ନୂଆଦିଲ୍ଲୀ: ରିଲାଏନ୍ସ ଇଣ୍ଡଷ୍ଟ୍ରିଜ୍ 'ଅପରେସନ୍ ସିନ୍ଦୂର' ଶବ୍ଦ ବ୍ୟବହାର କରି ଟ୍ରେଡମାର୍କ ପାଇଁ କରିଥିବା ଆବେଦନକୁ ପ୍ରତ୍ୟାହାର କରିନେଇଛି।ଏନେଇ କମ୍ପାନୀ କହିଛି ଯେ ଆବେଦନଟି ଭୁଲବଶତଃ ଦାଖଲ କରାଯାଇଥିଲା। କମ୍ପାନୀ ଅନୁଯାୟୀ, ଜଣେ କନିଷ୍ଠ କର୍ମଚାରୀ ଉପଯୁକ୍ତ ଅନୁମୋଦନ ବିନା ଏଭଳି ଅନୁରୋଧ ଦାଖଲ କରିଥିଲେ।
ଏନେଇ କମ୍ପାନୀ ଗୁରୁବାର(୮ ମେ ୨୦୨୫) ଏକ ବିବୃତ୍ତି ଜାରି କରି କହିଛି "ରିଲାଏନ୍ସ ଇଣ୍ଡଷ୍ଟ୍ରିଜର ଅପରେସନ୍ ସିନ୍ଦୂରକୁ ଟ୍ରେଡମାର୍କ ବ୍ୟାବହାର କରିବାର କୌଣସି ଉଦ୍ଦେଶ୍ୟ ନାହିଁ, ଏହା ଏକ ଏପରି ବାକ୍ୟାଂଶ ଯାହା ଏବେ ଭାରତୀୟ ସାହସିକତାର ଏକ ପ୍ରତୀକ ଭାବରେ ଜାତୀୟ ଚେତନାର ଏକ ଅଂଶ ହୋଇଯାଇଛି।" ବିବୃତ୍ତିରେ ଆହୁରି କୁହାଯାଇଛି "ରିଲାଏନ୍ସ ଇଣ୍ଡଷ୍ଟ୍ରିଜର ଏକ ୟୁନିଟ୍, ଜିଓ ଷ୍ଟୁଡିଓ, ଏହାର ଟ୍ରେଡମାର୍କ ଆବେଦନକୁ ପ୍ରତ୍ୟାହାର କରିନେଇଛି, ଯାହା ଜଣେ କନିଷ୍ଠ ବ୍ୟକ୍ତିଙ୍କ ଦ୍ୱାରା ଅନୁମତି ବିନା ଅସାବଧାନତାବଶତଃ ଦାଖଲ କରାଯାଇଥିଲା।"
ପଢନ୍ତୁ- ରାଜ୍ୟରେ ୪.୪୨ ଲକ୍ଷରୁ ଅଧିକ ଜିଓ ଏୟାରଫାଇବର ଓ ଜିଓ ଫାଇବର ଗ୍ରାହକ : ଟ୍ରାଇ ତଥ୍ୟ
ଭାରତୀୟ ସେନାକୁ ପରାକ୍ରମକୁ ନେଇ କମ୍ପାନୀ ନିଜ ବିବୃତ୍ତିରେ କହିଛି “ପହଲଗାମରେ ପାକିସ୍ତାନ ପ୍ରାୟୋଜିତ ଆତଙ୍କବାଦୀ ଆକ୍ରମଣର ଜବାବରେ କରାଯାଇଥିବା ଅପରେସନ ସିନ୍ଦୂର ନେଇ ରିଲାଏନ୍ସ ଇଣ୍ଡଷ୍ଟ୍ରିଜ୍ ଏବଂ ଏହାର ସମସ୍ତ ଅଂଶୀଦାରମାନେ ଅତ୍ୟନ୍ତ ଗର୍ବିତ। ଆତଙ୍କବାଦର ଦୁଷ୍ଟତା ବିରୁଦ୍ଧରେ ଭାରତର ଦୃଢ଼ ଜବାବୀ ଲଢ଼େଇରେ ଅପରେସନ୍ ସିନ୍ଦୂର ହେଉଛି ଆମ ସଶସ୍ତ୍ର ବାହିନୀର ସାହସପୂର୍ଣ୍ଣ ସଫଳତା। ଆତଙ୍କବାଦ ବିରୁଦ୍ଧରେ ଏହି ଲଢ଼େଇରେ ରିଲାଏନ୍ସ ଆମ ସରକାର ଏବଂ ସଶସ୍ତ୍ର ବାହିନୀକୁ ସମ୍ପୂର୍ଣ୍ଣ ସମର୍ଥନ କରୁଛି। 'ଇଣ୍ଡିଆ ଫାଷ୍ଟ' ର ମୂଳମନ୍ତ୍ର ପ୍ରତି ଆମର ପ୍ରତିବଦ୍ଧତା ଅଟଳ ରହିଛି।”
କାହିଁକି ଏକ ଟ୍ରେଡମାର୍କ ଦାଖଲ କରାଯାଇଥିଲା?
