ନୂଆଦିଲ୍ଲୀ: ଭାରତ-ପାକିସ୍ତାନ ଉତ୍ତେଜନା ମଧ୍ୟରେ ଭାରତୀୟ ରେଲଓ୍ବେ ବର୍ଡର  ଅଞ୍ଚଳରେ ରାତ୍ରି ସମୟରେ ଟ୍ରେନ ଚଳାଚଳ ନ କରିବାକୁ ନିଷ୍ପତ୍ତି ନେଇଛି। ପାକିସ୍ତାନ ସଂଲଗ୍ନ ଜମ୍ମୁ  ଓ ପଞ୍ଜାବ ସୀମା ଅଞ୍ଚଳରେ ରାତିରେ ଟ୍ରେନ ଚାଲିବ ନାହିଁ। ଅନ୍ୟପଟେ ରାଜସ୍ଥାନର ଜୈସଲମେର ରେଲଓ୍ଵେ ଷ୍ଟେସନରେ ଟ୍ରେନ ସଞ୍ଚାଳନ ସଂପୂର୍ଣ୍ଣ ବନ୍ଦ କରାଯାଇଛି। 

ମିଳିଥିବା ସୂଚନା ଅନୁସାରେ, ଅମୃତସର, ବଠିଣ୍ଡା, ଫିରୋଜପୁର, ଜମ୍ମୁ-କାଶ୍ମୀର ପରି ସ୍ଥାନରେ ରାତିରେ ଯାତାୟତ କରୁଥିବା ଟ୍ରେନଗୁଡ଼ିକର ଏବେ ରିସିଡ୍ୟୁଲ କରାଯିବ। ଏହି ସବୁ ଟ୍ରେନ ସକାଳେ ଚଳାଚଳ କରିବ। ସ୍ଵଳ୍ପ ଦୂରଗାମୀ ଟ୍ରେନ ବାତିଲ୍ କରାଯାଇଛି। ଜୈସଲମେରରେ ହାଇ ରେଡ୍ ଆଲର୍ଟ ଜାରି କରାଯାଇଛି। ତେଣୁ ଜିଲ୍ଲା ପ୍ରଶାସନର ପରାମର୍ଶକ୍ରମେ ଜୈସଲମେର ରେଲଓ୍ଵେ ଷ୍ଟେସନରେ ଟ୍ରେନ ଯାତାତୟନ ବନ୍ଦ କରାଯାଇଛି।

Also read:  ପାକିସ୍ତାନର ମୁଖା ଖୋଲିଲା ଆଫଗାନିସ୍ତାନ; ଭାରତର ମିସାଇଲ୍ ମାଡ଼ ଘଟଣାକୁ ତାଲିବାନର ଖାରଜ

ସୂଚନା ଅନୁସାରେ, ଯେଉଁ ଟ୍ରେନ ବର୍ଡର ଅଞ୍ଚଳରେ ରାତିରେ ପହଞ୍ଚୁଥିଲା, ସେହି ଟ୍ରେନଗୁଡ଼ିକୁ ସକାଳେ ଅମୃତସର, ଜମ୍ମୁ ଓ ଫିରୋଜପୁର ଅଭିମୁଖେ ଚଳାଚଳ ପାଇଁ ଅନୁମତି ଦିଆଯାଇଛି। ଏହି କାରଣରୁ ୧୫ରୁ ଅଧିକ ଟ୍ରେନ ପ୍ରଭାବିତ ହୋଇଛି। ଯାତ୍ରୀଙ୍କ ସୁବିଧା ପାଇଁ ରେଲଓ୍ଵେ ସ୍ପେଶାଲ ଟ୍ରେନ ଦିନରେ ଚଳାଇବାକୁ ନିଷ୍ପତ୍ତି ନେଇଛି। ଦିନରେ ଚାଲୁଥିବା ସମସ୍ତ ଟ୍ରେନ ଯେମିତି ଚାଲୁଥିଲା, ସେମିତି ଚାଲିବ। ସନ୍ଧ୍ୟାରେ ବ୍ଲାକଆଉଟ୍ ହେଉଥିବା କାରଣରୁ ଏହି ନିଷ୍ପତ୍ତି ନିଆଯାଇଛି। ପଞ୍ଜାବ, ଜମ୍ମୁ ଓ ରାଜସ୍ଥାନର ଅନେକ ଅଞ୍ଚଳରେ ରେଡ୍ ଆଲର୍ଟ ଜାରି କରାଯାଇଛି।

ସୂଚନାଯୋଗ୍ୟ, ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ସ୍ଥିତି ଉତ୍ପନ ହୋଇଛି। ଏବେ ଭାରତ ସରକାର ଆତଙ୍କବାଦୀଙ୍କୁ ସମୂଳେ ନାଶ କରିବାକୁ ପଣ କରିଛନ୍ତି। ଶନିବାର ତିନି ସେନାର ମୁଖ୍ୟ ଓ ସିଡିଏସଙ୍କ ସହ ଗୁରୁତ୍ଵପୂର୍ଣ୍ଣ ବୈଠକରେ ସରକାର ବଡ ନିଷ୍ପତ୍ତି ନେଇଛନ୍ତି। ଆତଙ୍କବାଦ ବିରୋଧୀ ଅଭିଯାନରେ ପାକିସ୍ତାନ ପକ୍ଷରୁ ଯଦି ଆକ୍ରମଣ କରାଯାଏ ତେବେ ତାକୁ ଯୁଦ୍ଧ ବୋଲି ବିବେଚନା କରାଯିବ। ଆଉ ସେହି ପ୍ରକାରର ଜବାବ ଦିଆଯିବ।