୬ ବର୍ଷରୁ ୧୫ ବର୍ଷ ଯାଏଁ ନାବାଳିକାକୁ କରୁଥିଲା ବାଳାତ୍କାର, ଏବେ କିଛି ଦଶନ୍ଧି ଯାଏଁ ଜେଲରେ ରହିବ

ନୂଆଦିଲ୍ଲୀ: ନାବାଳିକାକୁ ବାରମ୍ୱାର ଦେଉଥିଲା ଯୌନ ନିର୍ଯାତନା । କରୁଥିଲା ବାଳାତ୍କାର । ଏବେ ସେହି ଯୁବକ ଜେଲରେ ରହିବ ୩୫ରୁ ୭୦ ବର୍ଷ । ପୀଡ଼ିତା ନାବାଳିକାଟି ପ୍ରାୟ ୯ ବର୍ଷ ପରେ ଅକଥନୀୟ ଯନ୍ତ୍ରଣା ନେଇ ପୋଲିସ ପାଖରେ ଅଭିଯୋଗ କରିଥିଲା । କୋର୍ଟ ଏବେ ଶୁଣାଇଛନ୍ତି ଦଣ୍ଡାଦେଶ । ଅଭିଯୁକ୍ତ ଜଣକ ଆମେରିକାର ପେନସିଲଭାନିଆ ବାସିନ୍ଦା । ଜଣେ କିଶୋରୀଙ୍କୁ ବାରମ୍ବାର ଯୌନ ନିର୍ଯାତନା ଦେବା ମାମଲାରେ ଦୋଷୀ ସାବ୍ୟସ୍ତ ହେବା ପରେ ଏବେ ସେ କିଛି ଦଶନ୍ଧି ଯାଏଁ ଜେଲରେ ରହିବ । ୨୨ ବର୍ଷୀୟ ଡାଲଟନ୍ ରୋଡନି ଲୁଇସ୍‌କୁ ଅକ୍ଟୋବର ୨୩ରେ ଏକ ବଳାତ୍କାର ଏବଂ ଛଅଟି ଅନିଚ୍ଛାକୃତ ଯୌନ ସମ୍ପର୍କ ପାଇଁ ଦୋଷୀ ସାବ୍ୟସ୍ତ କରାଯାଇଛି ।

ଲାଙ୍କାଷ୍ଟର କାଉଣ୍ଟି ଜିଲ୍ଲା ଓକିଲଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ପୀଡିତାଙ୍କୁ ଲୁଇସ୍ ପ୍ରାୟ ୬ ବର୍ଷ ବୟସରୁ ତାଙ୍କ ଘରେ ବାରମ୍ବାର ବଳାତ୍କାର କରିଥିଲା । ତେବେ ଜାନୁଆରୀ ୨୦୨୪ରେ ୧୫ ବର୍ଷୀୟା ପୀଡିତା ପୋଲିସ ନିକଟରେ ପ୍ରଥମେ ଅଭିଯୋଗ କରିଥିଲେ । କହିଥିଲେ ଯେ ଲୁଇସ୍ ତାଙ୍କୁ ବର୍ଷ ବର୍ଷ ଧରି ତାଙ୍କ ଇଚ୍ଛା ବିରୁଦ୍ଧରେ ଯୌନ ସମ୍ପର୍କ ରଖିବାକୁ ବାଧ୍ୟ କରୁଥିଲା । ଅଭିଯୁକ୍ତ ଲୁଇସ୍ ମଧ୍ୟ ପୀଡ଼ିତାଙ୍କୁ ଯୌନ ନିର୍ଯାତନା ଦେଇଥିବା କଥା ପୋଲିସ ଆଗରେ ସ୍ୱୀକାର କରିଥିଲା । ଏହା ପରେ ତାକୁ ଗିରଫ କରାଯାଇଥିଲା ।

ରିପୋର୍ଟ ଅନୁସାରେ ସହାୟକ ଜିଲ୍ଲା ଓକିଲ ଫ୍ରିଜ୍ ହାଭରଷ୍ଟିକ୍ କୋର୍ଟକୁ କହିଥିଲେ ଯେ ଲୁଇସ୍ ପ୍ରାୟ ଏକ ଦଶନ୍ଧି ଧରି ନାବାଳିକାକୁ "ଯୌନ ଖେଳନା" ଭାବରେ ବ୍ୟବହାର କରିଥିଲେ । ପୀଡିତା ମଧ୍ୟ କୋର୍ଟରେ କହିଥିଲେ ଯେ ଲୁଇସର ଯାତନାର ସ୍ମୃତି ସହିତ ଜୀବନ ଅତିବାହିତ କରିବାକୁ ସେ ସଂଘର୍ଷ କରୁଛନ୍ତି ।

ଲୁଇସର ଓକିଲ ସରକାରୀ ଓକିଲଙ୍କ ସହ ସହମତ ହୋଇଥିଲେ ଯେ ତାଙ୍କ ମହକିଲଙ୍କ ଆଚରଣ "ପ୍ରତ୍ୟେକ ବାପା-ମାଆଙ୍କ ପାଇଁ ସବୁଠାରୁ ଖରାପ ଦୁଃସ୍ୱପ୍ନ" । ତେବେ ସେ ଯୁକ୍ତି କରିଥିଲେ ଯେ ଏପରି ଯୌନ ନିର୍ଯାତନା ଦେବା ସମୟରେ ଲୁଇସର ବୟସ କମ୍ ଥିଲା ତେଣୁ ସେ କମ ଦଣ୍ଡ ଦିଆଯିବା ଆବଶ୍ୟକ । ସରକାରୀ ଓକିଲଙ୍କ ଅନୁସାରେ, ପୀଡିତା, ତାଙ୍କ ପରିବାର ଏବଂ କୋର୍ଟଙ୍କୁ ତାଙ୍କ କାର୍ଯ୍ୟ ପାଇଁ ଲୁଇସ୍ କ୍ଷମା ପ୍ରାର୍ଥନା କରିଥିଲେ । ଏହା ପରେ ବି କୋର୍ଟ ମାମଲାର ଶୁଣାଣି କରି ଲୁଇସକୁ ୩୫ରୁ ୭୦ ବର୍ଷ ଜେଲ୍ ଦଣ୍ଡ ପାଇଁ ନିର୍ଦ୍ଦେଶ ଦେଇଛନ୍ତି ।