଛୋଟମୋଟ ଝଗଡ଼ା ହୁଏ, ଚୀନ ଓ ଭାରତ ମଧ୍ୟରେ ଐତିହାସିକ ସମ୍ପର୍କ ରହିଛି। ୨୦୨୦ ପରେ ଜିନପିଙ୍ଗ ସହ ସବୁ ଆଲୋଚନା ପଜିଟିଭ ରହିଛି। ଆମେ ଦୁଇ ଦେଶ ଏହାର ସମାଧାନ କରିବାକୁ ଚେଷ୍ଟା କରୁଛୁ ବୋଲି ମୋଦୀ କହିଥିଲେ।
ଏସବୁ ସ୍ଥିତି ଦେଖିଲେ ଚୀନ ଓ ଆମେରିକା ଲଢ଼େଇ ମଧ୍ୟରେ ଭାରତ ଭଲ ସ୍ଥିତିରେ ରହିଛି। କାରଣ ଭାରତ ଉପରେ ଆମେରିକା ୨୬ ପ୍ରତିଶତ ଶୁଳ୍କ ଲଗାଇଛି, ଯାହା ଅନ୍ୟ ଏସୀୟ ଦେଶ ତୁଲନାରେ ଖୁବ୍ କମ୍। ତେଣୁ ଭାରତକୁ ଆମେରିକା ସହିତ ବ୍ୟବସାୟ ବଢାଇବାକୁ ଏକ ସୁଯୋଗ ମିଳିଯାଇଛି। ଏପଟେ ଟାରିଫ ଚିନ୍ତାରେ ଚୀନ। ତେଣୁ ଚୀନର ବିବଶତା ଓ ଆମେରିକାର ସୁଯୋଗ ନେଇ ଭାରତ ଭଳ ଗେମ୍ ଖେଳିପାରେ। ଯେଉଁଥିରେ ଚୀନକୁ ବି ଭାରତ ଠାରୁ ସାମଗ୍ରୀ କିଣିବାରେ ଏକପ୍ରକାର ବାଧ୍ୟ କରିପାରେ। ତେବେ ଦୁଇ ଦେଶ ମଧ୍ୟରେ କାଣ ରହିଛି ବାଣିଜ୍ୟିକ ସ୍ଥିତି ଆସନ୍ତୁ ଜାଣିବା।
ଭାରତ ଏବଂ ଚୀନ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ଗତ ଆର୍ଥିକ ବର୍ଷରେ ୪ ପ୍ରତିଶତ ବୃଦ୍ଧି ପାଇ ୧୧୮.୪୦ ବିଲିୟନ ଡଲାରରେ ପହଞ୍ଚିଛି। ଯେଉଁଥିରେ ଭାରତ ଚୀନରୁ ଅଧିକ ଆମଦାନୀ କରିଛି। ସାମରିକ ଅଚଳାବସ୍ଥା ଏବଂ ରାଜନୈତିକ ଅସ୍ଥିରତା ସତ୍ତ୍ୱେ, ଭାରତ ଏବଂ ଚୀନ୍ ମଧ୍ୟରେ ବାଣିଜ୍ୟ ୨୦୨୨ ମସିହାରେ ରେକର୍ଡ ୧୩୫.୯୮ ବିଲିୟନ ଡଲାରରେ ପହଞ୍ଚିଥିଲା। ଭାରତର ବାଣିଜ୍ୟ ମନ୍ତ୍ରଣାଳୟ ଅନୁଯାୟୀ, ୨୦୨୩-୨୪ ମସିହାରେ, ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୧୦୧.୭ ବିଲିୟନ ଡଲାର ଥିଲା। ତେବେ ୨୦୨୦ ମସିହାରେ ଦୁଇ ଦେଶ ମଧ୍ୟରେ ସୀମା ସଂଘର୍ଷ ହୋଇଥିଲା। ଏଥିରେ ସମ୍ପର୍କ ଖରାପ ହୋଇଯାଇଥିଲା। ଭାରତ ସରକାର ଚୀନ୍ ନିବେଶ ଉପରେ କଟକଣା ଲଗାଇଥିବା ସହିତ ୨୦୦ ରୁ ଅଧିକ ଚୀନ୍ ଆପ୍ ଉପରେ ପ୍ରତିବନ୍ଧକ ଲଗାଇଥିଲା। ଏବଂ ବେଜିଂରୁ ଆସୁଥିବା ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶକୁ ଯାଞ୍ଚ କରିଥିଲେ, ଯାହା ଆଜି ପର୍ଯ୍ୟନ୍ତ ଲାଗୁ ରହିଛି। ଏସବୁ ସତ୍ତ୍ୱେ ବି ଦୁଇ ଦେଶ ମଧ୍ୟରେ ବ୍ୟବସାୟ ପ୍ରଭାବିତ ହୋଇ ନାହିଁ। ତଥାପି ଚୀନ ସହିତ ବ୍ୟବସାୟ କରି ଭାରତ ଅଧିକ କ୍ଷତି ସହୁଛି।
