କଟକରେ ମୁସଲିମ୍ ସମ୍ପ୍ରଦାୟ ପକ୍ଷରୁ ଶୋଭାଯାତ୍ରା ବାହାରିବା ନେଇ ଗୁଜବ, ପୁରା ପୋଲିସ କର୍ଡନରେ ଦରଘାବଜାର

କଟକ ୧୦।୧୦: କଟକ ଗଣ୍ଡଗୋଳ ଘଟଣାକୁ ନେଇ ଗୁଜବ । ମୁସଲିମ୍ ସମ୍ପ୍ରଦାୟ ପକ୍ଷରୁ ଏକ ଶୋଭାଯାତ୍ରା ବାହାରିବା ନେଇ ଗୁଜବ ହେବା ପରେ ପୋଲିସ ପକ୍ଷରୁ କଡା ସୁରକ୍ଷା ବ୍ୟବସ୍ଥା କରାଯାଇଛି । ସହରର ସମ୍ବେଦନଶୀଳ ଅଞ୍ଚଳ ଗୁଡିକରେ ପୋଲିସ ପକ୍ଷରୁ ବ୍ୟାପକ ଫୋର୍ସ ମୁତୟନ କରାଯାଇଛି । ଖାସ୍ କରି ଦରଘାବଜାର ଅଞ୍ଚଳକୁ ପୁରା ପୋଲିସ କର୍ଡନ ଭିତରେ ରଖାଯାଇଛି । ଖୋଦ୍ କଟକ ଡିସିପି ବିଭିନ୍ନ ସ୍ଥାନରେ ବୁଲି ବୁଲି ଯାଞ୍ଚ କରୁଛନ୍ତି ।

ସେପଟେ ଦଶହରା ଭସାଣି ଗଣ୍ଡଗୋଳ ଓ ହିଂସାକାଣ୍ଡ ଘଟଣାକୁ ନେଇ ତାତି କମିନଥିବା ବେଳେ କାଳୀ ପୂଜାକୁ ନେଇ ପ୍ରସ୍ତୁତିରେ ଲାଗିପଡିଛନ୍ତି ବିଭିନ୍ନ ପୂଜା କମିଟି । ତେବେ କଟକରେ ଶାନ୍ତି ରକ୍ଷା କରିବା ସହ ଆଗାମୀ ପୂଜା କିଭଳି ଶାନ୍ତି ଶୃଙ୍ଖଳାର ସହ ଶେଷ ହେବ ସେ ନେଇ ପ୍ରଶାସନ ସଠିକ୍ ପଦକ୍ଷେପ ଗ୍ରହଣ କରିବାକୁ ପୂଜା କମିଟି କହିଛି । ସେପଟେ ଗଣ୍ଡଗୋଳ ଘଟଣାକୁ ନେଇ ପୋଲିସ ହାତୀପୋଖରୀ ଓ କଦମ ଏ ରସୁଲ ଅଞ୍ଚଳର ବିଭିନ୍ନ ଘର ବୁଲି ସର୍ଚ୍ଚ କରିଥିଲା । ବ୍ୟାପକ ପୋଲିସ ବଳୟ ଭିତରେ ଏହି ସର୍ଚ୍ଚ କରାଯାଇଥିଲା । ଗଣ୍ଡଗୋଳ ଘଟଣାରେ ପୂର୍ବରୁ ୬ ଜଣଙ୍କୁ ଗିରଫ କରାଯାଇଥିବା ବେଳେ ଗୁରୁବାର ୩ ଜଣଙ୍କୁ ଗିରଫ କରାଯାଇଛି ଆଗକୁ ଗିରଫଦାରୀ ବଢିବ ବୋଲି ପୋଲିସ କହିଛି ।

