ହାଇଦ୍ରାବାଦ: ତେଲେଙ୍ଗାନା କଂଗ୍ରେସରେ କନ୍ଦଳ। ବିଧାୟକମାନଙ୍କର ଗୁପ୍ତ ବୈଠକ, ରାଜନୈତିକ ମସୁଧା। ମିଳିମିଶି ନିର୍ବାଚନ ଜିତିଲେ, ସରକାର ଗଢ଼ିଲେ। ହେଲେ ଦଳ ଭିତରେ ଫାଟ ଦେଖା ଦେବାରୁ ଚିନ୍ତାରେ ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ।
ମିଳିଥିବା ସୂଚନା ଅନୁସାରେ, ତେଲେଙ୍ଗାନାରେ ସ୍ଥାନୀୟ ନିର୍ବାଚନ ଥିବାରୁ କଂଗ୍ରେସର ୧୦ ବିଧାୟକ ଗୁପ୍ତ ବୈଠକ କରିଛନ୍ତି। ଯାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇ ଯାଇଛି। ହାଇଦ୍ରାବାଦର ଉପକଣ୍ଠରେ ଅବସ୍ଥିତ ଗାଣ୍ଡିପେଟରେ ବିଧାୟକ ଅନିରୁଦ୍ଧ ରେଡ୍ଡୀଙ୍କ ଫାର୍ମହାଉସରେ ରୁଦ୍ଧଦ୍ୱାର ଆଲୋଚନା କରିଥିଲେ କଂଗ୍ରେସ ବିଧାୟକ। ସେଠାରେ କ’ଣ ସବୁ ଆଲୋଚନା ହେଲା, ସେ ନେଇ ଯଦିଓ କୌଣସି କଥା ସାମ୍ନାକୁ ଆସି ନାହିଁ ତେବେ ଶୀର୍ଷ ନେତୃତ୍ୱର ମୁଣ୍ଡ ବଥେଇଲାଣି।
ଏସବୁ ଗୁପ୍ତ ଷଡ଼ଯନ୍ତ୍ରର ମୁଖ୍ୟ କାରଣ ରେବନ୍ତ ରେଡ୍ଡୀଙ୍କ ଦୁର୍ନୀତି ଖୋର ମନ୍ତ୍ରୀଙ୍କ କାର୍ଯ୍ୟକଳାପ ପାଇଁ। ପ୍ରକୃତରେ ଦୁଇ ଜଣ ମନ୍ତ୍ରୀ କଣ୍ଟ୍ରାକ୍ଟଙ୍କର ବିଲ୍ ପାସ୍ କରିବା ପାଇଁ ଲାଞ୍ଚ ମାଗୁଥିଲେ। ସରକାରରେ ତାଙ୍କ ବିରୋଧରେ ଅସନ୍ତୋଷ ତେଜୁଛି। ବିଶେଷକରି ତେଲେଙ୍ଗାନାର ସୂଚନା ଏବଂ ଲୋକସମ୍ପର୍କ ମନ୍ତ୍ରୀ ପୋଙ୍ଗୁଲେଟି ଶ୍ରୀନିବାସ ରେଡ୍ଡୀଙ୍କ ବିରୁଦ୍ଧରେ ଦଳ ଭିତରେ ଅସନ୍ତୋଷ ବଢ଼ିଛି। ସେ ବିଷୟରେ ଆଲୋଚନା ସ୍ୱର ଉତ୍ତୋଳନ ପାଇଁ ୧୦ ବିଧାୟକ ଏକତ୍ର ହୋଇଥିବା କୁହାଯାଉଛି।
ରୁଦ୍ଧଦ୍ୱାର ବୈଠକରେ ଥିବା ବିଧାୟକମାନେ ହେଲେ – ନୈନି ରାଜେନ୍ଦର ରେଡ୍ଡୀ,ଭୋପାଥୀ ରେଡ୍ଡୀ,ୟେନାମ୍ ଶ୍ରୀନିବାସ ରେଡ୍ଡୀ, ମୁରଲୀ ନାୟକ, କୁଚକୁଲ୍ଲା ରାଜେଶ ରେଡ୍ଡୀ,ସଞ୍ଜୀବ ରେଡ୍ଡୀ, ଅନିରୁଦ୍ଧ ରେଡ୍ଡୀ, ଲକ୍ଷ୍ମୀ କାନ୍ତା ରାଓ, ଡୋନ୍ଥୀ ମାଧବ ରେଡ୍ଡି, ବେରଲା ଇଲିୟା।
ନିଜ ସରକାରର ମନ୍ତ୍ରୀଙ୍କ ବିରୋଧରେ ତେଜୁଥିବା ଅସନ୍ତୋଷର ସମାଧାନ ପାଇଁ ତତ୍ପର ଦେଖାଇଛନ୍ତି ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ। ଅଭିଯୁକ୍ତି ମନ୍ତ୍ରୀ ବିଶେଷ କରି ପୋଙ୍ଗୁଲେଟି ଶ୍ରୀନିବାସ ରେଡ୍ଡୀଙ୍କୁ କମାଣ୍ଡ କଣ୍ଟ୍ରୋଲ ସେଣ୍ଟରରେ ଭେଟିବାକୁ କହିଛନ୍ତି। ମନ୍ତ୍ରୀଙ୍କର ଥିବା ପାଲାୟର ଗସ୍ତ ରଦ୍ଦ କରି ସେ ବୈଠକରେ ଯୋଗ ଦିଅନ୍ତୁ ବୋଲି ରେଡ୍ଡୀ ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି।
କେବଳ ସେତିକି ନୁହେଁ ଆଗକୁ ବିଧାନପରିଷଦ ନିର୍ବାଚନ ଥିବାରୁ ଦଳର କୌଣସି ବିଧାୟକ ଯେମିତି ଗୁପ୍ତ ବୈଠକ ନ କରନ୍ତି, କି ବାହାରେ ଏନେଇ କୌଣସି ମନ୍ତବ୍ୟ ନ ଦିଅନ୍ତି ସେ ନେଇ ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ନିର୍ଦ୍ଦେଶ ଦେଇଛନ୍ତି। କାରଣ ଏପରି କଲେ ଲୋକଙ୍କ ପାଖକୁ ଭୁଲ ସେମେଜ୍ ଯିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏଥିସହିତ ମନ୍ତ୍ରୀମାନେ ଅସନ୍ତୋଷ ବିଧାୟକଙ୍କ ସହିତ ଆଲୋଚନା କରିବାକୁ ସେ ନିର୍ଦ୍ଦେଶ ଦେଇଛନ୍ତି।
ସେପଟେ ଗୁପ୍ତ ବୈଠକ ନେଇ ଆଲୋଚନା ହେବା ପରେ ଏହାକୁ ଖଣ୍ଡନ କରିଛନ୍ତି ତେଲେଙ୍ଗାନା, ନଗରକୁର୍ଣ୍ଣୁଲ ସାଂସଦ ମଲ୍ଲୁ ରବି। ସେ କହିଛନ୍ତି ଯେ ଏହା କେବଳ ଏକ ରାତ୍ରୀଭୋଜନ ବୈଠକ ଥିଲା ଆଇଟିସି କୋହିନୁର ହୋଟେଲ୍ରେ ବୈଠକ ହୋଇଥିଲା। କୌଣସି ଫାର୍ମ ହାଉସ୍ରେ ନୁହେଁ। ବିରୋଧୀ ବଢ଼େଇ ଚଢ଼େଇ ପ୍ରଚାର କରୁଛି ବୋଲି ସେ କହିଛନ୍ତି।
