ନୂଆଦିଲ୍ଲୀ: ଶୁଳ୍କ ଲଦିବା ପରେ ଭାରତକୁ ମୃତ ଅର୍ଥନୀତି ବୋଲି କହି କଟାକ୍ଷ କରିଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏହାକୁ ନେଇ ମୋଦୀ ସରକାରଙ୍କ ପକ୍ଷରୁ ଯଦିଓ ଟ୍ରମ୍ପଙ୍କୁ ସିଧାସଳଖ କୌଣସି ଉତ୍ତର ଦିଆଯାଇ ନଥିଲା ତେବେ ପରୋକ୍ଷରେ ଏକାଧିକ କଟାକ୍ଷ କରିଥିଲେ କେନ୍ଦ୍ରମନ୍ତ୍ରୀ ମଣ୍ଡଳ।
ରବିବାର ପୁଣି ସେହି ଢଙ୍ଗରେ ଟ୍ରମ୍ପଙ୍କୁ କଟାକ୍ଷ କରିଛନ୍ତି କେନ୍ଦ୍ର ବାଣିଜ୍ୟମନ୍ତ୍ରୀ ପୀୟୂଷ ଗୋୟଲ। କେନ୍ଦ୍ର ମନ୍ତ୍ରୀ ଆଜି ସୋସିଆଲ ମିଡିଆରେ ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF)ଦ୍ୱାରା ଦେଶମାନଙ୍କର ନୂଆ ଅଭିବୃଦ୍ଧି ଆକଳନର ଏକ ଚାର୍ଟ ଶେୟାର କରିଛନ୍ତି। ଏହି ଚାର୍ଟ ଦ୍ୱାରା ସେ ଟ୍ରମ୍ପଙ୍କ ମୃତ ଅର୍ଥନୀତି କଥାକୁ ପ୍ରମାଣିତ କରି ଭାରତର ଅର୍ଥନୀତିର ଅଗ୍ରଗତିକୁ ସେ ଦର୍ଶଇଛନ୍ତି।
କୌଣସି ନାଁ ନ ନେଇ, ଗୋୟଲ ଆଇଏମଏଫର ବିଶ୍ୱ ଅର୍ଥନୈତିକ ଆଉଟଲୁକ୍ ଅପଡେଟ୍ (ଜୁଲାଇ ୨୦୨୫)ର ଏକ ଚାର୍ଟ ପୋଷ୍ଟ କରିଛନ୍ତି। ଯେଉଁଥିରେ ସେ ଲେଖିଛନ୍ତି: "ଭାରତର ଅର୍ଥନୀତି ସମୃଦ୍ଧ ହେଉଛି।" ଚାର୍ଟରେ ଭାରତ ୨୦୨୬ ପର୍ଯ୍ୟନ୍ତ ବିଶ୍ୱ ଅଭିବୃଦ୍ଧିର ନେତୃତ୍ୱ ନେଉଥିବା ଦର୍ଶାଯାଇଛି। ଯାହାର ଜିଡିପି ଅଭିବୃଦ୍ଧି ହାର ୬.୪% ହେବ ବୋଲି ଆକଳନ କରାଯାଇଛି। ଯାହା ଆମେରିକାର ୨.୦% ତୁଳନାରେ ଅଧିକ ରହିଛି। ଏହି ତାଲିକାରେ ଭାରତ ପରେ ଚୀନ ୫.୦ ଅଭିବୃଦ୍ଧି ସହ ଦ୍ୱିତୀୟରେ ରହିଛି।
India’s economy is THRIVING 🇮🇳 pic.twitter.com/HhO9eJisPr
— Piyush Goyal (@PiyushGoyal) August 3, 2025
ଭାରତର ବହୁ ପଛରେ ଆମେରିକା
IMF ଆକଳନ ଅନୁଯାୟୀ, ଭାରତ ୨୦୨୪ ରେ ୬.୫% ହାରରେ ଅଭିବୃଦ୍ଧି ହାସଲ କରିବ ଏବଂ ୨୦୨୫ ଏବଂ ୨୦୨୬ ଉଭୟରେ ୬.୪% ଅଭିବୃଦ୍ଧି ବଜାୟ ରଖିବ ବୋଲି ଆକଳନ କରାଯାଇଛି। ଏହାର ବିପରୀତରେ, ୨୦୨୪ରେ ଆମେରିକାର ଅର୍ଥନୀତି ୨.୮% ହାରରେ ଅଭିବୃଦ୍ଧି ହାସଲ କରିବ ବୋଲି ଆକଳନ କରାଯାଇଛି। ୨୦୨୫ରେ ଏହା ୧.୯% କୁ ହ୍ରାସ ପାଇବ ଏବଂ ୨୦୨୬ରେ ଏହା ସାମାନ୍ୟ ବୃଦ୍ଧି ପାଇ ୨.୦%ରେ ପହଞ୍ଚିବ। ଭାରତର ପ୍ରଦର୍ଶନ ଜର୍ମାନୀ (୨୦୨୪ ରେ -୦.୨%), ଜାପାନ (୦.୨%), ଏବଂ ୟୁକେ (୧.୧%) ଭଳି ଅନ୍ୟ ପ୍ରମୁଖ ଅର୍ଥନୀତିକୁ ମଧ୍ୟ ପଛରେ ପକାଇ ଦେଇଛି।
ଆଇଏମଏଫ୍ ଚାର୍ଟରେ ବିଶ୍ୱ ଅଭିବୃଦ୍ଧି ୨୦୨୪ରେ ୩.୩% ଏବଂ ୨୦୨୫ ରେ ୩.୦% ବୃଦ୍ଧି ପାଇବ ବୋଲି ଆକଳନ କରାଯାଇଛି। ଏଥିରେ ଉନ୍ନତ ଅର୍ଥନୀତିଗୁଡ଼ିକ ପଛରେ ପଡ଼ିଯିବ ବୋଲି କୁହାଯାଇଛି। ୨୦୨୪ରେ ୟୁରୋପିୟନ ୟୁନିୟନ କ୍ଷେତ୍ର ୦.୯% ଏବଂ ଜାପାନ ମାତ୍ର ୦.୨% ବୃଦ୍ଧି ପାଇବ। ଉଦୀୟମାନ ବଜାର ମଧ୍ୟରେ, ଭାରତ ତାଲିକାର ଶୀର୍ଷରେ ଅଛି, ତା'ପରେ ଚୀନ ୨୦୨୪ ରେ ୫.୦% ଏବଂ 2026 ରେ ୪.୨% ବୃଦ୍ଧି ପାଇବ ବୋଲି ଆକଳନ କରାଯାଇଛି।
