ନୂଆଦିଲ୍ଲୀ ୩୧।୧: ଦେଶରେ ଫେବୃଆରୀ ୧ ତାରିଖ ଦିନ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫-୨୬ ବର୍ଷ ନିମନ୍ତେ ବଜେଟ୍ ଉପସ୍ଥାପନ କରିବେ। ଏହି ବଜେଟକୁ ନେଇ ଲୋକେ ଖୁବ ଆଶାୟୀ ଅଛନ୍ତି। ଶନିବାର ବଜେଟ ଉପସ୍ଥାପନା ସହିତ ଦେଶରେ ୫ଟି ନିୟମ ବଦଳିଯିବ। ଯାହାର ସିଧା ପ୍ରଭାବ ଲୋକଙ୍କ ପକେଟ ଉପରେ ପଡିବ। ତେବେ ଆସନ୍ତୁ ଜାଣିବା କଣ ସବୁ ବଦଳିବ।
ବଦଳିବ ଏଲପିଜି ସିଲିଣ୍ଡରର ଦର
ପ୍ରତି ମାସର ୧ ତାରିଖରେ ଅଏଲ ମାର୍କେଟିଂ କମ୍ପାନୀମାନେ ଏଲପିଜି ଦର ନିର୍ଦ୍ଧାରଣ କରିଥାନ୍ତି ଓ ନୂଆ ଦର ଜାରି କରନ୍ତି। ଯାହାର ପ୍ରଭାବ ଘରର ରୋଷେଇଠାରୁ ଆରମ୍ଭ କରି ରେଷ୍ଟୁରାଣ୍ଟ ଓ ଅନ୍ୟ ବ୍ୟବସାୟ ଉପରେ ମଧ୍ୟ ପଡିଥାଏ। ଫେବୃଆରୀ ୧ ତାରିଖରେ ମଧ୍ୟ କମ୍ପାନୀ ମାନେ ଏଲପିଜିର ନୂଆ ଦର ଜାରି କରିପାରନ୍ତି। ଗତ କିଛି ମାସ ହେଲା ୧୯ କେଜି କମର୍ସିଆଲ ଗ୍ୟାସ ସିଲିଣ୍ଡରର ଦର ତଳ ଉପର ହେଉଛି। ହେଲେ ୧୪ କେଜିର ଘରୋଇ ଗ୍ୟାସ୍ ସିଲିଣ୍ଡର ଦର ଅପରିବର୍ତ୍ତିତ ରହିଛି। ଏଣୁ ଲୋକେ ବଜେଟ ସମୟରେ ପରିବର୍ତ୍ତନର ଆଶା ରଖୁଛନ୍ତି ଓ ଘରୋଇ ଗ୍ୟାସ୍ ସିଲିଣ୍ଡର ଦର ହ୍ରାସ ଚାହୁଁଛନ୍ତି।
ଏଟିଏଫର ଦର ହ୍ରାସ
ଉତ୍ତରପ୍ରଦେଶ ପ୍ରୟାଗରାଜରେ ମହାକୁମ୍ଭ ଯୋଗୁ ବିମାନ ଭଡ଼ା ବୃଦ୍ଧି ହୋଇଛି। ଫଳରେ ଏଥିରେ ସରକାର ଓ ଡିଜିସିଏଙ୍କୁ ହସ୍ତକ୍ଷେପ କରିବାକୁ ପଡିଛି। ଏଣୁ ଫେବୃଆରୀ ୧ ତାରିଖରେ ହେବାକୁ ଯାଉଥିବା ପରିବର୍ତ୍ତନରେ ବିମାନ ଭଡ଼ ସଂକ୍ରାନ୍ତିୟ ପରିବର୍ତ୍ତନ ମଧ୍ୟ ହୋଇ ପାରେ। କାରଣ ଅଏଲ ମାର୍କେଟିଂ କମ୍ପାନୀମାନେ ବିମାନ ଇନ୍ଧନ ଅର୍ଥାତ ଏୟାର ଟର୍ବାଇନ ପ୍ୟୁଲ (ଏଟିଏଫ) ମୂଲ୍ୟ ମଧ୍ୟ ସଂଶୋଧନ କରନ୍ତି। ଗତ କିଛି ମାସ ହେଲା ଏଟିଏଫ ଦର ହ୍ରାସ ହୋଇଛି ଓ ଏଥର ମଧ୍ୟ ଏହା କାୟମ ରହିବ ବୋଲି ଅନୁମାନ କରାଯାଉଛି। ଏଟିଏଫ ମୂଲ୍ୟରେ ପରିବର୍ତ୍ତନ ବିମାନରେ ଯାତ୍ରା କରୁଥିବା ଲୋକଙ୍କ ଖର୍ଚ୍ଚ କମ୍ ବା ଅଧିକ କରିପାରେ।
ବଦଳିଯିବ ୟୁପିଆଇ ଟ୍ରାଞ୍ଜାକ୍ସନ ସମ୍ପର୍କିତ ନିୟମ