୨୦୨୩ ସୁଦ୍ଧା ଚୀନ ସହ ଭାରତର ବାଣିଜ୍ୟିକ କ୍ଷତି ୧୦୦ ବିଲିଅନ ଡଲାର ରହିଛି। ଇଲେକ୍ଟ୍ରୋନିକ୍ସ, ଯନ୍ତ୍ରପାତି, ଔଷଧ ଏବଂ ରାସାୟନିକ ଦ୍ରବ୍ୟ,ଭାରତ ଚୀନ ଠାରୁ ଅଧିକ ଆମଦାନୀ କରୁଛି। ତେଣୁ କ୍ଷତି ବଢ଼ୁଛି। ତେଣୁ ସାମ୍ପ୍ରତିକ ପରିସ୍ଥିତିରେ ଯଦି ଚୀନ ଓ ଭାରତର ଡିଲ୍ ସଠିକ ହୁଏ ତେବେ ଏଥିରେ ଭାରତର ବାଣିଜ୍ୟିକ କ୍ଷତି କମିବାର ସମ୍ଭାବନା ରହିଛି।
ଭାରତ ଏବଂ ଚୀନ୍ ଉଭୟ ବିଶ୍ୱ ସପ୍ଲାଏ ଚେନ୍ରେ ବେଶ୍ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରନ୍ତି। କିନ୍ତୁ ଶୁଳ୍କ କାରଣରୁ ଉଭୟ ଦେଶର ରପ୍ତାନୀରେ ପ୍ରଭାବିତ ହୋଇପାରେ। ଏମିତିରେ ଦୁଇ ଦେଶ ପରସ୍ପର ସହ ବାଣିଜ୍ୟିକ ବ୍ୟବସାୟକୁ ବଢ଼ାଇ ପରସ୍ପରର ଅର୍ଥନୀତିକୁ ବଳ ଦେବାକୁ ଚେଷ୍ଟା କରିବେ। କେବଳ ସେତିକି ନୁହେଁ ଚୀନ୍ ଭାରତୀୟ ଔଷଧ, କୃଷି ସାମଗ୍ରୀ ଏବଂ ଆଇଟି ସେବାର ଆମଦାନୀକୁ ବୃଦ୍ଧି କରିବାର ସମ୍ଭାବନା ରଖିଛି। ସେହିଭଳି ଭାରତ ଚୀନ୍ ଇଲେକ୍ଟ୍ରୋନିକ୍ସ ଏବଂ ଯନ୍ତ୍ରପାତି ଆମଦାନୀ ବଢ଼ାଇପାରେ।
ପଢନ୍ତୁ- ବନ୍ଧୁକ ମୁନରେ କୌଣସି ଚୁକ୍ତି ହୁଏନି: ଆମେରିକା ସହ ବାଣିଜ୍ୟ ଚୁକ୍ତି ନେଇ କହିଲେ କେନ୍ଦ୍ରମନ୍ତ୍ରୀ
ସଫ୍ଟୱେର୍ ଏବଂ ଆଇଟି ସେବାରେ ଭାରତର ଦକ୍ଷତା ଥିବା ବେଳେ ହାର୍ଡୱେୟାର ଉତ୍ପାଦନ କ୍ଷମତାରେ ଚୀନ ଧୁରନ୍ଧର। ଏହା ଦୁଇ ଦେଶକୁ ବେସ୍ ସୁହାଇବ। ଉଭୟ ମିଳିତ ଭାବରେ ପରସ୍ପରର ସହଯୋଗରେ ବଜାରରେ ସେମାନଙ୍କର ଉପସ୍ଥିତିକୁ ବଢ଼ାଇପାରିବେ। ଚୀନ ଭାରତରେ ନବୀକରଣୀୟ ଶକ୍ତିରେ ନିବେଶ କରିପାରେ। ଚୀନ ଅଧିକ ଭାରତୀୟ ଚାଉଳ, ଚିନି, ଚା ଏବଂ ସାମୁଦ୍ରିକ ଖାଦ୍ୟ ଆମଦାନୀ କରିବାର ସମ୍ଭାବନା ରହିଛି।