କଟକରେ କାଳୀ ପୂଜା ପ୍ରସ୍ତୁତି ଆରମ୍ଭ କରିଛନ୍ତି ବିଭିନ୍ନ ପୂଜା କମିଟି । ପୂଜା କମିଟି ପକ୍ଷରୁ ମା’ଙ୍କ ମୂର୍ତ୍ତି ପାଇଁ ନଡ଼ା ବନ୍ଧା କାମ ଆରମ୍ଭ ହୋଇଥିବା ବେଳେ ବିଭିନ୍ନ ମଣ୍ଡପରେ ମା’ଙ୍କ ମାଟି କାମ ମଧ୍ୟ ହେଲାଣି । ହେଲେ କଟକ ସହରରେ ଘଟିଯାଇଥିବା ହିଂସାକୁ ନେଇ ସମସ୍ତେ ସଙ୍କା ଭିତରେ ରହିଛନ୍ତି । ଭସାଣି ବିଶୃଙ୍ଖଳା ଓ ପରବର୍ତ୍ତୀ ହିଂସାକାଣ୍ଡକୁ ରୋକିବାରେ ସମ୍ପୂର୍ଣ୍ଣ ଫେଲ୍ ମାରିଥିଲା କମିଶନରେଟ୍ ପୋଲିସ । ଯାହାକୁ ନେଇ କଟକରେ କର୍ଫ୍ୟୁ ଭଳି ପରିସ୍ଥିତି ଉପୁଜିଥିଲା । ଯଦିଓ ଏବେ ସହରରେ ଶାନ୍ତି ଫେରିବା ସହ ସ୍ଥିତି ସ୍ଵାଭାବିକ ଆଡ଼କୁ ଯାଉଛି । କାଳୀ ପୂଜା, କର୍ତ୍ତିକେଶ୍ୱର ପୂଜା ଓ ବାଲିଯାତ୍ରା କିଭଳି ଶୃଙ୍ଖଳିତ ଭାବେ ହେବ ସେ ନେଇ ପ୍ରଶାସନ ଏବେ ଠାରୁ ଉଦ୍ୟମ କରିବା ସହ ଶାନ୍ତି ବଜାୟ ରହିବା ଦିଗରେ ସମସ୍ତଙ୍କୁ ନେଇ କାର୍ଯ୍ୟ କରୁ ବୋଲି ପୂଜା କମିଟି ଓ ଶାନ୍ତି କମିଟି ପକ୍ଷରୁ କୁହାଯାଇଛି । ସହରରେ କିଭଳି ଆସୁଥିବା ପୂଜା ପାର୍ବଣକୁ ନେଇ ପ୍ରଶାସନ କାମ କରୁ ବୋଲି ମତ ଦେଇଛନ୍ତି ବିଭିନ୍ନ ପୂଜା କମିଟି ।

କଟକ ସହରରେ ଶୃଙ୍ଖଳା ରକ୍ଷା କରିବା ପାଇଁ ପୋଲିସ ଜାରି ରଖିଛି ଉଦ୍ୟମ । ଭସାଣି ଗଣ୍ଡଗୋଳ ଘଟଣାରେ ପୂର୍ବରୁ ୬ ଜଣଙ୍କୁ ଗିରଫ କରାଯାଇଥିବା ବେଳେ ଗୁରୁବାର ୩ ଜଣଙ୍କୁ ଗିରଫ କରିଛି ଯାହା ଫଳରେ ମୋଟ୍ ୯ ଜଣଙ୍କୁ ଗିରଫ କରାଯାଇଛି । ଏଥିସହ ହାତୀ ପୋଖରୀ ଓ କଦମ ଏ ରସୁଲ ଅଞ୍ଚଳରେ ପୋଲିସ ଘରେ ଘରେ ସର୍ଚ୍ଚ ଅପରେସନ କରିଥିଲା । କେନ୍ଦ୍ରୀୟ ପୋଲିସ ବଳ ସହ ଓଡ଼ିଶା ପୋଲିସ ପକ୍ଷରୁ ବିଭିନ୍ନ ଘରେ ସର୍ଚ୍ଚ କରାଯାଇଥିଲା । ଗଣ୍ଡଗୋଳକାରୀଙ୍କୁ ଚିହ୍ନଟ କରାଯାଇଛି ଆଗକୁ ଗିରଫଦାରୀ ସଂଖ୍ୟା ବଢିବ ବୋଲି ପୋଲିସ କହିଥିଲା ।