ନୂଆଦିଲ୍ଲୀ: ମାର୍ଚ୍ଚ ମାସରେ ଖୁଚୁରା ମୁଦ୍ରାସ୍ଫୀତି ୩.୩୪%କୁ ହ୍ରାସ ପାଇଛି। ଅଗଷ୍ଟ ୨୦୧୯ ପରଠାରୁ ଏହା ସର୍ବନିମ୍ନ ସ୍ତରକୁ ଖସିଛି। ମଙ୍ଗଳବାର(୧୫ ଏପ୍ରିଲ୍) କେନ୍ଦ୍ର ପରିସଂଖ୍ୟାନ ମନ୍ତ୍ରଣାଳୟ ପକ୍ଷରୁ ଏହି ରିପୋର୍ଟ ଜାରି କରାଯାଇଛି। ଏହା ପୂର୍ବରୁ ଫେବ୍ରୁଆରୀ ମାସରେ ସିପିଆଇ ମୁଦ୍ରାସ୍ଫୀତି ୩.୬୧% ତଳେ ରହିଥିଲା। ମାର୍ଚ୍ଚ ମାସରେ ଏହା ଆହୁରି ତଳକୁ ଖସିଛି। ଲଗାତର ଦ୍ୱିତୀୟ ଥର ପାଇଁ ମୁଦ୍ରାସ୍ଫୀତି ଭାରତୀୟ ରିଜର୍ଭ ବ୍ୟାଙ୍କର ଆକଳନ ୪%ରୁ ବି ତଳେ ରହିଛି।
ମୁଦ୍ରାସ୍ଫୀତି ବୃଦ୍ଧିରେ ଖାଦ୍ୟ ସାମଗ୍ରୀର ଅବଦାନ ପ୍ରାୟ ୫୦% ରହିଥାଏ। ମାସିକ ଆଧାରରେ ଏହାର ମୁଦ୍ରାସ୍ଫୀତି ୩.୭୫% ରୁ ୨.୬୭% କୁ ହ୍ରାସ ପାଇଛି। ଗ୍ରାମାଞ୍ଚଳ ମୁଦ୍ରାସ୍ଫୀତି ୩.୭୯% ରୁ ୩.୨୫% କୁ ହ୍ରାସ ପାଇଛି ଏବଂ ସହରାଞ୍ଚଳ ମୁଦ୍ରାସ୍ଫୀତି ୩.୩୨% ରୁ ୩.୪୩%କୁ ବୃଦ୍ଧି ପାଇଛି। ପନିପରିବା, ଅଣ୍ଡା, ଡାଲି, ମାଂସ ଏବଂ ମାଛ, ଶସ୍ୟ ଏବଂ କ୍ଷୀରଜାତ ଦ୍ରବ୍ୟର ମୂଲ୍ୟ ହ୍ରାସ ଯୋଗୁ ନଭେମ୍ବର ୨୦୨୧ ପରଠାରୁ ଖାଦ୍ୟ ମୁଦ୍ରାସ୍ଫୀତି ସର୍ବନିମ୍ନ ସ୍ତରକୁ ଖସିଛି।
ଗୃହ କ୍ଷେତ୍ରର ମୁଦ୍ରାସ୍ଫୀତି ମାର୍ଚ୍ଚ ମାସରେ ୩.୦୩% ପର୍ଯ୍ୟନ୍ତ ବୃଦ୍ଧି ପାଇଛି, ଯାହା ଫେବୃଆରୀରେ ୨.୯୧% ଥିଲା। ଏହି ସୂଚକାଙ୍କ କେବଳ ସହରାଞ୍ଚଳ ପାଇଁ ଆକଳନ କରାଯାଇଛି। ଇନ୍ଧନ ଏବଂ ଆଲୋକ ମୁଦ୍ରାସ୍ଫୀତି, ଯାହା ଫେବୃଆରୀରେ -୧.୩୩% ରେ ନେଗେଟିଭ୍ରେ ଥିଲା, ଏହା ମାର୍ଚ୍ଚରେ ୧.୪୮% ପଜିଟିଭ୍କୁ ଫେରି ଆସିଛି।
ପଢନ୍ତୁ- ଇନଭେଷ୍ଟମେଣ୍ଟ ବ୍ୟାଙ୍କରଙ୍କ ଭବିଷ୍ୟତ ବାଣୀ, ୫୦,୦୦୦ ନୁହେଁ ଜାଣନ୍ତୁ ଆଗକୁ କେତେ ହେବ ସୁନା ଦର
ସେହିପରି ଶିକ୍ଷା ମୁଦ୍ରାସ୍ଫୀତି ୩.୮୩% ରୁ ସାମାନ୍ୟ ବୃଦ୍ଧି ପାଇ ୩.୯୮% ହୋଇଛି। ସ୍ୱାସ୍ଥ୍ୟସେବା ମୁଦ୍ରାସ୍ଫୀତି ୪.୧୨% ରୁ ୪.୨୬% ହୋଇଛି। ପରିବହନ ଏବଂ ଯୋଗାଯୋଗ ଖର୍ଚ୍ଚ ମଧ୍ୟ ବୃଦ୍ଧି ପାଇଛି, ଯାହା ପୂର୍ବ ମାସରେ ୨.୯୩% ରୁ ୩.୩୦% ହୋଇଛି।
ଖୁଚୁରା ମୁଦ୍ରାସ୍ଫୀତି ହ୍ରାସ ସତ୍ତ୍ୱେ କିଛି ସାମଗ୍ରୀର ଦାମ ଆଶ୍ଚର୍ଯ୍ୟ ଜନକ ଭାବେ ବୃଦ୍ଧି ପାଇଛି। ନଡ଼ିଆ ତେଲ ବାର୍ଷିକ ଆଦାରରେ ୫୬.୮୧% ବୃଦ୍ଧି ସହିତ ମୁଦ୍ରାସ୍ଫୀତି ତାଲିକାର ଶୀର୍ଷରେ ରହିଛି। ଏହା ପରେ ନଡ଼ିଆ (୪୨.୦୫%), ସୁନା (୩୪.୦୯%), ରୁପା (୩୧.୫୭%) ଏବଂ ଅଙ୍ଗୁର (୨୫.୫୫%) ରହିଛି।
