ଭାରତ ଅପରେସନ ସିନ୍ଦୂର କରି ବଡ଼ ଭୁଲ କରିଛି,ଏଥର ମିଶନ କାଶ୍ମୀର ଆହୁରୀ ତୀବ୍ର ହେବ :ଲସ୍କର ଆତଙ୍କବାଦୀର ଚେତାବନୀ

ନୂଆଦିଲ୍ଲୀ: ପାକିସ୍ତାନରୁ ଆସିଲା ଆତଙ୍କବାଦୀଙ୍କ ଧମକ। ଅପରେସନ ସିନ୍ଦୂରରେ ଘାଇଲା ଆତଙ୍କବାଦୀ ଏବେ ପ୍ରତିଶୋଧ ଅପେକ୍ଷାରେ। ଲସ୍କର ଏ-ତାଇବା ଆତଙ୍କବାଦୀ ସଂଗଠନର ଲିଡର ଭାରତକୁ ଦେଇଛି ଧମକ। ଭାରତ ଆକ୍ରମଣ କରି ବଡ଼ ଭୁଲ୍ କରିଛି। ଏଥର ମିଶନ କାଶ୍ମୀରରୁ ଆଉ ପଛଘୁଞ୍ଚା ନାହିଁ।

ଆତଙ୍କବାଦୀ ହାପିଜ୍ ସୟିଦର ସହଯୋଗୀ ସୈଫୁଲ୍ଲାହ କସୁରୀ ମଙ୍ଗଳବାର ପାକିସ୍ତାନରୁ ଏଭଳି ଖୋଲାଖୋଲି ରଣହୁଙ୍କାର ଦେଇଛି। ଭାରତର ଅପରେସନ ସିନ୍ଦୂର ଆତଙ୍କୀ ସଂଗଠନ ଲସ୍କର ଏ ତାଇବାକୁ କ୍ଷତି ପହଞ୍ଚାଇଛି ବୋଲି ସ୍ୱୀକାର କରି କସୁରୀ କହିଛି ଭାରତ ବଡ଼ ଭୁଲ କରି ଦେଇଛି। ସଂଗଠନ କେବେ ବି ମିଶନ କାଶ୍ମୀରରୁ ଓହରିବା ନାହିଁ।

ହାଫିଜ୍ ସଇଦ ନେତୃତ୍ୱାଧୀନ ଆତଙ୍କୀ ସଂଗଠନର ଲସ୍କର ତାଇବାର ଉପମୁଖ୍ୟ ଏବଂ ପହଲଗାମ୍ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ହେଉଛି ସୈଫୁଲ୍ଲା କସୁରୀ। ମଙ୍ଗଳବାର ସଂଗଠନର ହଜାର ହଜାର ଆତଙ୍କବାଦୀଙ୍କ ଉପସ୍ଥିତିରେ ସେ ଏଭଳି ଆହ୍ୱାନ ଦେଇଛି। କସୁରୀ କହିଛି “ଭାରତ କେବଳ ଆତଙ୍କବାଦୀ ଆଡ୍ଡାଗୁଡ଼ିକୁ ଟାର୍ଗେଟ କରି ଅପରେସନ ସିନ୍ଦୁରରେ ଏକ ବଡ଼ ଭୁଲ କରିଛି। ” କସୁରୀ ଆହୁରି କହିଛି ଯେ ସମଗ୍ର ବିଶ୍ୱକୁ ଓଲଟପାଲଟ ହେଇଯାଉ, ବ୍ୟବସ୍ଥାକୁ ପରିବର୍ତ୍ତନ ହେଇଯାଉ, ହେଲେ ସଂଗଠନ କେବେ ବି ତା'ର ଉଦ୍ଦେଶ୍ୟରୁ ଓହରିବା ନାହିଁ।

କେବଳ କାଶ୍ମୀର ନୁହେଁ, ଭାରତର ଏକାଧିକ ସ୍ଥାନକୁ ପାକିସ୍ତାନ ଭାରତ ଠାରୁ ଛଡ଼ାଇ ନେବା ବୋଲି କସୁରୀ କହିଛି। ସମର୍ଥକଙ୍କୁ ଉତ୍ତେଜିତ କରିବାକୁ ସେ କହିଛି ଯେ କାଶ୍ମୀର, ଅମୃତସର, ହୋସିଆରପୁର, ଗୁରଦାସପୁର, ଜୁନାଗଡ଼, ମୁନାବାଦର କିଛି ଅଂଶ, ହାଇଦ୍ରାବାଦ ଡେକାନ, ବଙ୍ଗଳା ଏଗୁଡ଼ିକ ସବୁ ପାକିସ୍ତାନର ଅଞ୍ଚଳ ଥିଲା। ଏଗୁଡ଼ିକୁ ଇସଲାମାବାଦରୁ ଛଡ଼ାଇ ନିଆଯାଇଛି। ଏଗୁଡ଼ିକୁ ସବୁ ଫେରାଇ ଆଣିବାକୁ ହେବ ବୋଲି କସୁରୀ ଧମକ ଦେଇଛି।

ଏହା ପୂର୍ବରୁ ଏକ ରାଲିରେ ଯୋଗ ଦେଇ ପହଲଗାମ ଆକ୍ରମଣରେ ତାକୁ ମାଷ୍ଟର ମାଇଣ୍ଡ ବୋଲି କୁହାଯାଉଥିଲା। ସେ କହିଥିଲା “ମୋତେ ପହଲଗାମ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ବୋଲି କୁହାଯାଉଛି, ଏବେ ମୋ ନାଁ ସାରା ବିଶ୍ୱରେ ପ୍ରସିଦ୍ଧ ହୋଇଯାଇଛି।”

ଭାରତର ଅପରେସନ ସିନ୍ଦୂର

୨୨ ଏପ୍ରିଲରେ ପାକିସ୍ତାନ ସମର୍ଥିତ ଆତଙ୍କବାଦୀ ଜାମ୍ମୁ-କାଶ୍ମୀରର ପହଲଗାମର ବୈସାରଣ ଭ୍ୟାଲିରେ ବୁଲୁଥିବା ପର୍ଯ୍ୟଟକଙ୍କ ଉପରେ ଆକ୍ରମଣ କରିଥିଲା। ଯେଉଁଥିରେ ୨୬ ଜଣଙ୍କର ମୃତ୍ୟୁ ହୋଇଥିଲା। ଆକ୍ରମଣ ପରେ ଭାରତ ମେ ୭-୧୦ ମଧ୍ୟରେ ଅପରେସନ ସିନ୍ଦୂର ଆରମ୍ଭ କରିଥିଲା। ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (POK)ରେ ୯ଟି ଆତଙ୍କବାଦୀ ଶିବିର ଧ୍ୱଂସ କରାଯାଇଥିଲା। ଭାରତୀୟ ସେନା ଦ୍ୱାରା ୭ଟି ଏବଂ ଭାରତୀୟ ବାୟୁସେନା ଦ୍ୱାରା ଦୁଇଟି ଶିବିର ନଷ୍ଟ କରାଯାଇଥିଲା। ଏହାପରେ ପାକିସ୍ତାନ ପକ୍ଷରୁ ମଧ୍ୟ ଭାରତ ଉପରେ ଆଟାକ କରାଯାଇଥିଲା। ହେଲେ ପାକିସ୍ତାନର ସବୁ ଆକ୍ରମଣ ବିଫଳ ଯାଇଥିଲା।