ସେପଟେ ଆମେରିକା ଟାରିଫ ଚାପରେ ଛାନିଆ ହେଲେଣି ଚୀନର ଇଲେକ୍ଟ୍ରୋନିକ୍ସ କମ୍ପାନୀ। ସେମାନଙ୍କୁ ଏବେ ଡିମାଣ୍ଡ ହ୍ରାସର ଚିନ୍ତା ଘାରିଛି। ତେଣୁ ଉତ୍ପାଦିତ ସାମଗ୍ରୀ କେଉଁ ମାର୍କେଟ୍କୁ ଛାଡ଼ିବେ ସେ ନେଇ ସୁଯୋଗ ଖୋଜୁଛନ୍ତି। ଅନ୍ୟ ଉପାୟ ନ ପାଇ ଏମାନେ ଭାରତକୁ ଦେଇଛନ୍ତି ଡିସ୍କାଉଣ୍ଟ ଅଫର। ଭାରତ ଯଦି ଅଫର ଗ୍ରହଣ କଲା ତେବେ ଦେଶରେ ଟିଭି, ଫ୍ରିଜ୍ ୱାଶିଂମେସିନ ଭଳି ଇଲେକ୍ଟ୍ରୋନିକ୍ସ ସାମଗ୍ରୀ ଖୁବ୍ ଶସ୍ତା ହୋଇଯିବ।
ବିଶେଷଜ୍ଞଙ୍କ କହିବା କଥା ହେଲା ବାଣିଜ୍ୟ ଯୁଦ୍ଧ ଯୋଗୁ ଚୀନରୁ ଆମେରିକାକୁ ଆସୁଥିବା ସାମଗ୍ରୀ ମହଙ୍ଗା ହୋଇଯିବ, ଯେଉଁଥିରେ ଡିମାଣ୍ଡ ହ୍ରାସ ପାଇପାରେ। ତେଣୁ ବର୍ତ୍ତମାନ ଚୀନ କମ୍ପାନୀମାନେ ସେହି ଚିନ୍ତାରେ ରହିଛନ୍ତି। ଡିମାଣ୍ଡ ହ୍ରାସ ପାଇବା ଚିନ୍ତାରେ ଚୀନ୍ କମ୍ପାନୀ ଉପରେ ଚାପ ସୃଷ୍ଟି ହୋଇଛି। ଏପରି ପରିସ୍ଥିତିରେ, ଚାହିଦା ବୃଦ୍ଧି କରିବା ପାଇଁ, ଏହି ଚୀନ କମ୍ପାନୀମାନେ ଭାରତୀୟ କମ୍ପାନୀଗୁଡ଼ିକୁ ରିହାତି ଦେଉଛନ୍ତି।
ବର୍ତ୍ତମାନ ଆମେରିକା ଉପରେ ଚୀନ ମୋଟ ୧୨୫ ପ୍ରତିଶତ ଶୁଳ୍କ ଲଦିଥିବା ବେଳେ ଆମେରିକା ୧୪୫ ପ୍ରତିଶତ ଶୁଳ୍କ ଲଦିଛି। ଏହି ଶୁଳ୍କ ପରେ ଚୀନରୁ ଆମଦାନୀ ହେଉଥିବା ସାମଗ୍ରୀ ଆମେରିକା ଖୁବ୍ ମହଙ୍ଗା ହୋଇଯିବ। ୧୦୦ ଡଲାର ସାମଗ୍ରୀ ଆମରିକାରେ ୨୪୫ ଡଲାରରେ ବିକ୍ରି ହେବ। ଫଳରେ ଚୀନ ସାମଗ୍ରୀର ଡିମାଣ୍ଡ ହ୍ରାସ ପାଇବ। ତେଣୁ ଡିମାଣ୍ଡ ହ୍ରାସ ସଂକଟକୁ ଏଡ଼ାଇବା ପାଇଁ ଚୀନ କମ୍ପାନୀ ଭାରତକୁ ୫ ପ୍ରତିଶତ ଡିସ୍କାଉଣ୍ଟ ଅଫରରେ ଇଲେକ୍ଟ୍ରୋନିକ୍ସ ସାମଗ୍ରୀ ଯୋଗାଇବାକୁ ଯୋଜନା କରିଛନ୍ତି। ସେପଟେ ଭାରତୀୟ କମ୍ପାନୀ ଚୀନ ଅଫରରେ ଇଲେକ୍ଟ୍ରୋନିକ୍ସ ସାମଗ୍ରୀ କିଣିଲେ ଗ୍ରାହକଙ୍କୁ ମଧ୍ୟ ଏହାର କିଛି ଲାଭାଂଶ ମିଳିବ। ତେଣୁ ଟିଭି, ଫ୍ରିଜ୍ ୱାଶିଂମେସିନ ଭଳି ଇଲେକ୍ଟ୍ରୋନିକ୍ସ ସାମଗ୍ରୀ ଖୁବ୍ ଶସ୍ତା ହୋଇଯିବ।
