ନୂଆଦିଲ୍ଲୀ: ରାଜ୍ୟପାଳଙ୍କ ଦ୍ୱାରା ପଠାଯାଇଥିବା ବିଧେୟକ ଉପରେ ତିନି ମାସ ଭିତରେ ରାଷ୍ଟ୍ରପତି ନିର୍ଣ୍ଣୟ ନେବେ । ତାମିଲନାଡ଼ୁ ରାଜ୍ୟ ବନାମ ତାମିଲନାଡ଼ୁ ରାଜ୍ୟପାଳ ମାମଲାରେ ସୁପ୍ରିମକୋର୍ଟ ଐତିହାସିକ ରାୟ ଦେଇଛନ୍ତି । ସମ୍ୱିଧାନର ଧାରା ୨୦୧ ଅନୁସାରେ ରାଷ୍ଟ୍ରପତିଙ୍କ ବିଚାର ପାଇଁ ରାଜ୍ୟପାଳଙ୍କ ଦ୍ୱାରା ରଖାଯାଇଥିବା ବିଲ୍ ଉପରେ ଆକ୍ସନ ନେବା ପାଇଁ ସମୟ ଧାର୍ଯ୍ୟ କରିଛନ୍ତି । ଏହାସହ ରାଷ୍ଟ୍ରପତିଙ୍କ କାର୍ଯ୍ୟ ନ୍ୟାୟିକ ସମୀକ୍ଷା ଅଧିନରେ ରହିଛି ବୋଲି ସୁପ୍ରିମକୋର୍ଟ କହିଛନ୍ତି । ସେହିପରି ସମ୍ୱିଧାନର ଧାରା ୨୦୦ ଅନୁସାରେ ବିଲ୍ ଉପରେ ରାଜ୍ୟପାଳଙ୍କ ଆକ୍ସନ ପାଇଁ ମଧ୍ୟ ସମୟସୀମା ଧାର୍ଯ୍ୟ କରିଛନ୍ତି ।
ତାମିଲନାଡ଼ୁ ରାଜ୍ୟ ବନାମ ତାମିଲନାଡ଼ୁ ରାଜ୍ୟପାଳ ମାମଲାରେ ସୁପ୍ରିମକୋର୍ଟ ଶୁକ୍ରବାର ବିଳମ୍ୱିତ ରାତିରେ ୪୧୫ ପୃଷ୍ଠାର ଏକ ରାୟ ରିଲିଜ୍ କରିଛନ୍ତି । ସୁପ୍ରିମକୋର୍ଟଙ୍କ ଅଫିସିଆଲ୍ ସାଇଟରେ ଏହି ରାୟକୁ ଅପଲୋଡ୍ କରାଯାଇଛି । ନ୍ୟାୟମୂର୍ତ୍ତି ଜେପି ପରୀଦୱାଲା ଓ ଜଷ୍ଟିସ୍ ମହାଦେବନଙ୍କ ଖଣ୍ଡପୀଠ କହିଛନ୍ତି, 'ରାଜ୍ୟପାଳଙ୍କ ଦ୍ୱାରା ବିଚାର ପାଇଁ ସଂରକ୍ଷିତ ରଖାଯାଇଥିବା ବିଲ୍ ଉପରେ ରାଷ୍ଟ୍ରପତି ତିନି ମାସ ଭିତରେ ନିଷ୍ପତ୍ତି ନେବା ଆବଶ୍ୟକ ।'
ରାୟରେ କୁହାଯାଇଛି ଯେ ଯଦି ଏହି ଅବିଧକୁ ଅତିକ୍ରମ କରାଯାଏ ତେବେ ସମ୍ୱନ୍ଧୀତ ରାଜ୍ୟ ସରକାରଙ୍କୁ ବିଳମ୍ୱ ପଛର କାରଣ ଜଣାଇବାକୁ ହେବ । ତେବେ ଏଥିରେ ରାଜ୍ୟ ସରକାରଙ୍କ ମଧ୍ୟ ସହଯୋଗ କରିବେ । ଆଦେଶରେ କୁହାଯାଇଛି ଯେ ସମ୍ୱିଧାନର ଅନୁଚ୍ଛେଦ ୨୦୧ ଅନୁସାରେ କୌଣସି ବିଧେୟକକୁ ରାଜ୍ୟପାଳଙ୍କ ଦ୍ୱାରା ରାଷ୍ଟ୍ରପତିଙ୍କ ନିକଟକୁ ପଠାଗଲେ, ତାହା ଉପରେ ସହମତି କମ୍ୱା ଅସହମତି ଦେବାକୁ ପଡ଼ିଥାଏ । ତେବେ ସମ୍ୱିଧାନରେ ଏହି ପ୍ରକ୍ରିୟା ପାଇଁ କୌଣସି ସମୟ ସୀମା ଧାର୍ଯ୍ୟ କରାଯାଇ ନାହିଁ । ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ ରାଜ୍ୟପାଳଙ୍କ ପରି ରାଷ୍ଟ୍ରପତି ମଧ୍ୟ ‘ଆବସୋଲ୍ୟୁଟ୍ ଭିଟୋ’କୁ ବ୍ୟବହାର କରିପାରିବେ ନାହିଁ । ଅର୍ଥାତ୍ ସେ ଅନିଶ୍ଚିତକାଳ ପର୍ଯ୍ୟନ୍ତ ବିଲକୁ ବିଚାରାଧିନ ରଖିପାରିବେ ନାହିଁ ।
ସୁପ୍ରିମକୋର୍ଟ କହିଛନ୍ତି ଯେ ଯଦି ନିର୍ଦ୍ଧାରିତ ସମୟସୀମା ଭିତରେ ରାଷ୍ଟ୍ରପତି କୌଣସି ନିର୍ଣ୍ଣୟ ନନିଅନ୍ତି ତେବେ ସମ୍ୱନ୍ଧୀତ ରାଜ୍ୟ କୋର୍ଟଙ୍କ ଦ୍ୱାରସ୍ଥ ହୋଇପାରିବେ । ଯଦି କୌଣସି ବିଧେୟକକୁ ତାର ସାମ୍ୱିଧାନିକ ବୈଧତା କାରଣରୁ ରୋକା ଯାଏ ତେବେ ସେହି କ୍ଷେତ୍ରରେ କାର୍ଯ୍ୟପାଳିକା ଅଦାଲତ ଭୂମିକା ନଗ୍ରହଣ କରିବା ଦରକାର ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି । ଏପରି ମାମଲାକୁ ଅନୁଚ୍ଛେଦ ୧୪୩ ଅଧିନରେ ସୁପ୍ରିମକୋର୍ଟ ପଠାଯିବା ଦରକାର । ଏହି ରାୟ ଏଭଳି ସମୟରେ ଆସିଛି ଯେତେବେଳେ ସର୍ବୋଚ୍ଚ ଅଦାଲତ ତାମିଲନାଡୁ ରାଜ୍ୟପାଳ ଆର୍ ଏନ୍ ରବିଙ୍କ ଦ୍ୱାରା ୧୦ ବିଧେୟକକୁ ରାଷ୍ଟ୍ରପତିଙ୍କ ନିକଟକୁ ପଠାଇବା ପଦକ୍ଷେପକୁ ବେଆଇନ ଓ ତ୍ରୁଟିପୂର୍ଣ୍ଣ କହିଥିଲେ ।
