ପୁରୀ: ଅକ୍ଷୟ ତୃତୀୟାରେ ପ୍ରତିଷ୍ଠା ହେଲା ଦୀଘା ଜଗନ୍ନାଥ ମନ୍ଦିର। ପଶ୍ଚିମବଙ୍ଗରେ ତିଆରି ହୋଇଥିବା ଏହ ମନ୍ଦିରକୁ ଉଦଘାଟନ କରିଥିଲେ ମମତା ବାନାର୍ଜୀ। ହେଲେ ଏହି ମନ୍ଦିରର ଉଦ୍ଘାଟନ ସହ ସୃଷ୍ଟି ହୋଇଛି ଏକ ଝଡ଼। ଯେଉଁ ଝଡ଼ ଏବେ ସାରା ଓଡ଼ିଶାରେ ମଚାଇଛି ତୁମ୍ବି ତୋଫାନ।
ପ୍ରଥମେ କୁହାଗଲା ଯେ, ଦୀଘାରେ ଯେଉଁ ଜଗନ୍ନାଥ ମନ୍ଦିର ସ୍ଥାପନ କରାଯାଇଛି ସେଠାରେ ଜଗନ୍ନାଥଙ୍କ ପଥର ମୂର୍ତ୍ତି ପୂଜା ପାଉଛନ୍ତି। ଯାହାକୁ ନେଇ ଆରମ୍ଭ ହେଲା ବିବାଦ। ପରେ ଆଉ କଥା ସାମ୍ନାକୁ ଆସିଲା। ଜଣାପଡ଼ିଲା ସେଠାରେ ଜଗନ୍ନାଥ ମନ୍ଦିର ନାଁ ‘ଜଗନ୍ନାଥ ଧାମ’ ରଖାଯାଇଛି । ଏମିତିରେ ଆହୁରି ଉଗ୍ର ହୋଇଥିଲା ବିବାଦ। ହେଲେ ଏସବୁ ଭିତରେ ବିବାଦର ନିଆଁରେ ଘିଅ ଢାଳିଥିଲା ଶ୍ରୀମନ୍ଦିର ପ୍ରଶାସନର ବରିଷ୍ଠ ସେବାୟତ ତଥା ଦଇତାପତି ନିଯୋଗର ସମ୍ପାଦକ ରାମକୃଷ୍ଣ ଦାସମହାପାତ୍ରଙ୍କ ଏକ ପ୍ରତିକ୍ରିୟା।
ରାମକୃଷ୍ଣ ଦାସମହାପାତ୍ର ବଙ୍ଗଳାର ଏକ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ, ଦୀଘା ଜଗନ୍ନାଥ ମନ୍ଦିରରେ, ନବକଳେବର ବଳକା ଦାରୁରେ ଚତୁର୍ଦ୍ଧାମୂର୍ତ୍ତି ନିର୍ମାଣ ହୋଇଛି। ମାତ୍ର ସେ ପୁରୀରେ ପହଞ୍ଚିବା ମାତ୍ରେ ନିଜ ସ୍ବର ବଦଳାଇଥିଲେ। ଯାହାକୁ ନେଇ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହୋଇଛି। ସାଧାରଣ ଜନତା, ଜଗନ୍ନାଥ ପ୍ରେମୀ ଓ ରାଜନେତାଙ୍କ ପର୍ଯ୍ୟନ୍ତ ସମସ୍ତଙ୍କ ମଧ୍ୟରେ ଏନେଇ ପ୍ରତିକ୍ରିୟା।
ଘଟଣାରେ ଶନିବାର ଶ୍ରୀମନ୍ଦିର ପ୍ରଶସାନର ବୈଠକ ବସିଥିଲା। ରବିବାର ମଧ୍ୟ ଶ୍ରୀମନ୍ଦିର କାର୍ଯ୍ୟାଳୟରେ ଖୋଦ୍ ରାମକୃଷ୍ଣ ଦାସମହାପାତ୍ର ହାଜର ହୋଇଥିଲେ। ଯାହା ପରେ ତାଙ୍କୁ ଜବାବ ତଲବ କରିଛି ଶ୍ରୀମନ୍ଦିର ପ୍ରଶାସନ। ଏହା ସହ ୭ ଦିନ ଭିତରେ ଭିତରେ ଉତ୍ତର ରଖିବାକୁ ନିର୍ଦ୍ଦେଶ ଦିଆଯାଇଛି। ଯଦି ସେ ସନ୍ତୋଷଜନକ ଉତ୍ତର ନଦିଅନ୍ତି, ତେବେ ଶ୍ରୀମନ୍ଦିର ଆଇନ ୧୯୫୫ ଅନୁଯାୟୀ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଶ୍ରୀମନ୍ଦିର ପ୍ରଶାସନ ତରଫରୁ ସୂଚନା ଦିଆଯାଇଛି।
ଏବେ ପ୍ରଶ୍ନ ଉଠୁଛି, ରାମକୃଷ୍ଣ ଦାସ ମହାପାତ୍ରଙ୍କ ଦୀଘା ମନ୍ଦିର ପ୍ରତିଷ୍ଠାରେ ଭୂମିକା ପ୍ରମାଣିତ ହେଲେ ତାଙ୍କ ବିରୋଧରେ କ’ଣ ଏବଂ କିଭଳି କାର୍ଯ୍ୟାନୁଷ୍ଠାନ ହେବ ? ନା ତଦନ୍ତ କୈଫିୟତ ଆଳରେ ଘଟଣାକୁ ଚପାଇ ଦିଆଯିବ ? ଯଦି ରାମକୃଷ୍ଣଙ୍କ ଦୋଷ ପ୍ରମାଣିତ ହୁଏ ତା’ହେଲେ ପ୍ରଶ୍ନ ଉଠୁଛୁ ତାଙ୍କୁ ଏଭଳି ଅଧିକାର ଦେଲା କିଏ ? ଜଗନ୍ନାଥ ପ୍ରେମୀଙ୍କ ଭାବାବେଗକୁ କ୍ଷତି ପହଞ୍ଚାଇଥିବା ପ୍ରମାଣିତ ହେଲେ ତାଙ୍କ ଉପରେ କିଭଳି କାର୍ଯ୍ୟାନୁଷ୍ଠାନ ହେବା ଉଚିତ୍ ? ଆପଣଙ୍କ ମତ ରଖନ୍ତୁ ଏହି ଲିଙ୍କ୍ରେ...
ବରିଷ୍ଠ ସେବାୟତ ତଥା ଦଇତାପତି ନିଯୋଗର ସମ୍ପାଦକ ରାମକୃଷ୍ଣ ଦାସ ମହାପାତ୍ରଙ୍କୁ ଜବାବ ତଲବ । ୭ ଦିନ ଭିତରେ ଜବାବ ଦେବାକୁ ଶ୍ରୀମନ୍ଦିର ପ୍ରଶାସନର ନିର୍ଦ୍ଦେଶ। ଦୀଘା ଜଗନ୍ନାଥ ମନ୍ଦିର ପ୍ରତିଷ୍ଠାରେ ରାମକୃଷ୍ଣ ଦାସ ମହାପାତ୍ରଙ୍କ ଭୂମିକା ଥିବା ପ୍ରମାଣିତ ହେଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ତ ?#Odisha…
— Prameya News7 (@NEWS7Odia) May 4, 2025
