ଦେବଗଡ ୧୦/୦୬: ହାତୀ ଆକ୍ରମଣରେ ମହିଳା ଗୁରୁତର । ଦେବଗଡ ଜିଲ୍ଲା ରିଆମାଳ ରେଞ୍ଜ ନୂଆଡିହି ସେକସନ ଅନ୍ତର୍ଗତ ସିଆରି ମାଳିଆରେ ଘଟିଛି ଏହି ଅଘଟଣ । ଗୁରୁତର ଆହତ ମହିଳା ଜଣଙ୍କ ହେଲେ ସେହି ଗ୍ରାମର ଚେଣ୍ଡାଳ ବେହେରାଙ୍କ ୩୮ ବର୍ଷ ବୟସ୍କା ଝିଅ ମନ୍ଦାକିନୀ ବେହେରା ।
ମନ୍ଦାକିନୀ ଭୋର ସମୟରେ ନିଜ ଘରୁ ଜମିରେ ଖତ ସିଞ୍ଚିବା ଓ ଟୁଲ (ମହୁଲ ଫୁଲ) ସଂଗ୍ରହ ପାଇଁ ବାହାରିଥିଲେ । ଗ୍ରାମ ନିକଟରେ ଗଛ ଉହାଡରେ ଏଗାର ଟିକିଆ ହାତୀ ପଲ ରହିଥିବା ବେଳେ ଅନ୍ଧାର ଯୋଗୁଁ ମନ୍ଦାକିନୀ ଜାଣିପାରିନଥିଲେ । ସେ ସେହି ସ୍ଥାନରେ ପହଞ୍ଚିବା କ୍ଷଣି ହାତୀ ମାନେ ତାଙ୍କୁ ଅତର୍କିତ ଭାବେ ଆକ୍ରମଣ କରିଥିଲେ । ହାତୀ ଆକ୍ରମଣରେ ମନ୍ଦାକିନୀ ଗୁରୁତର ଭାବେ ଆହତ ହୋଇ ପଡିଥିବା ବେଳେ ପରିବାର ଲୋକେ ତାଙ୍କୁ ସେଠାରୁ ତୁରନ୍ତ ଉଦ୍ଧାର କରି ଆଣି ଦେବଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି ।
ତାଙ୍କ ମୁଣ୍ଡ ଓ ଗୋଡରେ ଗଭୀର ଆଘାତ ଲାଗିଥିବା ବେଳେ ଦେବଗଡ ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ତାଙ୍କୁ ସର୍ଜରୀ ୱାର୍ଡରେ ଭର୍ତ୍ତି କରାଯାଇ ଅଧିକ ଚିକିତ୍ସା କରାଯାଉଛି । ତାଙ୍କ ଅବସ୍ଥା ଗୁରୁତର ଥିବାରୁ ଚିକିତ୍ସା କରୁଥିବା ଡାକ୍ତର ତାଙ୍କୁ ଉଚ୍ଚ ଚିକିତ୍ସା ପାଇଁ ବୁର୍ଲା ବଡ ଡାକ୍ତରଖାନାକୁ ସ୍ଥାନାନ୍ତରିତ କରିବାକୁ ପରାମର୍ଶ ଦେଇଛନ୍ତି । ସେପଟେ ଏହି ହାତୀ ପଲ ସଂପୃକ୍ତ ଅଞ୍ଚଳରେ ରହିଥିବା ଯୋଗୁଁ ଜଙ୍ଗଲ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଜଙ୍ଗଲ ମଧ୍ୟକୁ ଘଉଡାଇବା ପାଇଁ ପ୍ରୟାସ ଜାରି ରଖିଛନ୍ତି ।
