ନୂଆଦିଲ୍ଲୀ ୧୧।୦୮: ସାରା ବିଶ୍ୱରେ ଦ୍ରୁତ ଗତିରେ ବ୍ୟାପିବାରେ ଲାଗିଛି ନକଲି କଲ୍ ସ୍କାମ୍ । ଏହି ସ୍କାମ୍ କେବଳ ଆର୍ଥିକ କ୍ଷତି କରୁଛି ତାନୁହେଁ ବରଂ ଆମେରିକାର କିଛି ଲୋକଙ୍କ ମନରେ ଭାରତୀୟମାନଙ୍କ ପ୍ରତି ନକାରାତ୍ମକ ଭାବନା ମଧ୍ୟ ସୃଷ୍ଟି କରୁଛି । ଆସନ୍ତୁ ଜାଣିବା କ’ଣ ଏହି କଲ୍ ସେଣ୍ଟର ସ୍କାମ୍ ? ଏହାର ପ୍ରଭାବ କ’ଣ ଏବଂ ଏହା ଯୋଗୁଁ ଆମେରିକାର ଲୋକମାନେ ଭାରତୀୟମାନଙ୍କୁ କାହିଁକି କରୁଛନ୍ତି ଘୃଣା?
କଲ୍ ସେଣ୍ଟର ସ୍କାମ୍ ଏକ ପ୍ରକାରର ସାଇବର ଠକେଇ । ଯେଉଁଥିରେ ସାଇବରଠକ ନକଲି କଲ୍ ସେଣ୍ଟର ତିଆରି କରି ଲୋକଙ୍କୁ ଠକିବାକୁ ଚେଷ୍ଟା କରନ୍ତି । ଏହି ଠକମାନେ ପ୍ରାୟତଃ ନିଜକୁ ବ୍ୟାଙ୍କ ଅଧିକାରୀ, ଟେକ୍ନୋଲୋଜି ସପୋର୍ଟ କର୍ମଚାରୀ କିମ୍ବା ସରକାରୀ ଏଜେଣ୍ଟ ଭାବରେ ପରିଚୟ ଦେଇ ଲୋକଙ୍କୁ ଫୋନ୍ କରନ୍ତି । ଏହି ଲୋକମାନେ ନକଲି କାହାଣୀ ତିଆରି କରନ୍ତି, ପୀଡିତମାନଙ୍କୁ ଡରାଇଥାନ୍ତି ଏବଂ କ୍ରେଡିଟ୍ କାର୍ଡ ଡିଟେଲ୍ସ, ବ୍ୟାଙ୍କ ଆକାଉଣ୍ଟ ନମ୍ବର କିମ୍ବା ପାସୱାର୍ଡ ଡିଟେଲ୍ସ ପରି ସେମାନଙ୍କର ବ୍ୟକ୍ତିଗତ ସୂଚନା ହାସଲ କରନ୍ତି । ଅନେକ ସମୟରେ ପୀଡିତମାନଙ୍କୁ ଟଙ୍କା ସ୍ଥାନାନ୍ତର କରିବାକୁ କିମ୍ବା କ୍ରିପ୍ଟୋକରେନ୍ସିରେ ଇନଭେଷ୍ଟ କରିବାକୁ ବାଧ୍ୟ କରିଥାନ୍ତି ।
ନିକଟରେ ଭାରତରେ ଏପରି ଅନେକ ନକଲି କଲ୍ ସେଣ୍ଟର ଧରାପଡ଼ିଛି । ଯାହା ଖାସ୍ କରି ଆମେରିକୀୟ ନାଗରିକଙ୍କୁ ଟାର୍ଗେଟ କରିଥାଏ। ଏହି କଲ୍ ସେଣ୍ଟରଗୁଡ଼ିକ ମଧ୍ୟରୁ କିଛି ଆମେରିକୀୟମାନଙ୍କୁ ଟେକ୍ନିକାଲ୍ ସପୋର୍ଟ ନାଁରେ ଫୋନ୍ କରୁଥିଲେ ଏବଂ ସେମାନଙ୍କ କମ୍ପ୍ୟୁଟରରୁ ରିମୋଟ୍ ଆକ୍ସେସ୍ ନେଇ ଟଙ୍କା ଆଦାୟ କରୁଥିଲେ । କଲ୍ ସେଣ୍ଟରର ଲୋକମାନେ ବିଦେଶୀ ନାଗରିକଙ୍କ କମ୍ପ୍ୟୁଟରରେ ପପ୍-ଅପ୍ ପଠାଇ କହୁଥିଲେ ଯେ ଆପଣଙ୍କ କମ୍ପ୍ୟୁଟରରେ ଏକ ଭାଇରସ୍ ଲାଗିଛି । ଯାହା ଫଳରେ ଆପଣଙ୍କ କମ୍ପ୍ୟୁଟରକୁ ହ୍ୟାକ୍ କରାଯାଇପାରେ ଏବଂ ନିଜକୁ ମାଇକ୍ରୋସଫ୍ଟ ଟେକ୍ନିକାଲ୍ ସପୋର୍ଟ ବୋଲି କହି ଠକି ନେଇଥାନ୍ତି ।
ଏବେ ପ୍ରଶ୍ନ ଆସୁଛି ଏହି ଠକମାନେ କିପରି କାମ କରନ୍ତି ? ଠକମାନେ ବେଆଇନ ଭାବରେ ଡାଟା କିଣନ୍ତି, ଯେଉଁଥିରେ ଲୋକଙ୍କ ଫୋନ୍ ନମ୍ବର ଏବଂ କ୍ରେଡିଟ୍ କାର୍ଡ ସୂଚନା ରହିଥାଏ । ପୀଡିତମାନଙ୍କୁ କୁହାଯାଏ ଯେ ସେମାନଙ୍କ ଆକାଉଣ୍ଟରେ ଏକ ସନ୍ଦେହଜନକ କାରବାର ହୋଇଛି କିମ୍ବା ସେମାନଙ୍କ ବିରୁଦ୍ଧରେ ତଦନ୍ତ ଚାଲିଛି । ଯାହା ଦ୍ୱାରା ସେମାନେ ଭୟଭୀତ ହୋଇଯାଆନ୍ତି । ପୀଡିତମାନଙ୍କୁ ଟଙ୍କା ସ୍ଥାନାନ୍ତର କରିବାକୁ, ଗିଫ୍ଟ କାର୍ଡ କିଣିବାକୁ କିମ୍ବା କ୍ରିପ୍ଟୋକରେନ୍ସିରେ ଇନଭେଷ୍ଟ କରିବାକୁ ବାଧ୍ୟ କରାଯାଏ।
ଏହି ସ୍କାମ କାରଣରୁ ଆମେରିକାର କିଛି ଲୋକ ଭାରତୀୟମାନଙ୍କୁ ଦାୟୀ କରିବା ଆରମ୍ଭ କରିଛନ୍ତି । ଉଦାହରଣ ସ୍ୱରୂପ ଏକ CBI ତଦନ୍ତରୁ ଜଣାପଡିଛି ଯେ ଅହମ୍ମଦାବାଦ, ପୁଣେ ଏବଂ ବିଶାଖାପାଟନମ୍ ଭଳି ସହରରେ କାର୍ଯ୍ୟ କରୁଥିବା କଲ୍ ସେଣ୍ଟରଗୁଡ଼ିକ ଆମେରିକୀୟ ନାଗରିକମାନଙ୍କଠାରୁ ଲକ୍ଷ ଲକ୍ଷ ଡଲାର ନେଇ ଠକେଇ କରିଛନ୍ତି।
