ନେପାଳ ଜେନ୍-ଜି ଆନ୍ଦୋଳନରୁ ଅନୁପ୍ରାଣିତ ଥିଲା ଯୁବ କଂଗ୍ରେସର ପ୍ରଦର୍ଶନ, କୋର୍ଟରେ ଦିଲ୍ଲୀ ପୋଲିସର ଦାବି

ନୂଆଦିଲ୍ଲୀ: ଦିଲ୍ଲୀର ଏଆଇ ସମ୍ମିଳନୀରେ ସାର୍ଟ ଖୋଲି ପ୍ରତିବାଦ କରିଥିବା ଯୁବ କଂଗ୍ରେସ କର୍ମୀଙ୍କୁ କୋର୍ଟ ପାଞ୍ଚ ଦିନର ପୋଲିସ ହେପାଜତକୁ ପଠାଇ ଦେଇଛନ୍ତି । ସମସ୍ତ ଚାରି ଅଭିଯୁକ୍ତଙ୍କୁ କୋର୍ଟରେ ହାଜର କରାଯାଇଥିଲା ଏବଂ ଦିଲ୍ଲୀ ପୋଲିସ କୋର୍ଟକୁ କହିଥିଲେ ଯେ ବିକ୍ଷୋଭକାରୀ ନେପାଳର ଜେନ୍-ଜି ଆନ୍ଦୋଳନ ଦ୍ୱାରା ଅନୁପ୍ରାଣିତ ହୋଇଥିଲେ । ପୋଲିସ ଅଧିକାରୀମାନେ ଦାବି କରିଛନ୍ତି ଯେ ଯୁବ କଂଗ୍ରେସ କର୍ମୀଙ୍କ ପ୍ରତିବାଦ ପଛରେ ଏକ ବଡ଼ ଷଡ଼ଯନ୍ତ୍ର ଥିଲା ।

ପୋଲିସ କୋର୍ଟରେ କହିଛି, "ଏହା ଏକ ବଡ଼ ଷଡ଼ଯନ୍ତ୍ର । ସେମାନେ ନେପାଳରେ ଜେନ-ଜିଙ୍କ ପ୍ରତିବାଦରୁ ପ୍ରେରଣା ନେଇଥିଲେ । ଅଭିଯୁକ୍ତମାନଙ୍କୁ ଆମନା ସାମନା କରିବାକୁ ପଡିବ ଏବଂ ଡିଜିଟାଲ୍ ପ୍ରମାଣ ଯାଞ୍ଚ କରାଯିବା ଆବଶ୍ୟକ । ଏହା ଏକ ଗୁରୁତ୍ୱପୂର୍ଣ୍ଣ ତଦନ୍ତ ।" ପୋଲିସ ଚାରି ଅଭିଯୁକ୍ତଙ୍କୁ ପୋଲିସ ହେପାଜତ ପାଇଁ ଅନୁରୋଧ କରିଥିଲା । କୋର୍ଟ ପାଞ୍ଚ ଦିନର ପୋଲିସ ହେପାଜତକୁ ମଞ୍ଜୁର କରିଛନ୍ତି ।

ଅଭିଯୁକ୍ତଙ୍କ ଓକିଲ କହିଥିଲେ, ବିରୋଧ ଶାନ୍ତିପୂର୍ଣ୍ଣ ଥିଲା; କୌଣସି ଭିଡିଓରେ କୌଣସି ହିଂସା ଦେଖାଯାଇ ନଥିଲା । ଏଫଆଇଆର କେବଳ ଏକ ରାଜନୈତିକ ଷଡ଼ଯନ୍ତ୍ର ଥିଲା । ଓକିଲ ଏହା ମଧ୍ୟ କହିଛଥିଲେ ଯେ ସେମାନେ ଶିକ୍ଷିତ ଏବଂ ଡିଗ୍ରୀଧାରୀ । ସରକାରୀ ଓକିଲ କହିଥିଲେ ଯେ ଅଭିଯୁକ୍ତମାନେ ଦେଶ ବିରୋଧୀ ସ୍ଲୋଗାନ ଦେଇଥିଲେ ଏବଂ ପ୍ରଧାନମନ୍ତ୍ରୀଙ୍କ ବିରୋଧରେ ବାର୍ତ୍ତା ଲେଖାଥିବା ଟି-ସାର୍ଟ ପିନ୍ଧିଥିଲେ । ପାଞ୍ଚ ଦିନର ହେପାଜତ ଦାବି କରି ଦିଲ୍ଲୀ ପୋଲିସ କହିଥିଲା ଯେ ଅନ୍ତର୍ଜାତୀୟ ନେତା ଏବଂ ଜଣାଶୁଣା ବ୍ୟକ୍ତିତ୍ୱଙ୍କ ଉପସ୍ଥିତିରେ ଦେଶ ବିରୋଧୀ ସ୍ଲୋଗାନ ଦିଆଯାଇଥିଲା ।

ସରକାରୀ ଓକିଲ ଜାମିନ ଆବେଦନକୁ ବିରୋଧ କରି କହିଥିଲେ ଯେ ଏଥିରେ ଏକ ଗଭୀର ଷଡ଼ଯନ୍ତ୍ର ଥିଲା, ଅନ୍ୟ ଅଭିଯୁକ୍ତମାନେ ଘଟଣାସ୍ଥଳରୁ ପଳାଇ ଯାଇଥିଲେ ଏବଂ ଉପଯୁକ୍ତ ତଦନ୍ତ ପାଇଁ ହେପାଜତ ଆବଶ୍ୟକ । ପୋଲିସ କୋର୍ଟକୁ ଏହା ମଧ୍ୟ କହିଛି ଯେ ପ୍ରତିବାଦକାରୀଙ୍କ ଫଣ୍ଡର ତଦନ୍ତ କରାଯିବ । ଏହି କର୍ମୀମାନେ ପିନ୍ଧିଥିବା ଟି-ସାର୍ଟକୁ କିଏ ଆର୍ଥିକ ସହାୟତା ଦେଇଥିଲା ତାହା ମଧ୍ୟ ଯାଞ୍ଚ କରାଯିବା ଆବଶ୍ୟକ ।