ଭାରତରେ ଫେବୃଆରୀ ୧ ତାରିଖରୁ ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍ (ୟୁପିଆଇ) ନେଣଦେଣ ସମ୍ପର୍କିତ ନିୟମରେ ପରିବର୍ତ୍ତନ ହେବ। ଏହି ନିୟମ ଅନୁସାରେ ଫୋନ ପେ, ଗୁଗଲ ପେ ଭଳି ଆପ ବ୍ୟବହାର କରି ହଜାର ହଜାର ଲୋକେ ୟୁପିଆଇର ଉପଯୋଗ କରୁଛନ୍ତି। ଏବେ ନ୍ୟାସନାଲ ପେମେଣ୍ଟ କର୍ପୋରେସନ ଅଫ ଇଣ୍ଡିଆ (ଏନପିସିଆଇ) ୟୁପିଆଇ ଟ୍ରାଞ୍ଜାକ୍ସନ ଆଇଡି ଷ୍ଟାଣ୍ଡାର୍ଡର କରିବାକୁ ଘୋଷଣା କରିଛନ୍ତି। ଏହାର ଅର୍ଥ ହେଉଛି ଯଦି ୟୁପିଆଇ ଟ୍ରାଞ୍ଜାକ୍ସନ ଆଇଡିରେ ଯଦି କୌଣସି ସ୍ପେଶାଲ କ୍ୟାରେକ୍ଟର ବ୍ୟବହାର କରାଯାଏ ତେବେ ସେହି ଆପସ୍ରୁ ପେମେଣ୍ଟ ହୋଇ ପାରିବ ନାହିଁ ଓ ଟ୍ରାଞ୍ଜାକ୍ସନ କ୍ୟାନସଲ କରିଦିଆଯିବ। ଏବେ କେବଳ ଆଲଫା ନ୍ୟୁମରିକ (ଅକ୍ଷର ଓ ନମ୍ବର) କ୍ୟାରେକ୍ଟରରେ ତିଆରି ଆଇଡି ବୈଧ ମାନ୍ୟ ହେବ।
ମାରୁତି କାର କିଣିବା ହେବ ମହଙ୍ଗା
ଭାରତର ପ୍ରମୁଖ କାର ନିର୍ମାତା ମାରୁତି ସୁଜୁକି ୧ ଫେବୃଆରୀରୁ ନିଜ କାର ମୂଲ୍ୟ ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି। ଏହି ଦରବୃଦ୍ଧି ଉତ୍ପାଦନ ଖର୍ଚ୍ଚ ବୃଦ୍ଧି ଯୋଗୁ ହେବ। ଯେଉଁ କାରଗୁଡିକର ମୂଲ୍ୟ ବଦଳିବ ସେଥିରେ ଅଲ୍ଟୋ କେ-୧୦, ଏସ-ପ୍ରେସୋ, ସେଲେରିୟୋ, ୱାଗନ ଆର, ସ୍ୱିଫ୍ଟ ଡିଜାୟର, ବ୍ରେଜା, ଆର୍ଟିଗା, ଇଗ୍ନିସ୍, ବଲେନୋ, ସିଆଜ, ଏକ୍ସଏଲ-୬, ଫ୍ରୋଙ୍କସ, ଇନଭିକ୍ଟୋ, ଜିମ୍ନି ଓ ଗ୍ରାଣ୍ଡ ଭିଟାରା ଆଦିର ଦର ବଢିବ। ଏହାର ଅର୍ଥ ଏବେ ମାରୁତି କାର କିଣିବାକୁ ଚାହୁଁଥିଲେ ଆପଣଙ୍କୁ ଅଧିକ ଖର୍ଚ୍ଚ କରିବାକୁ ପଡିବ।
ବଦଳିଯିବ ବ୍ୟାଙ୍କିଙ୍ଗ ନିୟମ
୧ ଫେବୃଆରୀ ୨୦୨୫ରୁ କୋଟାକ ମହିନ୍ଦ୍ରା ବ୍ୟାଙ୍କ ତାଙ୍କର କିଛି ସେବା ଓ ଶୁଳ୍କରେ ପରିବର୍ତ୍ତନ କରିବେ। ଏଥିରେ ସବୁଠୁ ବଡ଼ ପରିବର୍ତ୍ତନ ଏଟିଏମ ଟ୍ରାଞ୍ଜାକ୍ସନ ଫ୍ରି ଲିମିଟ୍ ଓ ଅନ୍ୟ ବ୍ୟାଙ୍କିଙ୍ଗ ସେବାମାନଙ୍କର ଶୁଳ୍କ ବୃଦ୍ଧି ହୋଇପାରେ। ଏହାର ଅର୍ଥ ଯଦି ଆପଣ କୋଟାକ ମହିନ୍ଦ୍ରା ବ୍ୟାଙ୍କର ଗ୍ରାହକ ତେବେ ଏହି ପରିବର୍ତ୍ତନର ପ୍ରଭାବ ସିଧା ଆପଣଙ୍କ ପକେଟ ଉପରେ ପଡିବ।