ମେଁ ୭ ତାରିଖରେ, ନାଇସ୍ କ୍ଲାସିଫିକେସନ କ୍ଲାସ୍ ୪୧ ଅନ୍ତର୍ଗତ 'ଅପରେସନ୍ ସିନ୍ଦୂର' ବାକ୍ୟାଂଶକୁ ଟ୍ରେଡମାର୍କ କରିବା ପାଇଁ ଚାରୋଟି ଭିନ୍ନ ଆବେଦନ କରାଯାଇଥିଲା। ଏହି ବର୍ଗରେ ଚଳଚ୍ଚିତ୍ର, ଶୋ, ଅନଲାଇନ୍ ବିଷୟବସ୍ତୁ, ଶିକ୍ଷା, ସାଂସ୍କୃତିକ କାର୍ଯ୍ୟକ୍ରମ ଏବଂ ଅନ୍ୟାନ୍ୟ ସେବା ଅନ୍ତର୍ଭୁକ୍ତ ରହିଛି। ଏହା ସାଧାରଣତଃ OTT ପ୍ଲାଟଫର୍ମ, ପ୍ରସାରକ ଏବଂ ଚଳଚ୍ଚିତ୍ର ନିର୍ମାତାଙ୍କ ଦ୍ୱାରା ବ୍ୟବହୃତ ହୁଏ। ଏହାର ଅର୍ଥ ହେଉଛି ଏହି ବାକ୍ୟାଂଶକୁ ନେଇ ଏକ ଚଳଚ୍ଚିତ୍ର, ୱେବ୍ ସିରିଜ୍ କିମ୍ବା ଅନ୍ୟାନ୍ୟ ମନୋରଞ୍ଜନ ଉତ୍ପାଦରେ ପରିଣତ କରାଯାଇପାରିଥାନ୍ତା। ଏଥିପାଇଁ ଏକାଧିକ ଆବେଦନ କରାଯାଇଥିଲା।
ରିଲାଏନ୍ସ, ତାର ଜିଓ ଷ୍ଟୁଡିଓ ୟୁନିଟ୍ ମାଧ୍ୟମରେ, ସକାଳେ ପ୍ରଥମେ ଆବେଦନ ଦାଖଲ କରିଥିଲା। ଅନ୍ୟମାନେ ମଧ୍ୟ ଟ୍ରେଡ୍ ମାର୍କ ପାଇଁ ଆବେଦନ କରିଥିଲେ। ସେମାନ ହେଲେ ମୁମ୍ବାଇର ଜଣେ ବାସିନ୍ଦା, ଜଣେ ଅବସରପ୍ରାପ୍ତ ବାୟୁସେନା ଅଧିକାରୀ ଏବଂ ଦିଲ୍ଲୀରେ ରହୁଥିବା ଜଣେ ଓକିଲ ।
