ବିହାରରେ NDAର ଡବଲ ସେଞ୍ଚୁରୀ, ବିଜେପି-ଜେଡିୟୁ ମେଣ୍ଟ ୨୦୦ ପାର୍

ପାଟନା, ୧୪|୧୧: ବିହାରରେ ଏନଡିଏ ସୁନାମିରେ ଭାସିଗଲେ ମହାଗଠବନ୍ଧନ ପ୍ରାର୍ଥୀ । କଂଗ୍ରେସ-ଆରଜେଡି ମେଣ୍ଟ ଏବେ ମୋଟ୍ ୫୦ ଆସନ ପାଇଁ ସଙ୍ଘର୍ଷ କରୁଥିବା ଦେକିବାକୁ ମିଳିଛି । କାରଣ ପୁଣି ଚାଲିଛି ମୋଦୀ ମ୍ୟାଜିକ୍ । ଏନଡିଏ ଉପରେ ଭରସା କରିଛନ୍ତି ଭୋଟର । କିଛି ଏମିତି ଚିତ୍ର ସାମ୍ନାକୁ ଆସୁଛି ବିହାର ବିଧାନସଭା ନିର୍ବାଚନରେ ।

ବିଜେପି-ଜେଡିୟୁ ମେଣ୍ଟ ବଡ ବିଜୟ ଅଭିମୁଖେ ମୁହାଁଉଛନ୍ତି । ଅନ୍ୟ ଦିଗରେ ଆରଜେଡି ଏବଂ କଂଗ୍ରେସ ମାଟି କାମୁଡିଥିବା ଦେଖିବାକୁ ମିଳିଛି । ପ୍ରଥମ ଥର ପାଇଁ ବିହାର ରାଜନୀତିରେ ଏନଡିଏ ଏତେ ଅଧିକ ଆସନରେ ଆଗୁଆ ରହିଥିବା ସୂଚନା ମିଳିଛି । ଆଗୁଆ ରହିବାରେ ଏନଡିଏ ପ୍ରାର୍ଥୀ ଡବଲ ସେଞ୍ଚୁରୀ ମାରିଛନ୍ତି । ଏପରିକି ଜେଡିୟୁ ଅପେକ୍ଷା ବିଜେପି ଅଧିକ ଆସନରେ ଆଗରେ ରହିଛି ।

ନୂଆ ସରକାର ଗଠନ ନେଇ ବିହାରରେ ଚାଲିଛି ଭୋଟ୍ ଗଣତି । ଦିନ ୨ଟା ସୁଦ୍ଧା ୨୦୨ ଆସନରେ ଏନଡିଏ ଆଗରେ ଥିବା ବେଳେ ଆରଜେଡି ଏବଂ କଂଗ୍ରେସ ମାତ୍ର ୪୬ଟି ଆସନରେ ଆଗୁଆ ରହିଛନ୍ତି । ଅନ୍ୟମାନେ କେବଳ ୪ଟି ସିଟରେ ଆଗୁଆ ରହିଛନ୍ତି ।

ଏଥିରୁ ଗୋଟିଏ କଥା ସ୍ପଷ୍ଟ ହୋଇଛି ଯେ, ବିହାରବାସୀ ନୀତିଶ କୁମାରଙ୍କୁ ଆଉ ଥରେ ଭରସା କରିଛନ୍ତି । ଏହାସହ ଆରଜେଡି ଏବଂ କଂଗ୍ରେସ ନେତୃତ୍ୱାଧିନ ମହାଗଠବନ୍ଧନକୁ ସମ୍ପୂର୍ଣ୍ଣ ପ୍ରତାଖ୍ୟାନ କରିଛନ୍ତି ।

ଯଦି ଏହି ଟ୍ରେଣ୍ଡ ଜାରି ରହେ ତାହାଲେ ଭାରତୀୟ ଜନତା ପାର୍ଟି ଏବଂ ଜନତା ଦଳ ୟୁନାଇଟେଡ୍ ପାଇଁ ଏହା ଏକ ବଡ ବିଜୟ ହେବ । ଅନ୍ୟ ଦିଗରେ କଂଗ୍ରେସ ଓ ଆରଜେଡି ମେଣ୍ଟକୁ ଲାଗିବ ଶକ୍ତ ଝଟକା ।